Proverbios 29 - Qheshwa Biblia DC

¹ Pichus k'amejtinku sonqonta rumiyachejqa, ujllata chinkayman renqa mana ujtawan kutirimuyniyojta, jinamanta paypajqa manaña jampi kanqachu.

² Cheqan kajkuna tukuy imata paykunalla ruwajtinku, runasqa mayta kusikunku. Sajra runaslla imapipis ñaupajpi kajtinku, runasqa mayta llakikunku.

³ Yachayniyoj wawaqa tatanta kusichin; qhencha warmiwan purejqa qolqenta usuchin.

⁴ Cheqanta ruwaj reyqa ayllunta sumajta sayachin; impuestosllata mañaj runaqa mana allinman tukuchin.

⁵ Kausaqenta alaballajpuneqa, ñaupaqenman uj tojllata jina churashan.

⁶ Juchasapaj tojllanqa kikin juchasnillantaj; cheqanta purej runarí, kusisqalla sonqo junt'asqataj tiyakun.

⁷ Cheqan runaqa wajcha runaspa imasninmanta allinta dakun, sajra runarí chaymantaqa mana dakunchu.

⁸ Ch'ampanachej runasqa llajtata ch'ajwachinku, yachayniyojkunataj chaytaqa ch'inyachinku.

⁹ Yachayniyoj runa wampu runawan quejaman yaykunku chayqa, phiñakuspapis, phujllakuspapis mana samarikuyta tarinchu.

¹⁰ Runa wañuchi runasqa cheqan kaj runata chejnikunku, cheqan kaj runarí paykunaj kausayninku allin kananta munanku.

¹¹ Wampu runaqa tukuy atisqanta phiñakun, yachayniyoj runarí phiñakuyninta ñit'iykukun.

¹² Sichus uj kamachejqa llulla palabrasta creen chayqa, tukuy yanapajkunasnin llullallataj kanqanku.

¹³ Ñak'arisqa kajwan, ñak'arichejwanqa uj rejlla kanku, Señorqa iskayninkoj ñawisninta k'ancharichin.

¹⁴ Uj rey wajchaspaj cheqanta ruwajqa, wiñaypaj kamachinanta sayachin.

¹⁵ Jasut'iwan, k'amisqawan imapuni yachayniyojqa kanku, munayninta ruwajta saqesqa wawaqa mamanta p'enqachin.

¹⁶ Ashkha sajra runas kajtinkoqa, ashkhallataj juchapis kanqa; cheqan runastaj rikonqanku sajra runaspa llakiyninkuta.

¹⁷ Wawaykitaqa k'amiypuni, paytaj kusisqata tiyachisonqa, may kusiytataj tarinki.

¹⁸ Maypichus Diospa kamachiynin mana kajtenqa, mana imapis allin kanchu; Diospa leyninta junt'ayrí kusikuyniyojmin.

¹⁹ Kamachi runaqa palabrasllawan mana kasukunchu, allinta unanchashaspapis, mana kasukunchu.

²⁰ Uj wampu runamantaqa atisunmanraj allin kajta qhatiy suyayta, mana unanchaspalla parlajmanta nisqaqa.

²¹ Kamachinta juch'uymantapacha mana allintachu uywajqa, qhepaman mayta waqanqa.

²² Machu machu phiña runa kajqa, chay jina kasqanwan maqanakusta oqharin, maytataj juchachakun.

²³ Machu machu kayqa runata mana allin kayman chayachin, llamp'u sonqoyojtaj allimpaj qhawasqa.

²⁴ Suwajta yanapaj runaqa pay kikinta chejnikun, may jinata nichikushaspapis manapuni parlarinchu.

²⁵ Runata manchachikoyqa tojllapis kanman jina, pichus Señorpi atienekojqa sumaj qhawasqa waqaychasqataj kanqa.

²⁶ Ashkhas mask'anku kamachejpa khuyakuyninta; chaywampis Señorlla sapa ujman justiciata ruwan.

²⁷ Cheqan sonqoyoj runasqa sajra runasta mana rikuyta munankuchu, kikillantaj sajra runapis cheqan kaj runasta mana rikuyta munankuchu.