Proverbios 12 - Qheshwa Biblia DC

¹ K'amisqata munakoyqa yachayta munakuymin; k'amisqata chejniyrí mana ima yachayniyoj wampu kaymin.

² Allin runaqa Señorpa khuyakuyninta jap'in, mana allin yuyayniyoj sajra runatarí Dios astawan juchachanqa.

³ Sajra ruwayqa mana pitapis allinta sayachinchu; cheqan runasrí unaypaj sumaj saphinchasqas kanku.

⁴ Sumaj warmeqa qosampa pillun jina; mana sumaj warmirí tullu ismuy jina.

⁵ Cheqan runasqa cheqan imaspipuni yuyanku; sajra runastaj, ch'aukiyayllapi yuyanku.

⁶ Sajra runaj palabrasnenqa wañuypa tojlla churasqan jina kanku; cheqan runaspa palabrasninrí chay imasmanta ayqechin.

⁷ Juchasapastaqa Dios urmachenqa amaña astawan kanankupaj; cheqan runaspa wasinrí sayallanqapuni mana imanasqa.

⁸ Uj runaqa yachayniyoj kasqanman jina munachikun; uj wampu runarí chejnichikuyllata tarin.

⁹ Aswan allinmin qhesachasqa kay, chaywampis kamachisniyoj aswan jatumpaj qhawasqa mana mikhunayoj runamanta nisqaqa.

¹⁰ Cheqan runaqa uywasninta allinta qhawan, sajra runarí uywasninta mana khuyanchu.

¹¹ Pichus jallp'anta llank'ajpataqa ashkha mikhunasnin tiyapun; puriskirispa qhepanta purejrí wampu runa.

¹² Sajra imasta munapayajkunaqa sajra runaspa jarap'aynin; cheqan runaspa saphinrí sumajta sayanqa.

¹³ Sajra runaqa kikin llullakusqallampitaj maniakun; cheqan runarí chay tukuy ñak'ariymanta llojsin.

¹⁴ Sapa uj jap'inku parlasqankuman jina; ruwasqankuman jinataj t'inkataqa jap'enqanku.

¹⁵ Wampoqa yuyan tukuy ima ruwasqasnimpis allillan kasqanta; yuyayniyoj runarí uyarin tukuy yuyaychaykunasta.

¹⁶ Wampoqa phiñakuyninta rikuchimpacha; Sumaj yuyayniyoj runari mana kasuta ruwanchu contrampi kajtimpis.

¹⁷ Cheqanta parlaj runaqa sut'inta sut'inchan; uj llulla runarí llullarikuspa nin jina kasqanta.

¹⁸ Wakimpa palabrasnenqa espada jina t'ojsin; yachayniyojkunaj palabrasninrí sonqota qhallallachin.

¹⁹ Pichus kasqanta parlajqa wiñaypaj sayanqa, llulla runarí uj ratollata sayanqa.

²⁰ Sajra runaspa wakichikusqankupeqa llullakuylla tiyan; sonqo tiyasqa runaj palabrasnimpirí, kusiy kausay tiyan.

²¹ Cheqan runamanqa ni ima sajrapis chayanqachu, sajra runarí tukuy ima sajra kajllata jap'enqa.

²² Señorqa llullasta chejnikun; pichus cheqata imatapis ruwajtarí, k'acha munakuywan qhawan.

²³ Yachayniyoj runaqa yachayniyoj kasqanwanqa mana runaykachanchu. Wampu runarí sut'ita rikuchin wampu kayninta.

²⁴ Pichus llank'ajqa tukuy imata atipan; qhella kajrí tukuy imapi atipasqa.

²⁵ Llakeyqa runata mana allinman tukuchin; misk'i palabrasrí kusichin.

²⁶ Cheqan runaqa runa masinta allinman pusan; sajra runasrí chay ñantaqa chinkachinku.

²⁷ Monte animalesta jap'imoj qhella runaqa mana aychayoj rikhurin; uj yuyayniyoj k'uchi runarí ashkha kapuyniyojman tukun.

²⁸ Cheqa kaj ñanqa kausayman pusan; mana yuyayniyoj kayrí wañuyllaman pusan.