Proverbios 1 - Qheshwa Biblia DC

Yachayniyoj Salomompa nisqasnin

^1-2 Israelpa reynin Davidpa wawan Salomompa nisqasnenqa, kanku: Yachayta jap'eqanapaj, yachachiykunatawan, sumaj parlaykunas imatachus niyta munasqanta allinta yachanapaj.

³ Allin yuyaychaykunata, cheqanchayta, cheqanta kausayta, uj rejta ruwayta ima jap'eqanapaj;

⁴ llamp'u sonqoyojkunaman umayoj kayta yachachinapaj, waynasman yachayta rikuchinapaj, reparachinapajtaj.

⁵ Yachayniyojlla uyarispa astawan yachayta jap'in, yuyayniyojqa astawan yachanqa;

⁶ yachayniyojkunaj nisqankuta umallikunapaj, parlasqasninkumanta, ruwasqasninkumanta, imasmantachus tapusqankumantawan.

⁷ Yachaypa qallarikuynenqa, Señorta manchachikuymin; wampu runasqa qhesachanku yachayta, yachachiytawan.

Wayna runaman yuyaychaykunas

⁸ Tataykej yachachiyninta uyariy wawáy, ama qonqapuychu mamaykej yachachisusqantapis.

⁹ Chay yachayqa umaykipaj uj k'achanchay jina kapusonqa, uj walqa jina, chayri uj k'acha pillu jina.

¹⁰ Sichus juchasapas ch'aukiyayta munasunku chayqa, ama ch'aukiyachikuychu, wawáy.

¹¹ Ichapis nisonqanku: Noqaykuwan jaku rinachej; tojllata churanachej mana juchayojta chaypi wañuchinapaj.

¹² Mana juchayoj runasta kausashajllata oqoykunachej, wañuy oqoykun pichus sepulturaman rejtin ajina.

¹³ Ajinamanta tarisunchej tukuy laya kapuykunata, chay tukuy suwasqaswan wasisninchejman junt'aykuchisunchej.

¹⁴ Noqaykuwan suerteyki kachun; noqaykuwan uj qolqe ch'uspayojlla kanachej, nispa.

¹⁵ Paykunawanqa amapuni purinkichu, wawáy, chay sajra ñanninkumanta karunchakuy.

¹⁶ Chay sajra imasmanqa chakisninku usqhayllata thaskirin, yawarta jich'anapajqa may k'uchis kanku.

¹⁷ P'isqos rikunanta tojllata churanaqa mana allinchu.

¹⁸ Chay runasqa misk'anata paykunallapajtaj churakunku, kausayninkuta chinkachinallankupajtaj chay imasta ruwanku.

¹⁹ Chaymin wajpa imasninta munapayajkunaj tukukuyninkoqa, imatachus munasqallankuwantaj wañuchisqas kanqanku.

Yachaypa wajyaynin

²⁰ Yachayqa qhaparikun callespi, plazaspi.

²¹ Yachayqa parlasqasninwan uyarichikun maykunaspichus runas k'iski purishanku chaykunapi; llajta punkuspi imatachus niyta munasqanta sut'inchan.

²² Mana ima yachajkuna, mayk'ajkamataj mana ima yachajllapuni kankichejri? Mayk'ajkamataj alqochakullankichejpuniri? Wampus, mayk'ajkamataj yachaytaqa chejninkichejri?

²³ Uyariwaychej k'amisqasniyta, noqa yachaywan junt'achisqaykichej, imatachus yuyasqasniyta rejsichisqaykichej.

²⁴ Noqa wajyamorqaykichej, qankunataj mana uyariyta munarqankichejchu; makiyta jaywamorqaykichej, qankunataj mana rikoj tukuwarqankichej.

²⁵ Imatachus yuyaychasqasniyta qhesachawankichej, imatachus k'amisqasniyta mana uyariwankichejchu.

²⁶ Noqapis asikullasajtaj ima llakiychá chayamusojtiykichej; chantá asipayallasqaykichejtaj manchachikuywan kharkatishajtiykichej,

²⁷ mayk'ajchus manchachikuykuna, manchay waqay, llakiykuna ima jamusojtiykichej, mayk'ajchus sonqo nanayta phutichisojtiykichej, muyoj wayra t'ustiykun ajinata.

²⁸ Chaypacha wajyamuwankichej, manataj uyarisqaykichejchu; mask'awankichej, manataj tariwankichejchu.

²⁹ Qankuna yachayta qhesakasqaykichejrayku, Señorta yupaychayta mana munankichejchu.

³⁰ Mana imatachus nisqasniyta jap'iyta munankichejchu, k'amisqasniytapis qhesachankichej.

³¹ Mana kasukusqaykichejrayku ñak'arinkichej, sajra ruwayta yuyasqaykichejwan amichikunkichej.

³² Mana ima yachajman tukusqaykichej wañuchisonqachej. Wampu runaqa sajra ruwasqallankuwantaj chinkachisqas kanqanku.

³³ Pichus noqata uyariwajqa may kusisqa tiyakonqa, ni ima sajramanta manchachikuspa.