Números 9 - Qheshwa Biblia DC

Pascuaj ruwakuynin

^1-2 Israelitas Egiptomanta llojsimusqankumanta iskay watamanta, wataj qallarikuynin ñaupaj kaj killapi, Señorqa Sinaí ch'in pampapi Moisesman kay jinata parlarqa: Israelitasqa Pascua fiestata ruwachunku mayk'ajchus ruwanankupaj nisqa kashan chaypachu.

³ Kay niyta munan, chunka tawayoj p'unchay kashajtin ch'isiyaykuyta kay killapi, imaynatachus kamachisqas kashan chayman jina kikinta.

⁴ Chaymanta Moisesqa israelitasta kamacherqa Pascua raymita ruwanankuta.

⁵ Paykunataj kikinta ruwarqanku ñaupaj kaj killapi, chunka tawayoj p'unchaypi ch'isiyaykuyta Sinaí ch'in pampapi, imaynatachus Señorqa Moisesman kamachisqanman jina.

⁶ Wakin runastajri ch'ichichasqas kasharqanku wañusqasta llankhasqankurayku. Chayrayku paykunaqa chay p'unchaypi Pascuata mana ruwaysikuyta aterqankuchu. Jina kaspa paykunaqa Moiseswan, Aaronwan ima parlaj rerqanku.

⁷ Chayaspataj Moisesman nerqanku: Noqaykoqa wañusqasta llankharqayku, chayrayku mana llimphupajchu qhawasqas kayku. Kunanqa kay kikin diallapitaj, manachu atiykuman Señorman uj rikuchikuta jaywayta, israelitaswan khuska?, nispa.

⁸ Moisestaj paykunaman nerqa: Suyarikuychej Señor imatachus ninawanta qankunamanta, nispa.

⁹ Chaymanta Señorqa Moisesman parlarqa kay jinata:

^10-11 Tukuyniykichej, jinallataj wawasniykichejpis ruwanaykichejpuni tiyan noqaj sutiypi. Pikunachus wañusqasta llankharisqankupi ch'ichichasqasqa, pikunachus ña puriypi tarikojkuna imaqa, Pascuata ruwachun chunka tawayoj p'unchay kashajtin iskay kaj killapi ña ch'isiyaykuytaña. Chaypi cordero aycha kankata mikhonqanku jaya qhorasniyojta, mana levadurayoj tortilla t'antatawan.

¹² Q'ayantimpajqa ama imatapis puchuchichunkuchu, nitaj chay corderoj tullusnintapis p'akichunkuchu. Pascuataqa ruwachunku noqa imaynatachus kamachisqayman jina.

¹³ Chanta pichus, llimphu kashaspa, nitaj puriypipis kashaspa Pascuata mana ruwankuchu chayqa, ayllusnimpa chaupinmanta chinkachisqa kachun. Chay kikin diapi Señorpaj rikuchikuta mana jaywasqanrayku, chay runaqa juchachasqa kanqa.

¹⁴ Karu llajtayojkunapis qankuna ukhupi tiyakojkuna Pascuata noqaj sutiypi ruwanallankutaj tiyan, imaynatachus kamachisqayman jina. Imatachus nisqasniyta kikinta ruwananku tiyan karu llajtayojkuna, jinallataj qankuna chaupipi nacekojkunapis.

Dioswan tinkukuna toldo patapi phuyu

¹⁵ Ima diachus Dioswan tinkukuna toldota sayarichejtinku, chay diapacha phuyoqa trato ruwana toldota urphuykorqa. Ch'isiyaykuymantapacha uj nina k'anchay jina k'ancharqa Dioswan tinkukuna toldota sut'iyamunankama.

¹⁶ Ajinallapuni karqa Dioswan tinkukuna toldopi, p'unchayqa phuyu urphuykorqa, tutantaj uj k'anchay nina jina k'ancharqa.

¹⁷ Dioswan tinkukuna toldo patamanta phuyu oqharikojtintaj israelitasqa ñanta purirerqankupacha. Maypichus phuyu sayarqa chaypitaj jarakorqanku.

¹⁸ Señor imatachus kamachejtinkama israelitasqa ñanta purirerqanku, jarakorqankutaj. Chaypi qhepakoj kanku mayk'ajkamachus Dioswan tinkukuna toldo patapi phuyu kanankama.

¹⁹ Sichus chay phuyu Dioswan parlana toldo patapi unayta kasharqa chayqa, israelitaspis qhepakullajtaj kanku, Señor imatachus kamachisqasninta ruwaspa.

²⁰ Sichus phuyu pisi diasllata kaj chayqa, Señorpa kamachisqanman jina ñanta purirejpacha kanku israelitasqa. Ujtawan Señorqa imatachus kamachejtintaj qhepakullajtaj kanku.

²¹ Wakin kutispeqa uj ch'isillata chay phuyu qhepakoj, q'ayantintaj tutamanta oqharikoj. Jina kajtin israelitasqa ñanta puririllajtaj kanku. P'unchaypis kachun tutapis kachun phuyu oqharikojtenqa paykunapis rillajtaj kanku.

²² Sichus mashkha diasta, chayri uj killata, chayri uj watata phuyu Dioswan tinkukuna toldo patapi sayarqa chayqa, israelitaspis chay kikillantataj chaypi kaj kanku; mana maymampis rejchu kanku. Sichus chay phuyu mayk'ajchus oqharikorqa chayqa, paykunapis kikillantataj oqharikojpacha kanku ñanta rinankupaj.

²³ Maypichus Señorqa jarakunankuta nejtintaj, chaypi jarakoj kanku; riychej nejtintaj ñanta jap'irej kanku. Señorpa kamachisqanta junt'aj kanku, Señorqa Moisesnejta kamachisqanman jina.