Proverbios 2 - Qheshwa Biblia DC

Yachayqa imastachus qon

¹ Kay palabrasniytachus uyarinki chayqa, wawáy, umaykipi kamachisqasniyta waqaychay.

² Yachaytaqa uyariy, yachayniyoj kayman yuyayniykita jayway.

³ Tukuy kallpaykiwan mañakuy, yuyayta, sumaj yachaytawan.

⁴ Sichus qolqeta jina mask'awaj, qolqe p'ampasqata jinataj chayqa,

⁵ chaypacha, yachanki Señorta manchachikuna kasqanta, tarinkitaj imaynatachus Diosta manchachikuna kasqanta.

⁶ Señormin qon yachaytaqa; tukuy yachaykuna, sumaj yuyayniyoj kaypis simimanta llojsimun.

⁷ Señormin qon sumaj yachayta cheqanta purejkunaman, mana juchayojkunajtaqa Señormin jark'akojnenqa.

⁸ Señormin cheqan ñanta rejkunataqa waqaychan, Señorpa nisqasninta kasojkunatapis jark'akun.

⁹ Yachallankitaj cheqan kajta, allin kajta, cheqa kajta, tukuy allin ñantapis.

¹⁰ Yuyayniykiman yachay yaykojtin, yachanki yachayqa may jina misk'ichus kasqanta.

¹¹ Tanteajqa allinta qhawasonqa, sumaj yachayniyoj kaypis waqaychasonqa.

¹² Chaykunaqa sajra ñanmanta karunchasonqa, sajrata parlaj runasmantawan.

¹³ Paykuna allin kaj ñanta saqenku, laqha ñankunatataj purinku.

¹⁴ Sajra ruwasqasninkuwan kusikunku, chay sajra mañasninkuwan qhochukunku.

¹⁵ Wist'u ñankunata purinku, ñanninkoqa pantasqa.

¹⁶ Qhencha warmimanta kacharichisqa kanki, sajra warmej misk'i parlasqasninmanta.

¹⁷ Chay warmeqa sipas kashaspa casarakusqan qosanta saqepun, Señorpa ñaupaqempi tratota ruwasqantapis qonqapun.

¹⁸ Chayrayku wasenqa wañuyman urmaykushanña, chay ñan purinasnimpis wañuy patapiña.

¹⁹ Wasinman yaykojkunaqa manaña llojsimunkuchu, manaña jayk'ajpis kausaypa ñannintaqa purenqankuchu.

²⁰ Ajinata qanqa allinta ñanta puriy. Cheqan runaspa ñanninta puriy.

²¹ Cheqanta purejkuna jallp'api tiyakonqanku, mana juchayojkunalla kay jallp'api tiyakonqanku.

²² Juchasapasqa jallp'amanta wijch'usqas kanqanku, sajrata ruwajkunaqa jallp'amanta t'irasqas kanqanku.