Proverbios 4 - Qheshwa Biblia DC

Allin ñanta purinamanta

¹ Wawas, tatasniykichejpa yachachisusqaykichejta jap'iychej; sumajta uyariychej sumaj yuyayniyoj runas kayta yachanaykichejpaj.

² Noqaqa sumajta yachachiykichej, ajinaqa ama chay yachachisqasniymanta qonqapuychejchu.

³ Noqapis wawa kaytaqa yachani; mamayqa may k'achata munakuwaj.

⁴ Tatayqa yachachiwaj kay jinata: Sonqoykipi jap'iy nisqasniyta; kamachisqasniyta ruway; chantá kausankitaj.

⁵ Yachayta, yuyaychaykunata ima allinta jap'iy, palabrasniytaqa ama jayk'ajpis qonqankichu.

⁶ Yachayta munakuy, ama jayk'ajpis saqenkichu, imaraykuchus chaymin jark'akusonqa.

⁷ Amaraj imatapis jap'ishaspa, yachayta, allin yuyaytawan jap'ikuy.

⁸ Yachayta munakuytawan pataman oqhariy, paypis pataman oqharillasonqataj; payqa allimpaj qhawasonqa payta ojllaykojtiykeqa.

⁹ Payqa allinta umaykita k'achanchasonqa, k'acha pillutataj umaykiman churasonqa.

¹⁰ Palabrasniyta uyariway, wawáy, jap'ikuytaj, paytaj watasniykita ashkhayachenqa.

¹¹ Noqa pusasqayki yachay ñanninta, allin ñampi purichisqayki.

¹² Chay ñampeqa mana imapis pantachisoj kanqachu, chay ñanta correshajtiykipis ni ima misk'achisonqachu.

¹³ Imatachus nisqayta sumajta jap'ikuy, ama saqeychu; chay nisqasniyman jina ruwan, chaymin kausayniykeqa.

¹⁴ Ama sajra runaspa qhepanta riychu, ama sajra ruwasqankuta ruwaychu.

¹⁵ Ama chay ñannejta riychu, chaymanta karunchakuspa ñaupajman rillaypuni.

¹⁶ Paykunaqa ima sajratapis mana ruwaspaqa mana puñuykunkuchu, pitapis mana urmachispaqa puñuyninkuta chinkachinku.

¹⁷ Paykunaj mikhuyninkoqa sajra ruwaymin, ujyanankutaj suwaylla.

¹⁸ Cheqan runaspa ñanninkoqa sut'iyamuyta inti llojsimushaj jina, astawan p'unchayyamusqanman jinari sumajta k'ancharimun.

¹⁹ Juchasapaspa ñanninkurí laqhalla, mana yachankuchu imapichus misk'akusqankuta.

²⁰ Palabrasniytaqa uyariway, wawáy, imatachus nisqasniyta sumajta uyariy.

²¹ Ama ñawiykimanta chinkachiychu, sumajta yuyayniykipi jap'iy.

²² Chay imasta tarisqaykipeqa kausay kashan, chayqa tukuy ukhuykipaj jampi kashan.

²³ Tukuy ima waqaychasqa kajmanta astawan sonqoykita waqaychay; chaymantamin jamun kausayniykeqa.

²⁴ Ayqey mana allin parlaymantaqa, llulla parlaykunamanta t'aqakuy.

²⁵ Ñawiykeqa cheqanta qhawachun, imachus ñaupaqeykipi kajta sumajta qhawakuy.

²⁶ Maymanchus chakiyki sarushan chaytaqa allinta qhawakuy, ñanniykitaj sumaj thuru kanqa.

²⁷ Ñanniykimantaqa ama pantaykunkichu, ni pañaman, nitaj lloq'eman. Mana allinkunapi purinamanta t'aqakuy.