Romanos 10 - Qheshwa Biblia DC

¹ Hermanos, cheqamanta sonqoypa munaynenqa, Diosmanta mañakuyniypis, israelitas salvasqas kanankupaj.

² Paykunamanta willani Diosta munakusqankuta; manataj cheqan yachayman jinachu.

³ Diospa cheqan kayninta mana rejsispa, paykunaj munaynillankuta ruwayta munarqanku. Diospa cheqan kayninta mana kasorqankuchu.

⁴ Leypa tukukuynenqa Cristomin, tukuy paypi creejkuna Diospaj cheqan runas kanankupaj.

⁵ Chayrayku cheqan kajmanta leynejta Moisés ajinata escriberqa: Pipis leyta junt'ajqa, paynejta kausanqa.

⁶ Fenejta cheqan kajrí, ajinata nin: Ama sonqoykipi ninkichu: Pitaj janaj pachaman wicharenqarí? Kay niyta munan Cristota Kay pachaman uraykuchimunapaj.

⁷ Chayrí, pitaj ukhu pachaman uraykonqari? Chayqa niyta munan: Cristota wañusqakunamanta wicharichinapaj.

⁸ Astawan, ima nintajri? Palabraqa qayllaykipi kashan, simiykipi, sonqoykipitaj. Kaymin femanta yachachisqayku palabraqa.

⁹ Sichus simiykiwan niwaj Jesusqa Señor kasqanta, creewajtaj sonqoykipi Dios wañusqakunamanta kausarichimusqanta chayqa, salvasqa kanki.

¹⁰ Runaqa sonqowan creen Dioswan cheqa kajpi kanapaj, simiwantajrí willakunchej salvaciompaj.

¹¹ Escriturapeqa nin: Tukuy paypi creejqa, mana p'enqaypi rikhurenqachu.

¹² Judío runawan, griego runawanqa uj rejlla kanku. Ujlla Señorqa tukuypata, qhapajtaj tukuy payta wajyakojkunapaj.

¹³ Pillapis Señorpa sutinta wajyakojqa salvasqa kanqa.

¹⁴ Imaynatataj wajyakonqanku mana paypi creespari? Imaynatataj creenqanku paymanta mana uyarispari? Imaynatataj uyarenqanku paykunaman mana pipis willajtinri?

¹⁵ Imaynatataj willanqanku mana kachasqas kaspari? Escribisqapi nishan: May k'achapuni sonqo tiyakuyta allin imastataj willajkunaj chakisninkoqa!

¹⁶ Manataj tukuychu kasorqanku evangeliotaqa; chayrayku Isaías nin: Señor, pitaj creerqa willasqaykutari?, nispa.

¹⁷ Ajinaqa uyariynejta feqa jamun, uyariypis Cristoj palabrannejta jamun.

¹⁸ Chanta nini: Manachu uyarerqanku? Arí, uyarerqankupuni, imaraykuchus paykunaj willasqankoqa tukuynejman chayarqa, kay pachaj cantosninkama.

¹⁹ Ujtawan nillanitaj: Manachu kaytaqa Israel ayllu rejserqa? Ñaupajtaña Moisés nerqa: Noqa uj llajtawan jap'inachisqaykichej. Chay llajtaqa mana noqajtachu. Mana yuyayniyoj llajtawantaj phiñanachisqaykichej.

²⁰ Isaías sut'ita nillantaj: Mana mask'awajkuna tariwanku; rikuchikorqanitaj noqamanta mana tapukojkunaman.

²¹ Israel ayllumanta nin: Sapa p'unchay wajyarqani mana kasukoj, churanakoj aylluta.