Proverbios 13 - Qheshwa Biblia DC

¹ Yachayniyoj waynaqa tatampa yuyaychasqanta jap'ikun; machu machu kajrí chaykunataqa mana uyarinchu.

² Runaqa palabrasnimpa poqoyninta jap'enqa; wasallamanta ruwajkunaj kausayninrí, chejninakuylla kanqa.

³ Palabrasninta mana kacharejqa, pay kikimpaj allinta ruwan, anchata palabrasninta kacharejqa, payllataj p'enqaypi rikhurenqa.

⁴ Qhellaqa munan manataj tarinchu; pichus llank'ajqa qhapajyanqa.

⁵ Cheqan runaqa llullakuyta chejnin; sajra runarí chejnisqa, p'enqaypitaj rikhurin.

⁶ Cheqanta pureyqa mana juchayoj runamanta jark'akun; sajra kajqa juchasapata chinachin.

⁷ Wakenqa mana imankupis kashajtin qhapaj qhapajman tukuykachanku; wakintaj tukuy imankupis kashajtin, wajcha wajchaman rijch'akunku.

⁸ Qhapaj runaj kapuynenqa kausayninta allinman orqhon; wajcharí mana manchachikunchu imanta qhechunankutapis.

⁹ Cheqan runaspa k'anchaynenqa sumajta k'anchanqa, sajra runaspa k'anchayninkurí wañuponqa.

¹⁰ Runaykachayqa maqanarachillan; yachaytaj llamp'u sonqoyojkunapi kashan.

¹¹ Qhasillamanta kapuykunaqa wajwallilla; pichus pisimanta pisi tantan chayqa, ashkhayachenqa.

¹² Imatapis suyasqaqa mana junt'akojtenqa sonqoqa llakisqa qhepakun; ima munasqapis junt'akojtenqa, uj kausay sach'a jina.

¹³ Pichus kamachisqasta mana kasojqa waqanqa; pichus kamachisqasta kasojrí, t'inkachisqa kanqa.

¹⁴ Yachayniyojpa yachachisqanqa kausaypa juturin, wañuypa tojllasninmanta orqhon.

¹⁵ Allin yuyayniyojqa tukuywan munachikun; mana kasokojkunarí mana allinman urmanku.

¹⁶ Yuyayniyoj runaqa yachayninwan imatapis ruwan; wampu runataj wampu kayninmanta jatunchakun.

¹⁷ Mana allin kacha runaqa llakiykunaman chayachin; allin k'acha runarí sonqo kausayta apamun.

¹⁸ Pichus allin yuyaychasqata qhesachajpajqa wajchayaylla, p'enqaytaj kanqa; pichus yuyaychasqasta jap'ikojrí allimpaj qhawasqa kanqa.

¹⁹ Ima munasqapis junt'akojtenqa may kusiy. Wampu runasqa sajra ruwaymanta t'aqakuyta chejninku.

²⁰ Yachayniyojkunawan tantakuy, yachayniyojkunamantataj yachaqanki. Wampu runaswan tantakuypi chayri mana allinman chayanki.

²¹ Juchasapasqa sajra imaspa qhatiykachasqan kanku; cheqan runastaj allin kajwan t'inkachisqas kanku.

²² Allin kaj runaqa allchhisninman chayaqesta saqen. Juchasapaj kapuynintajrí cheqan runaspaj qhepakonqa.

²³ Wajcha runaj tarpusqanmantaqa ashkha runas mikhunku. maypichus mana allin ruway tiyan chaypeqa ancha wajwallilla.

²⁴ Pichus wawanta mana k'amejqa mana munakunchu; pichus munakojqa juch'uymantapacha k'amin.

²⁵ Cheqan runaqa sajsakunankama mikhun, juchasaparí yarqhasqallapuni kashan.