Romanos 12 - Qheshwa Biblia DC

Cristopi creejkunaj ruwaynin

¹ Ajinaqa, hermanos, mañakuykichej, Diospa khuyakuyninrayku kausanaykichejta, kausashaj rikuchikuta jina jaywanaykichejpaj, llimphuta, Diosta kusichejta. Chaymá cheqan yuyaywan Diosta yupaychayniykichejqa.

² Ama kay mundoj munayninman jina puriychejchu, astawanqa yuyayniykichejpa mosoj kayninman jina allinta kausaychej, yachanaykichejpaj mayqenchus Diospa munaynin kasqanta, k'acha, kusichej, junt'asqataj.

³ Dios khuyakuyninta qowasqanrayku, sapa ujniykichejman niykichej, ama qankuna kikiykichejmanta astawan kasqaykichejta yuyakunaykichejpaj. Manachayqa sapa uj pay kikinmanta maychus kajta yuyachun, Dios sapa ujman fewan qosqanman jina.

⁴ Cuerponchejpeqa ashkha partes tiyan, manataj tukuyninkuchu uj rejllata ruwanku.

⁵ Ajinallataj noqanchejpis, ashkha kaspa, Cristopi uj cuerpolla kanchej, sapa ujtaj ujkuna ujkunawan cuerpoj partesnin jina kanchej.

⁶ Ajinaqa, sapa ujman, waj waj yanapaykunata khuyakuyninman jina qowarqanchej. Chayrayku pimanchus evangeliota willanampaj yachayta qorqa, feninman jina willachun.

⁷ Sichus yanapata qowanchej wajkunata yanapanapaj chayqa, yanapana tiyan, chayrí, yachachejpis yachachichun.

⁸ Sonqochajpis k'amispa sonqochachun, imata qojpis allinta tukuy sonqowan rak'ichun. Kamachejpis allinllawan kamachichun, khuyakojpis kusiywan khuyachun.

⁹ Munakuspaqa, ama munakojllamanchu rijch'akuychej. Sajra kajta chejniychej, allin kajtataj ruwaychej.

¹⁰ Hermanos jina, tukuy sonqo munanakuychej, ujkuna ujkunata allimpaj qhawaspa.

¹¹ Ima ruwanallapipis ama qhellas kaychejchu; k'uchistaj kaychej, tukuy sonqotaj Señorta sirviychej.

¹² Kusiywan kakuychej suyaypi, llakiypi llamp'u sonqowan, Diosmanta mañakuspapuni.

¹³ Ajllasqas pisichikojtinku yanapaychej, wasiykichejmantaj paykunata wajyariychej k'acha kayta yachakuspa.

¹⁴ Bendiciychej qhatiykachasojkunata. Diosmanta paykunapaj mañapuychej, amataj maldiciychejchu.

¹⁵ Kusikuychej kusikojkunawan; waqajkunawantaj waqaychej.

¹⁶ Uj sonqolla kaychej qankuna ukhupi; ama jatunchakuspa llamp'u sonqo kajkunawan kausakuychej. Amataj qankunaj yuyayniykichejpi yachaysapas kaychejchu.

¹⁷ Ama pimampis sajramanta sajrallatataj kutichiychejchu, allin kajtapuni ruwaychej tukuy runaj ñaupaqempi.

¹⁸ Atikojtenqa atisqaykichejman jina tukuy runawan allimpi kausakuychej.

¹⁹ Munasqa hermanosníy, ama qankunapura sajramanta sajrallatataj kutichinakuychejchu, manachayqa phiñakuyta saqeychej Diosman. Escribisqa kashan: Noqa kutichisaj, noqa jasut'isaj, nin Señorqa.

²⁰ Chayrayku enemigoyki yarqhachikojtenqa mikhuyta qoriy, ch'akichikojtintaj yakuta jaywariy. Kayta ruwaspaqa nina brasaswan jina p'enqaypi uyanta k'ajarichinki.

²¹ Ama sajra kajwan atipachikuychu, astawanqa sajra kajta allin kajwan atipay.