Romanos 1 - Qheshwa Biblia DC

Pabloqa Roma Iglesiaman escribin

¹ Noqa Pablo, Jesucristoj kamachin kani, apóstol kanaypaj wajyasqa, Diospa evangelionta willanaypaj t'aqasqa.

² Diosqa unaymantapachaña nerqa evangeliota qonanta, cheqa Escrituraspi profetasninnejta.

³ Chaytaqa, Churin Jesucristomanta willarqa; payqa aychaman jina Davidpa mirayninmanta karqa.

⁴ Sut'inchasqa karqa Diospa Churin atiywan kasqanta, cheqan Espirituman jina, wañusqasmanta kausarimusqanrayku.

⁵ Jesucristonejta jap'inchej khuyakuyta, kamachin kayta, tukuy llajtaspi, paypi creenankupaj kasunankupajtaj.

⁶ Qankunapis paykuna ukhupi wajyasqas kankichej, Jesucristojta kanaykichejpaj.

⁷ Kay cartata escribimuykichej Roma llajtapi tiyakojkunaman, Diospa munakusqasnin. Sumaj kausayman wajyasqas kankichej. Khuyakuy, sonqo tiyakuytaj qankunapaj kachun Dios Tatanchejmanta, Señor Jesucristomantawan.

Pablo riyta munan Romaman

⁸ Ñaupajta graciasta qoni Diosniyman, Jesucristonejta tukuyniykichejmanta; imaraykuchus feniykichej uyarikushan mundontimpi.

⁹ Dioslla yachan pitachus kasusqayta, Espiritupi Churinmanta evangeliota willaspa. Diosmanta mañakuyniypi mana sayk'uspa qankunamanta yuyarikunipuni.

¹⁰ Jinallataj mañakushanipuni imaynallamantapis Diospa munaynin kajtin qankunata watukoj allinta jamunaypaj.

¹¹ Noqaqa rikuytapuni munaykichej, Espíritoj ima yanapaynillantapis qankunaman qonaypaj, astawan kallpachasqas kanaykichejpaj.

¹² Kayta nini purajmanta sonqochanakunanchejpaj, chay kikin feninchejrayku.

¹³ Hermanos, munani yachanaykichejta, ashkha kutita qankunajman jamuyta munasqayta. Manataj aterqanichu, qankuna ukhupi, Espiritupi ima poqoyllatapis jap'inaypaj, gentiles ukhupi jina.

¹⁴ Noqa evangeliota willanaymanta manu jina kani, griegosman, mana griegosmampis; yachayniyojkunaman, jinallataj mana yachayniyojkunamampis.

¹⁵ Noqamantaqa wakichisqaña kani, usqhayta jamuspa evangeliota willanaypaj, qankuna Romapi tiyakojkunamampis.

Evangelioj atiynin

¹⁶ Mana p'enqakunichu evangeliomanta, imaraykuchus evangelioqa Diospa atiynin tukuy creejkunata salvanampaj; ñaupajta judiosta, chaymantataj griegosta.

¹⁷ Evangeliopeqa Diospa justician fenejta rikuchikun, fepajtaj; imaynachus escribisqa kasqanman jina: Cheqan runaqa fenejta kausanqa.

Runakunaqa juchayoj kanku

¹⁸ Diospa phiñakuynenqa janaj pachamantapacha rikuchikun, Diosta mana yupaychajkunaj contrampi, mana cheqan kajta ruwajkunapaj ima. Paykunaqa mana cheqan kayninkuwan, cheqan kajta jark'ashanku.

¹⁹ Imachus Diosmanta yachakun, chayta paykunapis rejsinku, imaraykuchus Dios kikin paykunaman rejsicherqa.

²⁰ Diospa mana rikukoj imasnenqa, sut'ita rikuchikunku, paypa ruwasqasninnejta, mundoj ruwakusqanmantapacha. Chaykunaqa kanku: Wiñay atiynin, Dios kasqan ima. Chayrayku mana ninkumanchu imatapis mana yachasqankutaqa.

²¹ Ajinata Diosta rejsishaspa, mana Diosta jinachu yupaycharqanku, nitaj graciastapis qorqankuchu. Astawanqa qhasi mana kaj yuyayninkuwan jatunchakorqanku, wampu sonqonkupis astawan laqhayaykorqa.

²² Yachaysapasman tukuspa wampuyarqanku.

²³ Diospa mana tukukoj jatun kayninta tukucherqanku ismoj runaj lantinman, p'isqosman, tawa chakiyoj uywasman, katarisman ima.

²⁴ Chayrayku Diosqa paykunata millay kausayman enqhaykorqa, sonqonkoj munayninman jina. Ajinamanta paykunapura ukhunkuta qhenchacharqanku.

²⁵ Diospa cheqa nisqanta llullakuyman tukucherqanku, ruwasqa kajkunata jatunchaspa, yupaychaspataj; kay pachata ruwajtataj mana yupaycharqankuchu. Payqa yupaychasqamin wiñaypa wiñaynintimpaj. Amén.

²⁶ Chayrayku Diosqa p'enqay munapayaykunaman jap'icherqa; imaraykuchus warmisninkupis, maychus ruwana kajta saqespa, cuerponkoj contranta ruwarqanku.

²⁷ Ajinallataj qharispis, warmista saqespa, millay yuyayninkupi q'oñirerqanku paykunapura. Qharipurataj p'enqay juchata ruwarqanku, ñak'arerqankutaj kikin ukhunkupi jasut'ita pantasqankuman jina.

²⁸ Paykuna Diosta qonqapusqankuraykutaj, Diosqa jap'icherqa sajra yuyaykunaman, mana allin kajta ruwanankupaj.

²⁹ Paykunaqa junt'asqas karqanku mana cheqan ruwaykunawan, [qhenchachakuywan,] sajra kaywan, munapayaywan, qhawaraywan, runa wañuchiywan, phiñanakuywan, ch'aukiyaywan, sajra yuyaykunawan ima.

^30-31 Kankutaj thutojkuna, tumpajkuna, Diosta chejnejkuna, qhasimanta k'amejkuna, jatunchakojkuna, sajra kajkunata rikhurichejkuna, tatasninkuta mana kasukojkuna, mana yuyayniyojkuna, parlasqankuta mana junt'ajkuna, mana munakuyniyojkuna, mana allinyakuyta munajkuna, mana khuyakuyniyojkunataj.

³² Pikunachus Diospa juicionta yachashaspa, chaykunata ruwajkunaqa wañunanku tiyan. Chantá mana paykunallachu ruwanku, astawanqa chay juchasta ruwajkunawan kusikunku.