Romanos 13 - Qheshwa Biblia DC

Kamachejkunata kasukunamanta

¹ Tukuy runakunaqa kamachejkunata kasuchunku; imaraykuchus ateyqa Diosllamanta jamun, kamachejkunapis Diospa churasqallantaj kanku.

² Ajinaqa, pichus kamachejkunata mana kasunchu chayqa, Diospa churasqanta mana kasunchu. Chayrayku mana kasukojkunaqa, paykuna kikinkupaj jasut'iyta mask'akunku.

³ Kamachejkunaqa, allin kajta ruwajkunata mana manchachinankupajchu churasqas kanku, manachayqa sajrata ruwajkunallata. Munankichu kamachejta mana manchachikuyta? Allinta ruway, paytaj allimpaj qhawasonqa.

⁴ Kamachejqa Diospa kamachisqanta ruwan, qampa allinniykipaj. Chantá mana allinta ruwanki chayri, manchachikuy, imaraykuchus kamachejqa manamin qhasipajchu espadataqa apaykachan. Payqa Diospa kamachinmin; jasut'iwantaj sajrata ruwajta kutichinampaj.

⁵ Chayrayku allimpuni paykunata kasunaqa, chantá mana jasut'ita manchachikuspallachu, astawanqa concienciaman jina kasuna.

⁶ Chayrayku impuestotapis qoshankichej, imaraykuchus paykunaqa Diospa kamachisnin kanku, kay tukuy imasta ruwaspallapuni.

⁷ Tukuy manuykichejta junt'aychej: Pimanchus tasata qonaykichejmanqa tasata qopuychej. Impuestota qonaykichejmantaj impuestota qopuychej. Pitachus kasunaykichej tiyan, chaytaqa kasuychej. Pitachus jatumpi qhawanaykichejtapis allimpaj qhawaychej.

⁸ Ajinaqa ama pimampis manuchu kaychej, manachayqa purajmanta munanakuychej, imaraykuchus runa masinta munakojqa, ñapis leyta junt'anña.

⁹ Leyqa jinata nin: Ama qhenchachakunkichu, ama wañuchinkichu, ama suwankichu, [ama qhasimanta tumpankichu,] ama wajpa imanta munapayankichu. Mayqen kamachillapis kay nisqapi junt'akun: Runa masiykita munakunki qan kikiykita jina.

¹⁰ Munakoyqa mana sajratachu ruwan runa masinta. Runa masita munakoyqa leyta junt'aymin.

¹¹ Kaywanqa yachanchej tiempota rejsispa puñuymanta rijch'arina horaña kasqanta, imaraykuchus salvacionninchejqa aswan qayllapi kashan, creesqanchej chay p'unchaymantaqa.

¹² Tutaqa tukukapushanña, p'unchaytaj qayllamushan. Chayrayku amaña ruwanachu laqhayaypa ruwanasninta, astawanqa Diospa k'anchaynimpa maqanakunasninwan p'achallikuna.

¹³ Ajinaqa p'unchaypi jina purinachej maychus kajta; amataj purinachu jatun mikhuykunaspi, machaykuykunaspi, millay kausaypi, churanakuypi, nitaj chhoqonakuypipis.

¹⁴ Astawanqa Señor Jesucristomanta p'achallikuychej; amataj aychaj munayninta ruwaychejchu.