Proverbios 17 - Qheshwa Biblia DC

¹ Aswan allinmin chojru t'antata mikhoyqa, kusiypi kausanamantaqa, sapa p'unchay kusiypi fiestaspi, maqanakuspitaj kausanamantaqa.

² Sumaj yuyayniyoj kamacheqa kamachenqa, mana kasukoj wawata; chayaqeyojtaj kanqa chay wayna wauqesninwan khuska.

³ Qoritawan qolqetawanqa nina llimphuchan; runaj yuyaynintataj Señorlla llimphuchan.

⁴ Sajra runawan llulla runawanqa, sajra parlajkunata kasunku.

⁵ Pichus wajcha runamanta alqochakojqa ruwajnin Diospa contranta ruwashan. Pichus wajcha runata kusipayajqa mana jasut'isqaqa mana kanqachu.

⁶ Machu runaspa pillunkoqa allchhisninku; wawaspa kusikuyninkutaj, tatasnin.

⁷ Wampupajqa mana allinchu sumajta parlananqa, nitaj sumajpaj qhawasqa runapis ch'aukiyaywan parlayta atinchu.

⁸ Pichus lluk'iyta yachajqa, yuyakun sumaj atiyniyoj kasqanta, ima ruwaypipis paytaqa allillampuni rin.

⁹ Pichus contrampi ima nisqatapis chinkachejqa, munakuyta mask'an; pichus chaykunata sut'inchajqa, kausaqenta karunchachin.

¹⁰ K'amisqata allimpuni pichus jap'ikojpajqa; wampu runaman pachaj jasut'ista qonamantaqa.

¹¹ Uj phiñarikoj runaqa maqanakuyllata mask'an, chayrayku uj sajra kacha paymanqa kachamusqa kanqa.

¹² Aswan allin kanman uñanta chinkachikoj china jukumariwan tinkunaqa, uj wampu runawan parlanamanta nisqaqa.

¹³ Pichus allin kajmanta sajra kajta qojpa wasinmanta, manapuni sajra kajqa chinkanqachu.

¹⁴ Pichus phiñakuyta qallarejqa, jark'asqa yakutapis kachaykushanman jina; chay phiñakuytaqa saqey manaraj chaypi maniakushaspa.

¹⁵ Pichus juchayojta perdonajta, mana juchayojtataj juchachajtaqa, Señorqa mana rikuyta munanchu.

¹⁶ Imapajtaj wampoqa qolqe oqharisqa yachayta rantej jamunrí, mana yuyaynin kashajtinri?

¹⁷ Uj kausaqeqa tukuy tiempopi khuyakuyniyoj, ima llakiy kajtenqa uj wauqen jina payqa.

¹⁸ Uj mana allin yuyayniyojqa kausaqenmanta garante sayan, paytaj paymanta cuentallikun.

¹⁹ Pichus phiñakuyta munajqa maqanakuyta munampuni; pichus anchata parlajpis urmayninta mask'akun.

²⁰ Sajra yuyayniyojmanqa mana allinchu renqa; pichus qhasi mana kajta thautejpis mana allinman chayanqa.

²¹ Uj wampoj tatan kanaqa uma nanayllata apamun; wampoj tatan kanaqa ni ima kusiyta apamunchu.

²² Sonqo kusisqa kayqa uj sumaj jampi, llakisqa kanarí, kallpata llauch'iyachin.

²³ Sajra runaqa pakaypi lluk'ichikun, cheqan ruwakunan kashajtin q'ewichinampaj.

²⁴ Uj sumaj yuyayniyojpa yachaynimpi yachayqa rikukun, wampu runarí imamampis sat'iykukullampuni.

²⁵ Wampu wawaqa tatasninta mayta llakichin, phiñachintaj.

²⁶ Cheqamanta mana juchayojta juchachanaqa mana allinchu, nitaj wajtanapis atikunchu cheqanta ruwajtaqa.

²⁷ Pisillata parlajqa yachayniyoj; ch'inllataj kakojqa yachayniyojpuni.

²⁸ Wampu runa kashaspapis ch'inlla kakun chayqa, yachayniyojpaj qhawasqa; siminta wisq'an sumaj yachayniyojpis kanman jina, chaypacha.