Oseas 6 - Qheshwa Biblia DC

Israel parlanakun Señorninman kutipunanmanta

¹ Tukuy jamuychej, Señorman kutirimpuychej. Pay phiriwarqanchej, jinapis payllataj jampiwasunchej. Nanachiwarqanchej, payllataj sanoyachiwasunchej.

² Uj ratollapi kausayninchejta kutichipuwasunchej, sayarichiwasunchej ñaupaqempi kausananchejpaj.

³ Atisqanchejta kallpachakunachej Señorta rejsinanchejpaj! Señor jamonqapuni noqanchejman, imaynatachus inteqa cheqamanta llojsimunampuni kashan ajinata, chayri imaynatachus paraqa jallp'ata qarpanampuni kashan tiempompeqa, ajinata.

Señor israelitasman kutichin

⁴ Señorqa nin: Efraín, imatataj qanwan ruwasajri? Judá, qanwampis imatataj ruwasajri? Noqapaj munakuyniykichejqa, paqarinkunaspi phuyojta rikunkichej ajinalla, chayri tuta tutamanta chhullarpayamun chay ratollataj chinkarpayapun ajinalla.

⁵ Chayrayku profetasniynejta chhika chhikanta t'unata ruwarpaykichej, willayta apachimusqaywantaj wañucherqaykichej. Cheqan justiciaytaj uj k'anchay jina llojsimun.

⁶ Noqaqa astawan munani munakunawaykichejta, manataj sacrificiosllatachu apachimunawaykichejta. Munani Diosniykichejta jina rejsinawaykichejta, manataj q'olachinasllatachu apamunawaykichejta.

⁷ Aylloyqa, Adán jinallataj noqawan tratota ruwasqankuta p'akinku, ujwantaj ujwantaj purikapuspa.

⁸ Galaad llajtaqa, millayta ruwajkunajpa tiyakunanku llajtamin, yawar jich'asqasninkuwan q'ala ch'ichichasqa.

⁹ Sacerdotesqa paykuna ukhumanta tukuyninku suwayman qokapunku, runasmanta suwanankupaj qhawasqallankupiña kanku; wañuchinankupaj, tukuy p'enqay ruwaykunasta ruwanankupajtaj Siquem tukuy ñan rejpi.

¹⁰ Israelpeqa rikuni manchay millay ch'ichi ruwaykunasta. Efraenqa ujwantaj ujwantaj qhenchacharakun, Israeltaj kikin juchallamantaj sat'iykukun.

¹¹ Qampajpis, Judá, ñapis nisqaña ima p'unchaypichus jasut'isqa kanaykeqa.