Proverbios 30 - Qheshwa Biblia DC

Agurpa palabrasnin

¹ Masa sutiyoj llajtamanta Jaquej wawan Agurpa palabrasnin. Agurqa Itielman, Ucalmanwan, kay jinata parlarqa:

² Noqaqa tukuy runasmanta astawan wampu kani; noqapeqa mana runaj unanchaynin kanchu.

³ Mana yachayta jap'eqanichu; nitaj yachanichu santo kajpa yachayninta.

⁴ Pitaj janaj pachaman wicharerqa uraykamorqatajri? Pitaj wayrata makimpi q'apiykorqari? Pitaj yakuta inkuñaman wataykorqari? Pitaj jallp'aj mojonesninta sayacherqari? Yachanki chayqa niway, imataj paypa sutin, chanta wawampa sutimpisri?

⁵ Señorpa tukuynin palabrasnenqa llimphupuni; payqa waqaychan paypi tukuy yuyaykunata.

⁶ Palabrasninmanta ama yapankichu, ama paywan k'amichisunaykipaj, nitaj llullapaj jina qhawachikunaykipaj.

⁷ Iskay imasllata mañakuyki, Diosníy; manaraj wañupushajtiy, ama niwaychu: Mana, nispa.

⁸ Noqamanta karunchachiy mana allin kajta, llullakuytawan; ama qhapajyachiwaychu, nitaj wajchayachiwaychu. Imachus mikhunaypaj kajllata ama pisichipuwaychu.

⁹ Mikhunay ashkha kanman chayqa, qanta qonqapuykiman, niykimantaj qanta mana rejsisusqayta; sichus pisiwanman chayri, suwakuymanñataj qokuyman. Ajinamanta Diosniypa llimphu sutinta qhesachayman.

¹⁰ Ama kamachej contranta parlaychu patronnimpa ñaupaqempeqa, chay jinamanta ama maldicisqa kanaykipaj, manataj jasut'ichikunaykipaj.

¹¹ Wakenqa tatankuta maldicinku, mamankutapis mana bendicinkuchu.

¹² Wakin runasqa llimphus kasqankuta yuyakunku, manataj millay ch'ichi kasqankumanta llimphuchakuspapis.

¹³ Wakenqa yuyakunku may jina kasqankuta, wakintaqa pata patallamanta qhawanku.

¹⁴ Wakimpa kirusninkoqa espada jina, aqo kirusmantataj cuchillos. Ajinamanta may llajtapichus kanku chaypi, wajcha runasta tukuchinankupaj.

¹⁵ Yawar ch'onqaj khurojta iskay uñasnin tiyan, ninkutaj: Qoway, qoway, nispa. Kinsa imas tiyan; chanta tawapis, chaykunaqa mana sajsayta atinkuchu; chaykunataj kanku:

¹⁶ Wañuy cheqa, mana wachaj warmi, mana yakuyoj jallp'a, mana thasnukuyta atej nina ima.

¹⁷ Tatanta qhesachajqa: Jinallataj paya mamanmanta asirikojqa, qharqañaswan ñawisninta orqhochikuchun, ankaj uñasninkuwantaj mikhuchikuchun.

¹⁸ Kinsa imas maytapuni t'ukuchiwan, tawa kajtaj mana unanchayta atinichu; chaykunataj kanku:

¹⁹ Patata phawaj ankaj lastron, chhankaspi katarej purisqampa lastron, mar qochaj chaupimpi buquej ñannin, warmiman runaj chayasqan.

²⁰ Uj qhencha warmej puriynenqa kay jina: Mikhuytawan siminta sumajta picharakun, nintaj manapuni ima sajratapis ruwasqanta.

²¹ Jallp'aqa kinsa imasrayku anchata qhollpikun, tawa kajtataj manañapuni rikuyta munanchu, chaykunataj kanku:

²² Kamachi kajpa reyman tukusqan, wampoj mikhunawan atipachikusqan,

²³ chejnisqa warmi, qosayoj rikhurisqan, uj kamachi warmi patronampa cuentampi sayasqan ima.

²⁴ Jallp'a patapi tawa juch'uy animalitos kanku: Chaykunaqa sumaj yachayniyoj kanku, yachayniyojkunamantapis astawanraj:

²⁵ Chhakas, mana kallpayoj uj jatun llajta jina, q'oñi tiempopi ashkha mikhunasta tantaykunku.

²⁶ Qowispis mana kallpayoj kashaspa, chhankaspi wasichakunku;

²⁷ Langostaspis mana reyniyoj kashaspa, tukuyninku sinrulla cheqanta purinku.

²⁸ Makiykiwan jap'isqayki kusikusipis, reypa palaciompi ima tiyakun.

²⁹ Kinsa kanku k'achata purejkuna, tawa kajtaj aswan k'achatapuni purin:

³⁰ Leonqa tukuy animalesmanta aswan phiña; manapuni ima kajtimpis ayqellanchu.

³¹ Jinallataj wallpasta pusaykachaj gallopis; chantá pusaj chivopis, uj rey soldadosnimpa ñaupaqenta rejpis.

³² Sichus wampu jina imamantapis oqharikunki, chayri mana allinkunasta ruwayta munanki chayqa, allinta unancharikuspa simiykita wisq'aykurikuy.

³³ Sichus lecheta qaywinki chayqa, mantequillata orqhonki, sichus anchata qhetej nichinki chayqa, senqaykimanta yawarta orqhokunki.