Proverbios 15 - Qheshwa Biblia DC

¹ K'achamanta kuticheyqa phiñakuyta thasnun; mana allin palabraswan kuticheyqa astawan phiñarichin.

² Yachayniyojkunaj siminmantaqa yachay llojsin; wampuspa siminmantarí, qhasi mana kaj palabraslla.

³ Señorqa tukuynejpi kashan, allin runasta mana allin runastapis qhawaspa.

⁴ K'achamanta parlayqa uj kausay sach'aj; sajra phiña parlayqa sonqo q'asata kacharin.

⁵ Wampu runaqa tatampa reparachisqanta mana jap'ikunchu; pichus kay imasta jap'ejrí, yachayniyoj kasqanta rikuchin.

⁶ Cheqan runaj wasimpi mikhuy junt'a kashan, sajra runajtarí, ganasqampis mana sayayta atinchu.

⁷ Yachayniyojkunaj simenqa yachayta tukuynejman t'akan; wampusqa yuyayninkuwan mana jinatachu ruwanku.

⁸ Señorqa juchasapaspa jaywasqanta millachikun, cheqan runaspa mañakusqankutarí, tukuy sonqo uyarin.

⁹ Sajra runaspa purisqanta Señorqa millachikun; pichus cheqanta kausajtarí munakun.

¹⁰ Pichus cheqan ñanta chejnejtaqa, aswan sinch'itaña k'amina; pichus chay k'amisqata qhesachajqa, wañonqa.

¹¹ Wañuywan, aya p'ampanawanqa Señorpa ñaupaqellampi kashanku; runaj sonqontarí, astawanraj rikuyta atin.

¹² Machu machuykachajqa mana munakunchu pichus k'amejtaqa; nitaj yachayniyojkunawampis tantakunchu.

¹³ Sonqompi kusiy kajtin, uyaqa kusisqa; sonqo llakisqa kajtinrí, uyapis llakisqallataj.

¹⁴ Sumaj yuyayniyoj umaqa yachayta mask'an, wampusrí qhasi yuyaykunallawan sajsakunku.

¹⁵ Pichus llakisqa kajpajqa, sapa p'unchay llakiyllapuni; pichus kusisqa kajpajrí, sapa p'unchay kusiyllapuni.

¹⁶ Aswan allin wajchalla kay, Señortataj manchachikuy; qhapaj kay, llakisqallataj kausanamanta nisqaqa.

¹⁷ Aswan allin q'omerkunata munakuywan mikhunaqa, sumaj aychata phiñasqalla mikhunamantaqa.

¹⁸ Rato phiñakojqa, runata maqanachin, pichus llamp'u sonqoyoj kajtaj, allinyachin.

¹⁹ Qhellaj ñannenqa khishkaswan jark'achisqa, cheqan runaj ñanninrí, sumaj pichasqa ñan jina.

²⁰ Yachayniyoj runaqa tatasninta kusichin; wampu wawarí, tatasninta qhesachan.

²¹ Mana yuyayniyojqa, wampu kayninwan kusikun; yuyayniyoj kajrí, imatachus ruwasqasninta reparakun.

²² Mana pitapis tapurikuypeqa, ima ruwanatapis wakichikusqaqa, mana allinchu rin; allin rinanqa ashkha unanchaykunapi kashan.

²³ Runaqa kusikun imatachus tapukusqanman jina kutichiyta tarispa; allin tiempopiraj kajtintaj astawanraj kusikun.

²⁴ Kausaypa ñannenqa pataman rin, yachayniyojqa wañuymanta ayqechin.

²⁵ Señorqa urmachin runaykachajkunaj wasinkuta; viudaj wasintarí, sumajta sayachin.

²⁶ Señorqa sajra runaspa imatachus ruwasqankuta millachikun; llimphu runaspa parlasqasninkuwan kusikun.

²⁷ Kapushajtin waj imastapis astawan munapayajqa wasillantataj urmachin; pichus lluk'iykuchikuyta qhesachajrí, kausanqa.

²⁸ Cheqan runaqa kutichinampaj sumajtaraj yuyaychakun; machu machu runarí, tukuy sajra kajta parlarpayallan.

²⁹ Sajra runamanta Señorqa karunchakun; cheqan runaspa mañakusqankutarí, tukuy sonqo uyarin.

³⁰ Munakuywan qhawaykachaj ñaweqa sonqota kusichin; sumaj willaykunaqa sumajta kallpachan.

³¹ Pichus allin k'amiykunata jap'ikojqa. yachayniyojkunawan khuska kanqa.

³² Pichus k'amisqasta qhesachajqa, pay kikinta qhesachakun; pichus k'amisqata jap'ikojqa, astawan yachayta jap'in.

³³ Señorta manchachikoyqa yachaypi wiñachin; allimpi qhawasqa kanapajqa, ñaupajta llamp'u sonqo kaytaraj yachana.