Proverbios 21 - Qheshwa Biblia DC

¹ Reypa yuyaynenqa Señorpa makimpipuni kashan, chayqa larq'a yaku jina purin, Señor imaynatachus munasqanman jina.

² Runamanqa tukuy ima ruwasqampi allinman rijch'an; chaytarí Señorlla qhawan allinchus manachus unanchasqasnin chayta.

³ Cheqanta puriyta, cheqan kajtawanqa ruwaypuni, Señorqa chayta astawan munan uywa ñak'asqasta jaywanamanta nisqaqa.

⁴ Leqhoywan wapuykachaywan, juchasapaspa sajra unanchayninkuwanqa juchas kanku.

⁵ Sumajta wakichispa ruwaykunaqa allimpuni llojsin; usqhayllata wakichisqarí mana allinchu rin.

⁶ Llullakuspalla may jatunta yuyaspa qhapajyayta mask'ayqa, wañuyllata mask'an.

⁷ Juchasapastaqa jucha ruwasqallankutaj chinkachenqa, cheqan kajta mana ruwayta munasqankurayku.

⁸ Sajra runaj ñannenqa mana cheqanchu, nitaj cheqachu; llimphu runaj ruwasqasninrí cheqampuni.

⁹ Aswan allin wasi patapi uj k'uchupi tiyakunaqa, uj jatun wasipi maqanakoj warmiwan tiyakunamantaqa.

¹⁰ Juchasapaqa sajra imasllata ruwayta munan; runa masisnintaqa ni jayk'aj khuyayta munanchu.

¹¹ Uj juchasapa jasut'ichikojta rikuspaqa, pichus mana yachayniyojqa yachaqakun; yuyayniyoj runarí uj willarisqallamanta yachaqakumpacha.

¹² Cheqan kaj Diosqa mana wawasniyojta juchasapataqa saqen, chay sajra runastaqa chinkayman jaywan.

¹³ Pichus wajcha runaspa mañakusqanta mana uyarinchu chayqa, paypa mañakusqampis, manallataj uyarisqachu kanqa.

¹⁴ Pakaypi t'inkata jaywayqa jina sinch'i phiñakuytapis thasnun.

¹⁵ Maypachachus imapis allin cheqanchasqa kajtenqa. cheqanta purej runaqa kusikun; sajra runasmantaj chinkayninku chayamun.

¹⁶ Yachay ñanmanta t'aqakoj runaqa, wañusqaswan khuska sayaj renqa.

¹⁷ Pichus aychampa munayninta ruwaj, vinota ujyaj q'apaj imaswantaj churakoj runaqa, wajchayaypi tukukonqa.

¹⁸ Uj llulla sajra runaqa, allinta purej cheqan runaj ñak'arinanmanta ñak'arenqa.

¹⁹ Ch'in pampapi tiyakunaqa aswan allinraj, uj phiña maqanakuta mask'aj warmiwan tiyakunamanta nisqaqa.

²⁰ Yachayniyojpa wasimpeqa junt'a kashan qhapajyaynin, aceitewan ima; wampu runarí kapuyninta wayrarparichillan.

²¹ Pichus cheqan kayta, khuyakuytawantaj qhatejqa, kausayta, cheqan kayta, allimpaj qhawasqa kaytataj tarenqa.

²² Yachayniyojqa uj sumaj jark'achisqa llajtawan maqanakoj yaykun, urmachintaj, imapichus chay llajta atienekorqa chayta.

²³ Pichus sumajta reparakuspa parlajqa, ni jayk'aj ima llakiymampis yaykunchu.

²⁴ Pichus alqochakoj runaykachajtaqa, machu machu ninku, ajinata ruwasqanrayku.

²⁵ Qhellaqa antojowan wañun, imaraykuchus makisnenqa manaña imatapis ruwayta munanchu.

²⁶ Sapa p'unchay moq'espalla kan, paymanta nisqaqa, cheqan kaj runaqa mana mich'akuspa imatapis qon.

²⁷ Sajra runaspa uywa ñak'asqata jaywasqankuta Señorqa chejnikun, imaraykuchus chaytaqa jaywanku sajra yuyaywan.

²⁸ Llulla sut'inchaj runaqa chinkachisqa kanqa; pichus allinta uyarejrí nisqanta mana q'ewenqachu.

²⁹ Juchasapaqa cheqantapis purishanman jina rikuchin, allinta purej runarí, yachan imaynatachus purisqanta.

³⁰ Señorpa rikuynimpeqa mana yachayqa kanchu, ni sumaj yuyay, nitaj sumaj yuyaychakunaspis.

³¹ Runaqa caballota wakichin maqanakuman rinampaj, chay maqanakupirí, Señorlla atipachin.