Proverbios 11 - Qheshwa Biblia DC

¹ Señorqa chejnikun mana cheqan kaj pesasta, cheqan pesastarí munakun.

² Jatunchakoyqa mana allimpi qhawasqa kayta apamun; yachaytajrí llamp'u sonqoyojkunapi kashan.

³ Cheqanta purej runataqa cheqan kaynin pusaykachan; llulla runastarí mana allin kayninku chinkachin.

⁴ Juicio p'unchaypeqa ni imapaj allinchu kanqa qhapajyayninkoqa; cheqan kayrí wañuymanta ayqechenqa.

⁵ Cheqanta ruwayqa cheqan runaj ñanninta cheqanchanqa; sajra runarí mana allinta purisqallampitaj misk'anqa.

⁶ Cheqan runastaqa cheqanta ruwasqallankutaj libran; juchasapastarí, juchallankutaj ch'ipaykun.

⁷ Sajra runa wañojtenqa, paywan khuskallataj wañun, suyaynin, imatachus jatunta yuyasqasnimpiwan.

⁸ Cheqan puriyniyoj runaqa ñak'ariymantapis ayqechisqa; chay ñak'ariyninmantaj juchasapa runa yaykun.

⁹ Sajra runaj palabrasnenqa runa masinta urmachin; cheqan runaj yachaynenqa salvan.

¹⁰ Cheqan runaspa allin ruwaynenqa llajta runasta kusichin; sajra runas wañojtinkoqa kusiywan phinkiykachanku.

¹¹ Cheqan runaspa bendicionninwan llajtaqa oqharikun; sajra runaspa parlasqankuwanrí llajtaqa chinkapun.

¹² Uj wampu runaqa runa masimpaj sajrata riman; uj yuyayniyoj runarí ch'inlla kakun.

¹³ Uj cuento q'epeqa uj mana parlana kajtapis sut'inchallan; allin yuyayniyoj kajrí chaykunastaqa waqaychan.

¹⁴ Maypichus mana allin kamachiy kanchu, chay llajtaqa urman; maypichus ashkha yuyaychajkuna kanku chaypirí, tukuy ima allin rin.

¹⁵ Mana rejsisqamanta garante sayajtaqa mana allinchu rin; pichus garante kayta mana uyariyta munajqa kusisqa tiyakun.

¹⁶ Uj k'acha warmeqa allimpaj qhawasqa, uj sumaj yuyayniyoj qhareqa qhapajyayta tarin.

¹⁷ Pichus khuyakuyniyojqa pay kikimpaj allinta ruwakun; phiña sajra runarí pay kikillampajtaj ima sajratapis ruwakun.

¹⁸ Juchasapa runaqa uj ch'aukiyay pagota jap'in; pichis cheqan kajta ruwajqa sumaj t'inkata jap'enqa.

¹⁹ Cheqan kajpa qhepanta pureyqa, kausayman pusan; juchaj qhepanta puriyrí wañuyman pusan.

²⁰ Señorqa chejnikun sajra yuyayniyojkunata, allinta purejkunatarí, sumaj munakuywan qhawan.

²¹ Cheqamanta sajra runaqa jasut'isqapuni kanqa; cheqanta ruwajkunarí mana jasut'isqachu kanqanku.

²² Imaynachus uj qori sorteja khuchej senqampi churasqa, ajina uj k'achita warmi pisi yuyayniyojqa.

²³ Cheqan runaspa yuyasqanqa allimpuni, juchasapaspa k'ullukusqankurí phiñakuyllata apamun.

²⁴ Pichus mana mich'akuspa qojkunamanqa imapis astawan yapakun; pichus mich'akojpajtaj imapis tukukojlla, wajchayayllataj.

²⁵ Pichus mana mich'akuspa qojqa tukuy imayojman tukun; pichus sajsachejqa, sajsachisqallataj kanqa.

²⁶ Pichus tukuyninta trigota jap'ikapojtaqa runa maldicin, pichus vendejtarí bendicin.

²⁷ Pichus cheqan kajpa qhepanta purejta allimpaj qhawasqa; juchaj qhepanta purejmanrí mana allinchu renqa.

²⁸ Pichus kapuynimpi atienekojqa, ch'aki laqhe jina urmanqa; cheqanta ruwajkunarí q'omeryarenqanku sach'a ramas jina.

²⁹ Pichus wasinta mana allinta qhawajpataqa, ch'usajpacha qhepakun; wampu runarí yachayniyojpa wata runallampuni kanqa.

³⁰ Cheqan runaj poqoynenqa kausay sach'aj poqoynin; pichus almasta ganajqa yachayniyoj runamin.

³¹ Sichus kay jallp'a patapi cheqan runaqa jasut'isqaraj chayqa, sajrawan juchasapaswanqa astawanraj jasut'isqas kanqanku.