Proverbios 20 - Qheshwa Biblia DC

¹ Runataqa vino ch'ajwachin, machachikoj ujyanasqa astawan runata qhollpichin; chaykunawan machasqaqa ni jayk'aj allinta ruwanchu.

² Uj phiñasqa reyqa qhaparishaj león jina. Phiñachejqa kausayninta wañuy pataman churan.

³ Allinmin runapajqa ch'ajwaykunata saqenanqa, ch'ajwaytaqa mayqen wampupis qallarillan.

⁴ Llank'ana tiempo kashajtenqa, qhellalla mana llank'anchu; cosechana tiempo chayamojtintaj, mask'anqa manataj tarenqachu.

⁵ Ukhu yaku qocha jina runaj sonqompi pakasqa yuyaykunaqa; pichus yachayniyojqa chaytaqa taripanqa.

⁶ Ashkha runas ninku sapa ujninku sumaj runas kasqankuta; chaywampis, uj cheqan runataqa, pitaj tarenqari?

⁷ Cheqan runaqa allinta purispa kausakun, wawasninta may kusikuyniyojta qhepaman saqen.

⁸ Reyqa cheqanchanampaj tiyaykukuspa; ujta qhawarispalla tukuy sajra kajta chinkachin.

⁹ Ni pipis niyta atinchu: Noqaqa llimphu sonqoyoj kani, mana ima juchayojtaj nispaqa.

¹⁰ Mana cheqan kaj pesasta, mana cheqan kaj chimpustawan, Señorqa chejnikun.

¹¹ Uj wawapis allinta ruwasqasnimpi rejsichikun, sichus llimphuta, cheqantataj purin chayqa.

¹² Ningreqa uyarinapaj, ñawitaj rikunapaj. Chaykuna Señorpa ruwasqasnin kanku.

¹³ Ama puñuyman qokuychu ama wajchayanaykipaj. Allinta rijch'ariy, amikhunaykitaj ashkha tiyapusonqa.

¹⁴ Uj ranqhero runaqa, rantinankamaqa nin, mana walejchu, nispa; rantispañataj mayta alabakun.

¹⁵ Pichus yachaywan parlajqa, tukuy qorimanta, mundontimpi k'achitu qhoya rumismantapis aswan valorniyojraj.

¹⁶ Mana rejsisqamanta garante sayajmantaqa, p'achanta qhechuspa prendata qhepachiy.

¹⁷ Runapaj llullakoyqa k'acha mikhuy jina, chaymantataj simenqa ch'ajwawan junt'a kanqa.

¹⁸ Unanchaykunaqa allin yuyaykunawan sayayta atin; ch'ajwaqa ruwakun sumaj yachaypi unanchaywan.

¹⁹ Cuenteroqa mana imatapis pakayta yachanchu, ajinaqa ama chay cuenterowanqa puriychu.

²⁰ Pichus tatanta mamantapis maldicejqa, manchay musphay laqhapi wañonqa.

²¹ Qallariypi may apurayllata kapuykunata tarisqaqa, qhepamanqa mana bendicisqachu kanqa.

²² Amapuni jayk'ajpis parlankichu sajramanta aynita kutichiytaqa; Señorman atienekuy, paymin atipachisonqa.

²³ Señorqa chejnikun mana cheqan kaj pesasta, mana cheqan kaj balanzaqa mana allinchu.

²⁴ Señorpatamin runaj puriynenqa; ni pipis yachakunchu payman imaynachus rinanta.

²⁵ Mana walejchu runapaj imatapis Diosman qosaj nisqanqa, chay qhepatataj iskayrayananqa.

²⁶ Yachayniyoj reyqa juchasapasta ayqechin, patankuta ruedawan saruchispataj p'altarqayachin.

²⁷ Runaj espiritonqa Señorpa k'anchaynin; chayqa tukuy ukhu k'uchunkama k'anchan.

²⁸ Reyqa kamachinanmanta mana orqhosqachu kanqa, munakuywanchus, cheqantatajchus ruwan chayqa.

²⁹ Waynakunaj runaykachayninkoqa kallpankumin; machu runaspa k'acha kayninkoqa chujchankoj yurajyaynin.

³⁰ Sajra runapajqa jasut'ej nanachisqasnin jampi, concienciantapis chay jasut'ipuni ch'uyachan.