Proverbios 10 - Qheshwa Biblia DC

Salomompaj ñaupaj kaj nisqasnin

¹ Salomompa nisqasnin: Yachayniyoj wawaqa tatanta kusichin, mana yuyayniyoj wawataj mamanta llakichin.

² Mana allinmanta qhapajyayqa mana allimpajchu. Cheqan kaytaj wañuymanta llusp'ichin.

³ Señorqa pichus allin kajta mana yarqhachinchu, sajra runatataj munasqanta ruwajta mana saqenchu.

⁴ Pisita llank'ayqa wajchayaylla; ashkhata llank'aytaj qhapajyay.

⁵ Cosecha tiempopi cosechajqa yachayniyoj, cosecha tiempopi puñoyqa p'enqay.

⁶ Cheqan runaj patanmanqa bendiciones urmamun, sajra runatari chejnikuylla jeq'eqachin.

⁷ Allin runapajqa bendiciones yuyarisqa, sajra runamantataj usqhayllata qonqapunku.

⁸ Yachayniyoj runaqa kamachisqasta kasun, wampu runarí kikimpi urmanqa.

⁹ Pichus allinta purejqa ni imamanta manchachikunchu; pichus sajrata ruwajqa, sajrallapitaj tukukonqa.

¹⁰ Ñawillanwan ch'irmej runaqa ashkha llakiykunata apamuyta atin; pichus mana kajta thautejqa, chay thautisqasnillampitaj urmanqa.

¹¹ Cheqan runaspa parlasqanqa kusiy kausay, sajra runaspa parlasqanrí chejninakuywan jeq'eqaylla.

¹² Chejnikoyqa phiñakuyta apamun; munakuyrí perdonan tukuy pantasqasta.

¹³ Yachayniyojpa qallumpeqa yachay tiyan; mana allinta purejpa wasanmanqa garrotellaña chayan.

¹⁴ Yachayniyojkunaqa yachayniyoj kasqankuta mana alabakunkuchu. wampuspa parlasqankurí wañuyman urmay patapi kashan.

¹⁵ Qhapaj runaj kapuynenqa pakakunan llajtamin; wajcha runaj ñak'ariyninrí, wajcha kaynin.

¹⁶ Cheqan runaj t'inkanqa kausaymin; sajra runaj cosechanrí, juchalla.

¹⁷ K'amisqata kasukoj runaqa kausay ñanta purin; k'amisqata mana kasukojrí, chinkay ñanta rin.

¹⁸ Chejninakuyta pakayqa llullamin; qhasimanta sajra parlaykunata junt'achiytaj wampumin.

¹⁹ Ashkhata parlaykunapeqa pantaykunas tiyampuni; pichus palabrasninta mana kacharejqa sumaj yuyayniyoj.

²⁰ Cheqan runaj palabranqa sumaj ch'uwachasqa qolqe jina; sajra runaj sajra yuyayninri, ni imapaj allinchu.

²¹ Cheqan runaj palabrasnenqa ashkhasman yachachin; wampu runasrí mana allinta ruwasqasninrayku wañunku.

²² Señorpa bendicionnenqa qhapajyaymin, ni ima llakiypis chay bendiciompeqa jamunchu.

²³ Wampu runaqa sajra ruwasqasninwampuni kusikun; yachayniyoj runarí, yachayniyoj kasqanwan kusikun.

²⁴ Sajra runaqa, imatachus manchachikun chaymampuni chayan; cheqan runapajrí imatachus ruwayta yuyasqanqa junt'akumpuni.

²⁵ Imaynatachus muyoj wayra chinkarin, ajinata sajra runaqa chinkarin; cheqan runarí kikimpipuni wiñaypaj sayan.

²⁶ Imaynachus vinagreqa kiruspaj, q'osñitaj ñawispaj, ajinallataj qhella runaqa kachajnimpaj.

²⁷ Señorta manchachikoyqa unayta kausakuymin; sajra runaspa kausayninku p'unchaykunarí pisiyachisqas kanqanku.

²⁸ Cheqan runaspa suyaynenqa kusikuy jamushan; sajra runaspa suyayninrí tukukaponqa.

²⁹ Señorqa allinta ruwajkunata waqaychan; mana allinta ruwajkunatataj chinkachin.

³⁰ Cheqan runaqa ni jayk'aj kuyuchisqachu kanqa. Sajra runarí ni jayk'aj jallp'api tiyanqachu.

³¹ Cheqan runaspa siminmantaqa yachay llojsimun; sajra runaspa qallonqa khuchusqa kanqa.

³² Cheqan runasqa sumaj imasta parlanku; sajra runasrí sajra imasllata parlanku.