Oseas 1 - Qheshwa Biblia DC

¹ Kayta, Beerej wawan Oseasman Señor parlaykorqa: Judapi kamachishajtinku Uzías, Acaz, jinataj Ezequiaspis; chantá Joaspa wawan Jeroboam Israelpi kamachishajtin.

Oseaspa warmin wawasnin ima

² Señor kay jinata parlayta qallarerqa imastachus Oseasnejta willayta munasharqa chayta: Israel jallp'aqa qhenchachakun noqamanta t'aqakusqanrayku. Ajinallatataj qampis riy warmillikamuy uj sajra purej qhencha warmiwan, wawallikuytaj chay warmiwan, jinamanta qhencha warmej wawasnin kanqanku; nispa.

³ Chaypacha Oseasqa, Diblaimpa wawan Gomerta warmimpaj oqharikorqa. Chay warmitaj wijsallisqa rikhurispa uj qhari wawata nacichikorqa.

⁴ Chaypacha Señor nerqa Oseasman: Jezreelta sutichay chay wawata, imaraykuchus ña jasut'isajña rey Jehojpa tukuy ayllunta Jezreelpi wañurachisqankumanta, jinamanta Israelpa reinonta chinkachisaj.

⁵ Jaqay p'unchaypi Jezreel vallepi noqa phirisaj Israelpa maqanakupi atipaj kayninta, nispa.

⁶ Gomer watejmanta wijsallikullarqataj, uj warmi wawatañataj nacechikorqa. Señor nillarqataj Oseasman: Chay warmi wawata sutichanki, Lo-ruhamata imaraykuchus Israel reinomanta manaña khuyakusajchu. Mana paykunata perdonasajchu.

⁷ Judáj reinonmantarí khuyakusaj, noqa kikiy Señor Diosninku paykunata salvasaj. Pero salvasaj chayqa manamin maqankupichu, nitaj wach'inawanchu nitaj t'ojsinawanchu nillataj caballospi lloq'ajkunawanchu, nispa.

⁸ Ñuñushajmanta Lo-ruhamata t'ipiytawankama Gomerqa watejmanta wijsallikuytawankama uj qhari wawata nacechikullarqataj.

⁹ Chaypacha Señor nerqa Oseasman: Lo-amita sutichay wawata, imaraykuchus qankuna manaña aylluychu kankichej nitaj noqapis Diosniykichejñachu kasaj.

Israelitasta Dios jap'ikapullanqataj

¹⁰ Uj p'unchaypeqa mar qochaj t'iyun jina mana yupay atina kanqanku israelitasqa, ni pi midiyta nitaj yupayta atenqachu. Diosqa manaña llajtaychu kankichej, ninasuykichejtaqa, qankunaqa kausaj Diospa wawasnin kankichej, nisonqachejñataj.

¹¹ Chaypacha, Judajpa runasnin jinataj Israelpa runasnimpis tantakonqanku, uj kamachej lata oqharikonqanku, tukuynejmanta Jerusalenman kutimponqanku. May jatunmin kanqa Jezreelpa chay p'unchaynenqa!