Proverbios 25 - Qheshwa Biblia DC

Salomompa iskay kaj nisqasnin

¹ Kaykunapis Salomompa nisqasnin: Chaykunataqa Judáj reynin, Ezequiaspa kamachisnin wajman thallerqanku.

² Diospajqa allimpuni pakasqa imas kananqa, reyespajtaj sumaj chay imasmanta unanchayqa.

³ Cieloman pata kasqanqa. jallp'apis may ukhu kasqanqa, reyespa yuyayninkupis imaynachus kasqanqa, chaykunaqa mana unanchay atina kanku.

⁴ Qolqemanta ch'ichi imasninta t'aqay, pichus unuyachispa ruwajtaj uj copata ruwanqa.

⁵ Reypa kamachisninmanta sajra runata t'aqay, kamachisnintaj sumaj ruwaywan cheqan kanqa.

⁶ Reypa ñaupaqempeqa ama sumaj sumajman tukuychu; nitaj sumaj runaspa tiyananman tiyaychu.

⁷ Walej kanman chayman wicharinaykita nisunanku, chay kuraj runaspa ñaupaqempi k'umuykachachisunankumantaqa. Imatachus ñawisniykiwan rikusqaykitaqa,

⁸ ama chay ratopacha cheqanchaj runaman willamuychu; pajtataj waj uyanchaspa llullapi rikhurichisunkiman; jinamanta qanqa manaña imatapis ruwayta atiwajchu.

⁹ Pichus ch'ataykusunki chaymanta jark'akuy, amataj wajpa pakasqa imasninta sut'inchaychu;

¹⁰ Jinamanta pipis uyarisunkiman, p'enqaypitaj rikhurichisunkiman, chay mana allin mentasqa kasqaykimantataj mana llojsiyta atiwajchu.

¹¹ Maychus tiempompi uj palabrata nisqaqa qolqewan t'ikanchasqa qori manzana jina.

¹² Qori sorteja jina, sumaj qorimanta walqa jinataj, yachaywan k'amisqata pichus jap'ikojpajqa.

¹³ Sumaj q'oñiy ruwamushajtin chiri wayra wayrarimojtenqa may sumaj; ajinallataj sumaj kaj kamacheqa kachajnimpajqa, jinamanta payqa kachajninta kusichin.

¹⁴ Phuyuwan wayrallawan, manataj paramunchu, ajinallataj alabakoj runaqa, nitaj imatapis qoyta yachanchu chayqa.

¹⁵ Pacienciaqa phiñakuyta thasnun, llamp'u palabrasqa k'ullukushajta llamp'uyachin.

¹⁶ Misk'ita tarinki chayqa, maychus atisqallaykita mikhuy, pajtataj sajsaykuytawan wijch'umushawaj.

¹⁷ Kausaqeykita watukunki chayqa, ama sapa kuteqa rinkichu; jinamanta qanwan amichikunman, chejnisunkimantaj.

¹⁸ Runa masimpa contranta qhasimanta sut'inchajqa, rijch'akun: martilloman, cuchilloman, sumaj puntayoj flechamantaj.

¹⁹ Llakiypi uj wasanchajman atienekoyqa, uj chaki p'akisqapis purisunman jina, chayri uj kiru p'akisqawampis mikhusunman jina.

²⁰ Llakisqapaj takipoyqa ninakun aycha llik'isqamampis vinagreta jich'aykusunman jina, chayri sinch'ita chirimushajtimpis p'achata lluch'ukusunman jina.

²¹ Sichus enemigoyki yarqhasqa kashan chayqa, mikhunata jaywariy; sichus ch'akichikun chayqa, yakuta jaywariy.

²² Ajinamanta chay phiñakoj uyantaqa nina brasaswan jina p'enqaypi k'ajarichinki; Señortaj chay jinata ruwasqaykimantaqa yapasqata qopusonqa.

²³ Pata ladomanta wayramojtin paraqa chayamun; ajinallataj sajra parlaykuna kajtin phiñasqa uya rikhurin.

²⁴ Aswan allin wasi patapi uj k'uchitupi tiyakunaqa, uj jatun wasipi maqanakuta mask'aj warmiwan tiyakunamanta nisqaqa.

²⁵ Uj sayk'asqa k'ajashaj mallq'ata qhasa yaku thasnun; ajinallataj sumaj willaykunaqa karu jallp'asmanta chayamojkunata.

²⁶ Juturimanta qhonchuchasqa yaku llojsimun jina, uj mana juchayoj runaqa juchasapaj ñaupaqempi kharkatejqa.

²⁷ Ancha ashkha misk'ita mikhunaqa mana allinchu, ancha jatun kajta mask'ayqa, runapaj allinmin.

²⁸ Imaynachus uj mana perqayoj llajta, pillapis yaykunampaj jinalla; ajinallataj pichus phiñakuyninta mana ñit'iykojqa.