Proverbios 14 - Qheshwa Biblia DC

¹ Yachayniyoj warmeqa wasinta sayachin; wampu warmirí makisnillanwantaj urmachin.

² Cheqanta purejqa Señorta jatunchan, mana allinta purejrí qhesachan.

³ Wampoj wasimpi kashan machu machuykachaylla; yachayniyojpa simenqa waqaychan.

⁴ Mana llank'aj bueyes kajtenqa pirwapi trigo mana kanchu; llank'aj bueyespa kallpanwan cosecha yapakun.

⁵ Cheqanta sut'inchajqa mana llullakunchu; llulla sut'inchajrí llullallata parlan.

⁶ Machu machoqa yachayta mask'an manataj tarinchu; yachayniyoj runarí yachallan.

⁷ Wampu runamanta t'aqakuy, paypa siminmantaqa mana ima yachaytapis jap'iwajchu.

⁸ Yachayqa yachayniyojman yachachin imaynatachus purinanta; wampu runarí pay kikillantataj ch'aukiyakun.

⁹ Wampusqa juchankumanta alqochakunku, cheqan runaspa chaupimpeqa allin yuyay tiyan.

¹⁰ Sonqoqa llakiykunasninta rejsin, manataj pi mana rejsisqanwampis kusikunchu.

¹¹ Sajra runaspa wasisnenqa urmachisqa kanqa, allin runaspa wasinkurí sayallanqapuni.

¹² Ñankunas tiyan, runaspajqa cheqanman rijch'akunku; chay ñankunaj tukuyninkupirí wañuylla kashan.

¹³ Asispapis sonqoqa nanachikun, jinamanta asiypa tukuynenqa waqay kashan.

¹⁴ Wampu runaqa imaynatachus purisqanwan amisqa kashan; allin runarí ruwasqasninmanta kusikonqa.

¹⁵ Uj wampu runaqa tukuy nisqankuta jap'ikullan; yuyayniyoj runarí allintaraj qhawakun maynintachus rinanta.

¹⁶ Yachayniyojqa manchachikun, sajramantataj t'aqakun; wampurí may kasqanta yuyakun, chay imaspitaj atienekun.

¹⁷ Rato phiñakuyniyojqa imatapis ruwallan mana unanchaspa. pichus unanchajqa mana imamampis yaykullanchu.

¹⁸ Mana yuyayniyojkunaj chayaqenqa wampu kaymin; yuyayniyojkunaqa yachaywan pillusqas kanku.

¹⁹ Sajra runasqa allin runasman k'umuykonqanku; sajra runasqa cheqan runaspa wasin punkuman mañakoj renqanku.

²⁰ Wajcha runata kikin kausaqesnillantaj chejnin, qhapaj runajtarí ashkha kausaqesnin tiyan.

²¹ Pichus runa masinta chejnejqa juchallikun; wajchasta khuyakojkunarí kusikuyniyoj kanku.

²² Pikunachus sajra ruwanasta mask'ajkunaqa allin ñanta chinkachinku; allin kajta ruwajkunataj cheqan kajta khuyakuytataj tarenqanku.

²³ Tukuy sonqo ruwasqaqa allimpuni; ashkhata parlaypeqa wajchayaylla tiyan.

²⁴ Yachayniyoj runaj pillonqa sumaj yuyayniyoj kaymin; wampu runaspatarí wampuykachaynillan.

²⁵ Cheqamanta sut'inchaj runaqa wajkunaj kausaynintapis libran; llulla sut'inchaj runarí llullallata parlan.

²⁶ Señorta manchachikuypeqa sumaj yuyay tiyan. Wawasnimpis chayta suyanqanku.

²⁷ Señorta jatunchayqa kausaypa juturin, wañuypa tojllanmanta orqhon.

²⁸ Ashkha runasta kamachejtin reyqa allimpaj qhawasqa; pisi runasllata kamachejtinrí mana allimpaj qhawasqachu.

²⁹ Pichus mana usqhayta phiñakojqa yachayniyoj. Pichus usqhayta phiñakojqa ancha wampu.

³⁰ Llamp'u sonqo kayqa runaj ukhumpa kausaynin; wajpa imasninta munapayayrí tullukama ismuchej onqoy jina.

³¹ Wajcha runasta ñak'arichejqa, ruwajnimpa contranta juchallin. Wajcha runasta khuyakojrí ruwajnin Señorta jatunchan.

³² Juchasapataqa sajra ruwasqallantaj urmachin; allin runatarí cheqan kaynin jark'an.

³³ Allin yuyayniyojpa umampi, yachayqa kashan; wampu runaspa chaupimpirí, chayqa mana yachakullampischu.

³⁴ Cheqan kajqa uj nacionta pataman oqharin; jucharí chay nacionesta p'enqaypi qhawachin.

³⁵ Sumaj yuyayniyoj kamacheqa reyninwan munachikun; mana allin kaj kamachirí phiñapayachikuyllata tarin.