Oseas 11 - Qheshwa Biblia DCDios munakun mana uyarikoj Israel ayllunta 1 Maypachachus Israel ayllu wawallaraj kashajtin, munakoj kani payta, waway kasqanrayku, chayrayku Egiptomanta wajyakaporqani. 2 Noqa payta astawan wajyasqayrayku, astawan pay noqamanta t'aqakapushawarqa. Aylloyqa jaywasharqa rikuchikusninta qhasi llulla dioskunallaman, inciensostataj q'osñichisharqa lantisman. 3 Chaywampis Efrainta noqa makisninmanta jap'ispa puriyta yachacherqani, payri mana entienderqachu noqa kasqayta payta waqaychajqa. 4 Misk'i parlaywan may munakuywantaj wataspa paytaqa noqanejman aysamorqani, uyay chayman astawan paykunata k'askaykuchikorqani uj ñuñoj wawasta jina; astawantaj k'umuykorqani paykunata mikhuchinaypaj. 5 Chaywampis paykunaqa manapuni kutirimuwayta munarqankuchu. Chayraykumari Egiptoman kutirinanku karqa. Asiriataj paykuna patapi kamachenqa. 6 T'ojsina espadas llajtasninku pataman urmaykonqa, pakakuna sinch'i wasisninkutataj tukuchenqa, munasqankuman jinalla ruwasqankuraykutaj phirisqas kanqanku. 7 Israel aylloyqa noqamanta karullapipuni kayta munashan. Mayta oqharerqanku pataman, ni pipis paykunata yanapanchu. 8 Imaynallatataj saqesqayki, Efraín? Imaynatataj qonqarparisqayki Israel? Atiymanchu Adma llajtata jina phirisuyta, chayri imaynatachus Zeboim llajtawan ruwarqani ajinallatataj qamwampis ruwayta? Sonqoyqa nanasqaña kashan, qampaj khuyakuywan junt'asqa! 9 Mana phiñakuyniy k'ajarisqanman jinachu ruwasaj: Mana watejmanta Efrainta t'unasajñachu, imaraykuchus noqa Dios kani, mana runachu, noqamin Santo kani, chaupiykichejpi kashani chay, manataj t'unata ruwajchu jamuykichej. 10 Paykuna Señorta qhatenqanku, Señortaj uj león jina qhaparenqa. Paypata kajkunata inti llojsimuy ladomanta qharkatitispa jamonqanku. 11 P'isqos jina Egiptomanta kharkatitispa jamonqanku; Asiriamanta palomas mina jamonqanku, jinamanta watejmanta wasinkupi tiyakunankuta ruwasaj. Noqa Señor chayta nini. Israel, Diospa ayllun juchachakun 12 Efraenqa llullerasninwan muyuykuwan; Israel ayllupi ch'aukeriyasninwan muyuykuwan. Judatajrí, Diosmanta t'aqakapun, kunantaj sumajta purikushan chay lantisninwan. |
Qheshwa Biblia DC © Sociedades Bíblicas Unidas, 1986.
United Bible Societies