Oseas 5 - Qheshwa Biblia DC

Israel castigasqa Diosta saqepusqanrayku

¹ Sacerdotekuna, uyariychej kayta; allinta uyariychej, Israel runakuna; reypa wasimpi kajkunapis uyariychej: Qankunaj contraykichejpimin juicio kanqa, imaraykuchus Mizpapi uj misk'anata churarqankichej uj ch'ipatataj aysarqankichej, Tabor orqo patapi.

² Chantá uj ukhu pujyuta allarqankichej, chay Sitim pampaspi, chayraykumin tukuyninkuta jasut'isaj.

³ Noqa rejsini Efraintaqa: Payqa manamin uj mana rejsisqachu. Efraenqa qhenchachakorqa, Israelpa chayllawantaj ch'ichichaykukun.

⁴ Runaspa tukuy millay ruwasqasninku mana saqenchu Diosman kutirikojta. Qhenchachakuyllawan atipasqas kaspa Señortapis mana rejsiyta atinkuchu.

⁵ Israelpa runay kachasqanqa uyallanmantaj laq'akamun; Efraintaj kikin juchallampitaj misk'akun, Judapis paykunawan kuskallataj misk'anqa!

⁶ Ovejasnintin wakasnintin Señorta mask'aj renqanku, manataj tarenqankuchu, imaraykuchus Señorqa paykunamanta t'aqakaporqa.

⁷ Señorman mana cheqantachu purerqanku, wawasninkoqa waj tatasniyojtaj rikhurerqanku, chayrayku kunanqa uj killallapi jallp'asninkupis chinkachisqas kanqanku.

Israelwan Judawan jasut'ichikunku

⁸ Gabaapi tocaychej maqanakuyman wajyana putututa! Ramapitaj tocaychej trompetata! Bet-avempitaj mancharichiychej! Benjaminmanta kajkunata kharkatichiychej!

⁹ Efraenqa q'ala pampachasqa kanqa jasut'i p'unchay chayamojtenqa. Chayta rejsichini Israel ayllukuna ukhupi, kay tukuy imasqa cheqamanta qhatirenqanku.

¹⁰ Señor nin: Judamanta kurajkunasninkoqa campospi mojonesta kuyuchej runasman rijch'akunku. Paykunaj patankuman yakuta jina jich'aykusaj phiñakuyniytaqa!

¹¹ Efraenqa ñak'ariyman ñit'isqa kashan atipasqa tukuy ruwanan kajpi, imaraykuchus mana rejsisqa lantikunasllata qhatej churakorqanku.

¹² Efraimpajqa noqa kasaj uj thuta khuru jina, jinataj uj ismoj jina, Judá ayllupajpis.

¹³ Efraín onqosqa kasqanta rikuspa, Judataj nanachikusqasninta rikukuspa, Efraenqa Asiriaman renqa jatun reypa yanapanta mañakoj, reytaj mana sanoyachiyta atenqachu, nitaj nanasqasnintapi jampiykuyta atenqachu.

¹⁴ Imaynatachus uj león oqoykunampaj phawaykun, ajinata noqapis Efrainta Judatawan ruwasaj; noqa kikiy t'unarpariytawankama ripusaj; jap'ejtiykamaqa ni pipis qhechuyta atiwanqachu.

¹⁵ Jinata ruwaytawankama tiyakunay llajtayman kutimpusaj, juchasniyoj kasqankuta reparakuytawankamataj mask'aj jamunawanku. Ñak'ariypi rikhurisparaj mask'aj tukuwanqanku!