Proverbios 26 - Qheshwa Biblia DC

¹ Q'omer tiempo rit'inanqa mana allinchu, nitaj cosecha oqharina kashajtin paranampis allinchu; ajinallataj wampupajqa mana allinchu jatunchasqa kananqa.

² Uj chinkasqa phichitanka phawaykachallan, chayri para p'isqopis mana thapayoj phawaykachallan; ajinallataj mana jasut'ichikunapis mana jucha kajtenqa, ni jayk'aj chayamonqachu.

³ Caballotaqa reatawan mansoyachina, burrotataj lazowan; ajinallatataj wamputapis wasampi k'aspiwan wajtaspa reparachina.

⁴ Wampu runamanqa ama kutichiychu imaynachus kasqanman jina, qampis ama pay jina kanaykipaj.

⁵ Wampumanqa kutichiy imaynachus kasqanman jina, sonqompi yachayniyoj kasqanta ama yuyakunampaj.

⁶ Pichus chakisninta khuchukun, mana allinnintataj ujyaykun; ajinallataj kanman uj sonso runaman willayta apacheyqa.

⁷ Uj k'inkiykachaj runaqa mana karuta riyta atinchu; ajinallataj uj yachayniyoj palabrapis wampoj simimpeqa.

⁸ Warak'aman rumita wataykoyqa mana allinchu; ajinallataj wamputa allimpaj qhawanaqa mana allinchu.

⁹ Machasqaqa makimpi khishkata mana reparakunchu; ajinallataj wampoqa mana yachanchu imachus yachay palabras kasqanta.

¹⁰ Flechaj runaqa flechawan tukuy pasajkunata jap'ichinman, chay kikillantaj wampuman ima ruwanatapis qojqa.

¹¹ Alqoqa wijch'umusqanta watejmanta mikhuykakapun; ajinallatataj wampu runaqa wampu ruwayninman kutirin.

¹² Yachayniyojman tukoj runamantaqa ni imata tarinchejchu, paymanta nisqaqa wampu runapiraj tarikunmampis.

¹³ Qhella runaqa achaquesta mask'an mana llank'ananrayku, callepi león kashan, nispa.

¹⁴ Punkoqa pachallampi argollasnimpi muyun; ajinallatataj qhellaqa camallampi muyuykachan.

¹⁵ Qhellaqa chuwaman makinta sat'iykun, manataj siminmanqa qayllaykuchiyllatapis atinchu.

¹⁶ Qhella runaqa may yachayniyoj kasqanta yuyakun, qanchis yuyaychaj runasmanta astawan.

¹⁷ Waj runaspa quejasninman churakoyqa, alqoj ningrinmantapis jap'iykukusunman jina.

¹⁸ Imaynatachus uj uman muyusqa runa, wañuchej jina flechasta choqan;

¹⁹ ajinallataj kausaqenta ch'aukiyajqa, chaymantataj nin chanzallata ruwasqanta.

²⁰ Mana llant'ayoj ninaqa wañupun; ajinallatataj mana cuento apaykuna kajtenqa phiñanakuykuna tukukapun.

²¹ Nina brasasta k'ajachinapajqa, carbón kanan tiyan; nina kanampajtaj llant'a kanan tiyan; ch'atanakuta tarichinampajtaj, ch'ampanachej runa kanan tiyan.

²² Cuento apaykunaqa misk'i jina, ukhukamataj chayaykun.

²³ T'uru manka jawisqaman, rijch'akun sajra yuyaymanta jamoj palabrasqa.

²⁴ Pichus chejnikojqa parlashaspa manapis pipaj rimashanmanchu jinaman tukun; sonqompitaj sajrata ruwaykuna wakichisqa kashan.

²⁵ Ama qanqa creeychu sichus k'achamanta parlasunki chayqa, imaraykuchus sonqompeqa sajra yuyaykunawan junt'a kashan.

²⁶ Chejnikuyninta pakashajtimpis, chay sajra ruwaynenqa tukuypa ñaupaqempi sut'inchakonqapuni.

²⁷ Jusk'uta allajqa chayllamantaj urmaykun; jatun rumita tanqajqa, chayllawantaj p'altachikonqa.

²⁸ Llullaqa cheqa kajta chejnin, misk'i simi ch'ajwata apachimun.