Oseas 4 - Qheshwa Biblia DC

Señorqa Israelpa contrampi oqharikun

¹ Israelitas, uyariychej Señorpa nisqanta. Pay yaykunña phiñanakuyman kay llajtapi tukuy tiyakojkunawan, imaraykuchus manaña paykuna ukhupi kanchu cheqamanta munakuy, manachayqa ch'aukeyanakuylla, nitaj Diostapis rejsinkuchu.

² May chhikasta paykuna ukhupeqa qhasillamanta juranku, llullakunku, wañuchinakunku, suwanakunkutaj chantá chay qhencheríos, sajra ruwaykunas, wañuchinaykunaspis qhepampi, qhepampi kallampuni.

³ Chayrayku kay llajtaqa llakiyllapipuni kashan. Q'ala mana kallpayojllaña kashanku chay tukuy tiyakojkunaqa; monte animalespis, phawaj p'isqospis chantá mar qochapi challwaspis tukuynin wañurashanku.

Señor juchachan sacerdotesta

⁴ Señorqa nin: Ni pi ch'ataykuchunchu nitaj k'amichunchu wajtaqa! Qanllawan phiñanakuni, sacerdote.

⁵ Qanqa kikin sut'i p'unchaypi urmanki, tutantaj profeta qanwan urmallanqataj, kinkinta qampis wañullankitaj.

⁶ Aylloyqa mana yuyayniyoj, chayrayku chinkachisqa karqa. Qantajrí, sacerdote, yachayta qhesacharqanki, noqapis qhesachasqayki sacerdoteypaj kanaykita. Qan qonqaporqanki Diosniykimanta yachachiykunasta, jinata noqapis qonqapusaj mirayniykimanta.

⁷ Sacerdotesqa may chhika kasqankuman jina, chhikallatataj contraypi juchallerqanku; chayrayku honrayoj kasqankuta p'enqayman tukuchisaj.

⁸ Aylluypa juchallanwan kausanku, chayrayku munanku runasniy astawan juchallikunankuta.

⁹ Tukuy aylluta jinataj sacerdotestapis chay ruwasqankuman jina jasut'isaj.

¹⁰ Paykunaqa qonqapunku Señorta sirviyta, chayrayku mikhuspapis mana sajsakonqankuchu; ujwantaj ujwantaj qhenchachakuspapis mana wawasniyojchu kanqanku.

Israel lantista yupaychaj sayaykapun

¹¹ Qhenchachakuywan vinowan imaqa yuyayta chinkachin.

¹² Aylloyqa k'aspi lantisllata tapurakunku; chay llant'a k'aspiswantaj adivinaranku, qhenchachakuywan atipachikuspa. Aylloyqa pantay ñanninta rishan, qhenchachakuypi jinamanta t'aqakuspa Diosmanta.

¹³ Jatun orqo puntaspi juch'uy orqo puntaspipis inciensosta q'oshñichinku jaywankutaj rikuchikusta; jinallatataj roble sach'as uraspi, alamospapi encinaspa phatu llanthusnin uraspipis. Chayrayku warmi wawasniykichej qhenchachakunku, ñojch'asniykichejpis waj qhariswantaj qhenchachakullankutaj.

¹⁴ Chaywampis mana jasut'isajchu warmi wawasniykichejta qhenchachakusqankumanta nitaj ñojch'asniykichejtapis, waj qhariswan qhenchachakusqankumantapis. Qankuna kikiykichejpis qhenchachakuyman qokaporqankichej; rikuchikusta jaywanaykichejpaj khuskachakunkichej chay qhencha warmiswan, chaykunawan dioskunasninkuta yupaychaj jina. Ajinamanta llajtaqa urmaykun chinkayman mana yuyayniyoj kasqanrayku!

¹⁵ Israel, sichus qan qhenchachakunki chayqa, jinapis Judaqa ama juchayojchu rikhurichun. Ama Gilgalman qankuna riychejchu, amataj Bet-avenmampis wichariychejchu, amallataj Señorpa kausayninraykupis juraychejchu!

¹⁶ Israelqa mana kasukunchu uj chukara waka jina, ajinatarí Señorqa michinmanchu sumaj qhallaj pastosnimpi corderosninta jina?

^17-18 Efraenqa lanti yupaychaykunaman qokapun. Tukuyninku machasqas jina urmaranqanku! K'iskimantataj qhenchachakorqanku, astawampis p'enqaypi kayta munarqanku honrayoj kanamanta nisqaqa.

¹⁹ Uj wayra lijrasnin patapi apakaponqa, p'enqasqastaj rikhurenqanku lanti yapaychaykunasninkuwan!