Romanos 2 - Qheshwa Biblia DC

Diospa juicionqa cheqan

¹ Chayrayku, ya runa, qanqa mana kutichikuyta atinkichu; pipis kay, wajkunata tumpaspaqa, qan kikillaykitaj juchachakushanki. Wajta tumpaspaqa qampis kikillantataj ruwashanki.

² Yachanchej Diospa juicionqa, cheqa kajman jina, juchata ruwajkunaj contrampi kasqanta.

³ Ya runa, yuyankichu, chay jinata ruwajkunata tumpashaspa, qampis kikillantataj ruwashaspa, Diospa juicionmanta ayqenaykita?

⁴ Chayrí, Diospa qhapaj khuyakuynintachu qhesachanki, paciencianta, jatun munakuyninta ima? Mana yachashajtillayki munakuynenqa qanta pusasunki Diosman kutirinaykipaj.

⁵ Sinch'i, mana kasukoj sonqoyoj, Diosman mana kutirisqaykirayku qan kikiykipaj k'ajaj phiñakuyta tantashanki, k'ajaj phiñakuy p'unchaypaj; maypachachus Diospa cheqan kaj juicion rikuchisqa kanqa, chaypaj.

⁶ Paytaj sapa ujman qoponqa ruwasqanman jina.

⁷ Allinta ruwaspa sayajkunaman wiñay kausayta qonqa; pikunachus mask'anku janaj pacha k'anchayta, jatun kayta, mana jayk'aj wañuyta ima.

⁸ Churanakojkunapaj, cheqan kajta mana kasojkunapaj, mana allin kajta ruwajkunapaj ima, phiñakuy, manchay chejninakuytaj kanqa.

⁹ Jinallataj ñak'ariy, llakiytaj kanqa tukuy sajrata ruwajkunapaj; ñaupajta judiospaj, qhepantataj griegospaj.

¹⁰ Allin kajta ruwajkunapajqa kanqa, jatun kay, allimpaj qhawasqa kay, sonqo tiyasqa kay ima; ñaupajta judiospajraj, chaymantataj griegospaj.

¹¹ Diosqa mana runaj rijch'aynillantachu qhawan, astawanqa tukuyta uj rejta qhawan.

¹² Tukuy mana leypi kashaspa juchallikojkunaqa, mana leyniyoj wañonqanku. Leypi kashaspa juchallikojkunatataj, kikin leyllataj juzganqa.

¹³ Mana leyta uyarejkunaqa, Diospa ñaupaqempi cheqan runas kanqanku; astawanqa leypa nisqanta ruwajkunalla cheqan runaspaj rejsisqas kanqanku.

¹⁴ Gentilesqa mana leyniyoj kaspa, paykuna kikinkumanta leypa kamachisqasninta ruwanku, mana leyniyoj kaspapis, paykunalla ley kanku, paykuna kikinkupaj.

¹⁵ Paykunaqa rikuchinku escribisqa leypa ruwayninta sonqonkupi, kikin concienciankutaj paykunamanta willan, imatachus yuyasqankuta ch'ataykuspa, chayrí jark'akuspa.

¹⁶ Juicio p'unchaypi, Dios juzganqa Jesucristonejta, runaspa pakaypi ruwasqasninkuta, evangelioman jina.

Judiospa leynin

¹⁷ Qanqa, judío nisqa kanki, alabakunkitaj leypi allinta sayani, Dioswantaj kani, nispa.

¹⁸ Diospa munayninta rejsinki, leynejta yachachisqa kanki, aswan allin kajtapis, walej kasqanta ninki.

¹⁹ Ciegospa pusaykachajnin, laqhapi kajkunaj k'anchaynin kasqaykita yuyakunki.

²⁰ Yuyallankitaj, mana yachajkunaj yachachejnin kasqaykita; wawaspa yachachejnin, leypitaj yachaypa rijch'aynin, cheqa kajpatawan tiyapusunki.

²¹ Qanqa wajkunaman yachachishaspa, manachu qan kikiykita yachachikunki? Wajkunaman mana suwana kasqanta willashaspa, qanrí, imaraykutaj suwashanki?

²² Wajkunaman ninki mana qhenchachakuna kasqanta. Qanrí manachu qhenchachakushanki? Lantikunata chejnikunki, imaraykutaj chantá lantej imasninta suwankiri?

²³ Leymanta alabakunki, Diostataj mana allimpaj qhawanki, leyta mana allinta junt'aspa.

²⁴ Escribisqa kasqanman jina, juchaykichejrayku qankunanejta Diospaj sajrata rimanku.

²⁵ Leyta kasojtiyki, cheqamanta circuncisionqa yanapasunki. Mana leyta kasuspaqa, leyta p'akinki, circuncidasqa kasqaykitaj, manapis circuncidasqachu kawaj jina.

²⁶ Mana circuncidasqa kaj, leypa kamachisqanta waqaychanman chayqa, mana circuncidasqa kasqaykeqa, circuncidasqapis kawaj jina.

²⁷ Pichus cuerpompi mana circuncidasqa kajqa, leypa nisqanta waqaychan. Paytaj juchachasonqa, leypi escribisqa kajwan, circuncidasqa kasqayki leyta p'akisqaykimanta.

²⁸ Mana judiochu jawallamanta kajqa; nillataj circuncidasqachu, jawa aychallampi circuncidachikojqa.

²⁹ Manachayqa ukhunmanta circuncidasqa kajmá judioqa, jinallataj tukuy sonqomanta circuncidasqa kanan tiyan espiritupi, mana escribisqallapichu. Paypaj yupaychayqa mana runasmantachu jamun, astawanqa Diosmanta.