Proverbios 23 - Qheshwa Biblia DC

- 6 -

¹ Uj allin rejsisqa wiraqochi wajyasunki paywan mikhunaykipaj chayqa, sumajta umachakuy pejpa ñaupaqempichus kashasqaykita.

² Sinch'ita yarqhashasojtimpis, yarqhayniykita wataykuriy.

³ Ama munapayaychu sumaj kaj mikhunasninta, chaykunaqa mana allin mikhuna kayta atinman.

- 7 -

⁴ Amam anchata kallpakuychu qhapajyanaykimanta, chayllamanta llakikunaykita saqey.

⁵ Allintachus qhawarikuwaj chayqa, qhapajyayqa mana imachu, qhapajyayqa irpa ankas lijrachakuytawan phawaspa ripunku jinalla.

- 8 -

⁶ Ama mich'a runaj mesanmanqa tiyaykuychu, amataj antojakuychu sumaj mikhuykunasninta.

⁷ Imaynatachus sonqompi yuyashan chay kikillantaj payqa, chayrayku payqa wajyasunki mikhunapaj, ujyanapajtaj; manataj imatapis cheqantaqa nisunkichu.

⁸ Chaymantaqa imatachus mikhusqaykita wijch'unki, k'acha palabrasniykeqa qhasillapaj kanqa.

- 9 -

⁹ Ama wampu runa uyarishajtenqa parlaychu; payqa asikusonqa chay yachayniyoj palabrasniykimanta.

- 10 -

¹⁰ Ama ñaupajman suchuchinkichu ñaupa mojonesta, nitaj wajcha runaspa jallp'antapis jap'ikapunkichu.

¹¹ Paykunaj jark'akojninkoqa manchay atiyniyojmin, paykunamanta jark'akuspa qanwan maqanakoj llojsimonqa.

- 11 -

¹² Yachachiykunasta sonqoykipi jap'iy, ningriykitaj sumajta uyarichun yachay palabrasta.

- 12 -

¹³ Wawataqa allintapuni k'amiy, uj mashkhata seq'osqaqa mana wañuchenqachu.

¹⁴ Manachayqa, ajinata seq'ospaqa, infiernomanta ayqechinki.

- 13 -

¹⁵ Wawáy, sichus sonqoykipi yachay tiyan chayqa, noqajtapis sonqoyta kusikullanqataj.

¹⁶ Sonqoyqa mayta kusikonqa, simiyki cheqan imasmanta parlanqa chayqa.

- 14 -

¹⁷ Ama juchasapaspa ruwasqannintaqa munapayaychu; astawanqa Señorta tukuy tiempo manchachikuy.

¹⁸ Jinamanta imatachus yuyasqaykeqa allin renqa, manataj qhasitachu suyanki.

- 15 -

¹⁹ Allinta uyarikuy wawáy, yachakuytaj; allin ñantapunitaj riy.

²⁰ Amapuni machasqaswanqa tantakuychu, nitaj anchakamapuni mikhojkunawampis.

²¹ Allinta machajkunawan, ashkhata oqojkunawanqa wajchayanku, puñuysikispis thanta p'achasniyojman tukunku.

- 16 -

²² Pichus yumasoj tataykitaqa allinta uyariy, mamaykitapis payayajtenqa ama qhesachaychu.

²³ Cheqa kajta jap'eqaypuni, amataj kacharikuychu, yachaymanta, unanchaymanta, yuyaychaymantawanqa.

²⁴ Yuyayniyoj k'acha runaj tatanqa, mayta kusikun jatunchakuntaj.

²⁵ Tataykitawan mamaykitawan kusichiy ari, pichus nacechisojqa kusikuchun.

- 17 -

²⁶ Allintapuni uyariway, wawáy; kausayniyta allinta qhaway.

²⁷ Qhencha warmeqa ukhu laqha pozo jina, uj k'ullku jusk'u jinataj.

²⁸ Chay warmeqa uj suwa jina wateqan, ashkha qharistataj mana allin kausayan churan.

- 18 -

²⁹ Pipajtaj ñak'ariyri? Pipajtaj nanayri? Pitaj quejanakupi waqaypitaj purinri? Pitaj qhasi mana kajmanta nanachisqari? Pejpa ñawisnintaj q'oyusqallari?

³⁰ Chayqa pischus vinota mana saqejkunapaj, waj mosoj ujyanasta mask'ajkunapaj.

³¹ Ama vinotaqa qhawaychu, imaynatachus pukayarisqanta, copapi lliphirisqanta, imayna misk'itachus mallq'aykita yaykurisqanta ima.

³² Ujyaykusqanmantari, katari jina khanin, nanachintaj.

³³ Ñawiykeqa waj jinasta qhawanqa, kayta jaqaytataj thautinki.

³⁴ Mar qochapi purishasqaykita jina yuyakunki, buquej jatun k'aspi puntampi jinataj.

³⁵ Chantaqa ninki: Wajtawanku, nitaj nanachiwankuchu; jasut'iwanku, nitaj yuyakunichu; yuyayniyman tukuspari vinota mask'amullanipuni, nispa.