Oseas 8 - Qheshwa Biblia DC

Lantista yupaychasqanrayku Israel condenasqa kanqa

¹ Waqachiy pututusniykita, imaynatachus uj qhawajqa Señorpa ayllunta mana puñuspa qhawan jinata, imaraykuchus noqawan tratonkuta p'akinku.

² Chaykamataj jamuwanku noqaman qhaparispa: Qanta rejsikapuyku Israelpa Diosnimpaj jina!, nispa.

³ Jinapis Israelqa allin kajta qhesachan, chayraykutaj enemigosnin payta qhatiykonqanku jap'inankupaj.

⁴ Mana noqallawan reykunata churarqokunku. Kuraj kamachejkunasninkutapis mana yachasqallay churarqokunku. Qolqesninkuta qorisninkutapis oqharerqanku lantikunata ruwanankupaj, jinamanta paykuna kikinkuta phirikuspa.

^5-6 Qan, Samaria, chay yupaychasqayki waka uñata millachikuni. Phiñakuyniy k'ajarin paypa contrampi. May unaypirajchus llimphuchakuyta atenqankupis, israelitasqa ari? Samariaqa, chay waka uñaqa mana Dioschu! Chayqa uj runaj makisnillanmanta llojserqa; chayraykumin phirisqa kanqa.

⁷ Paykunaqa wayrasta tarporqanku, oqharerqankutaj sinch'i muyoj wayrata. Mana kanqachu cosechanankupaj jina chajrasninkupis nitaj jak'utapis orqhoyta atenqankuchu trigoj espigasninmanta; sichus orqhonkuman chaypis waj llajtasniyojlla mikhukaponqanku.

⁸ Israelqa oqoykuchikorqa! Waj llajtayojkunataj qhawanku mana uj chhika kallpayojta jina,

⁹ Asiriaman wicharisqankurayku uj qhella monte burro jina. Efrainrí t'inkasta aparqa munasqasninta tarinampaj!

¹⁰ Jinapis chay llajtas ukhupi t'inkasta rak'irachun. Kunan noqa paykunata ch'eqerachisajpuni, jinamanta uj tiempotaqa mana reykunasninku nitaj kurajkunasninku kanqachu;

¹¹ imaraykuchus Efraenqa may chhika altaresta jataricherqa, chaykunarí juchallikunallankupaj sirverqa.

¹² Jinapis may chhika yachachiykunasta paypaj qelqaporqani, paytaj mana rejsej tukorqa.

¹³ Paykunapajqa may sumaj kasqa chay ñak'ariy rikuchikusqa, chay rikuchikustataj jaywanku, chay rikuchikusmanta jaywasqankumanta aychastataj mikhunku; jinapis noqa Señor chaykunawanqa mana kusisqachu kani; noqa yuyarikusaj chay millay ruwasqasninkumanta jasut'isajtaj chay juchasninkumanta, Egiptoman paykunata kutirichispa.

¹⁴ Israelqa oqharin palaciosta, chay ruwajninmantataj qonqakapun. Judapis oqharin ashkha llajtasta sinch'i ruwasqasta, noqataj chay tukuyta ninapi q'olachisaj tukuy palaciosnintinta ruphanampaj.