Oseas 2 - Qheshwa Biblia DC

¹ Chaypacha qankuna wauqesniykichejman ninkichej: Diospa llajtan, nispa. Warmi panas ñañasniykichejmantaj ninkichej: Diospa khuyasqan, nispa.

Diospa munakuynin qhenchachakoj ayllumpaj

² Señor nin: Juchachaychej mamaykichejta, juchachaychej, imaraykuchus payqa manaña warmiychu, nitaj noqapis qosanñachu kani! Amaña ujwantaj ujwantaj qhenchachakoj jinaqa qhawasqachu kachun. Chay ujllayninmanta wijch'uchun waj qharisninta!

³ Mana chayqa imaynatachus nacerqa chay p'unchaypi jina q'alallata saqesaj, ch'aki jallp'a ch'in pampaman tukuchisaj, yaku ch'akiywantaj wañuchisaj.

⁴ Wawasninmantapis mana khuyakusajchu, ujwantaj ujwantaj qhenchachakuypi wawas kasqankurayku.

⁵ Maman qhenchachakorqa, honranta t'akarqa kay jinata nispa: Risaj mask'amusaj munasqasniyta, paykuna qowanku t'antayta, ujyanayta, millmayta, linoytapis, chantá aceiteyta ujyanasniytapis.

⁶ Chayraykumin, ñankunasninta khishkawan jark'aykuchisaj tukuy muyuynintimpi purinasninta mana tarinampaj jina.

⁷ Munasqa qharisninta qhatiykonqa. Chaypacha nenqa: Kutiykapusaj ñaupa qosayman, imaraykuchus paywan kunanmanta aswan sumajta purej kani, nispa.

⁸ Payrí mana rejsiwarqachu, noqamin kasqayta pichus qoj trigota, vinota aceitetapis: Pichus astawan yapaykusqanta qolqenta qorintapis, chaykunawantaj lantikunata ruwanampaj.

⁹ Chaywampis oqharikapullasajtaj trigoyta, vinoytapis uvas oqhariypi, p'achallikunampaj qorqani chay millmasniyta linoytapis.

¹⁰ Qharisnimpa ñaupaqempi q'alallata rikhurichisaj. Ni pitaj makiymantaqa kacharichiwanqachu!

¹¹ Kusikunasnin manaña kanqachu: Chay fiestasnin killa rikhurimuykunasnin samakuna p'unchaykunasnin tukuy kaj kusikuna p'unchaykunasnimpis.

¹² Q'alata pampachasaj uvas sach'asninta higos sach'asnintapis, chaykunamanta payqa nirej: Kaykunaqa munasqasniypa qowasqasninku kanku, nispa. Q'ala chhari chharisllamanña tukuchisaj chaypitaj monte animaleslla mikhuykonqanku.

¹³ Jasut'isaj chay lantisninkuman inciensosta q'osñichispa tiemponkuta usuchisqankuman jina. Noqamanta qonqapuspa, anilloswan jinataj collareswan t'ikanchaykukuspa chay munasqasninta qhatiykachasqanmanta. Noqa Señor chayta nini.

Dios munakun Israel ayllunta

¹⁴ Chayrayku munakuyta qallarisaj, ch'in pampamantaj pusaspa chaypi sonqonman parlamusaj.

¹⁵ Chaymantaraj viña sach'asninta kutichipusaj, jinataj Acor valletapis chayman suyayninta kicharinampaj. Chaypimá kutichiwanqa joven kashaspa kutichiwarqa jinata, chantá, maypachachus Egiptomanta llojsimusharqa chaypacha jina.

¹⁶ Chaypacha, Baalníy nispa ninawantaqa, qosáy, niwanqañataj. Noqa Señor chayta nini.

¹⁷ Siminkumantataj qhechusaj, chay baalesmanta parlayta, ni jayk'aj sutillantapis oqharenqankuñachu.

¹⁸ Jaqay tiempopeqa Israelman kutisqata uj tratota ruwasaj, montepi kaj animaleswan, phawaj p'isqoswan, katariswan ima, jinallatataj kay jallp'amanta qhechusaj, wach'inasta, t'ojsinasta, maqanakustapis, jinamanta llajtayqa ni imata manchachikuspa sumajta samarikunampaj.

¹⁹ Israel, noqa qanwan casarakusaj wiñaypaj, kunanmanta cheqa k'ata warmiy kapuwanki leypa nisqanman jina, imaraykuchus tukuy kayniywan munakuyki.

²⁰ Noqa qanwan warmichakusaj, cheqamanta qanllapajtaj kasaj; qanrí, Señorta jina rejsiwanki.

²¹ Noqa Señor chayta nini. Jaqay p'unchaykunapeqa noqa kutichisaj janaj pachaman, janaj pachataj kutichenqa kay pacha jallp'aman;

²² jallp'ataj kutichenqa trigoman, vinoman, aceiteman ima, chaykunataj kutichenqanku Jezreelman.

²³ Aylluyta tarpuykusaj jallp'aman noqa sapallaypaj, khuyakusaj Lo-ruhamanta, Lo-amitataj: Qanmin aylloyqa kanki, nispa. Paytaj niwanqa: Qanmin Diosneyqa kanki!, nispa.