Números 8 - Qheshwa Biblia DC

Imaynatachus k'anchaykunata jap'ichinankumanta

^1-2 Señorqa Moisesman kamacherqa: Aaronman ajinata niy: Qanchis k'anchachinasta churaspaqa, k'anchachinaj ñaupaqenman qhawarisqata jap'irachinki.

³ Aaronqa kikinta ruwarqa imaynatachus Señorqa Moisesman kamachisqanman jina, k'anchaykunasta jap'iracherqa k'anchachinaj ñaupaqenman qhawarisqasta.

⁴ Moisesqa chay k'anchachinasta martillowan ch'eqosqa qorimanta ruwacherqa, sayananmanta maymantachus palqasnin llojsisharqa chaykama, imaynatachus Señorqa Moisesman nisqanman jina, chayman jinataj ruwachinampaj.

Levitasqa Señorpaj t'aqasqas

^5-6 Señorqa Moisesman nerqa: Tukuynin levitasta israelitaspa chaupinmanta ajllay, paykuna llimphupaj qhawasqa kanankupaj llimphuchachiy.

⁷ Llimphuchakushajtenqa kay jinata llimphuchachinki. Llimphuchaj yakuwan paykunaman chhallunki. Chaymantataj paykuna tukuy ukhunkumanta pelosta k'utukonqanku, p'achasninkutataj t'ajsakuchunku; ajinamanta paykunaqa llimphupaj qhawasqas kanqanku.

⁸ Chaymantaqa ujnin kaj uña wakata aysamonqanku, ch'aki mikhunamanta sumajnin kaj jak'utawan, aceitewan ñat'usqata. Jinaspataj uj waka uñata aysamonqanku juchaspa cuentanmanta jaywanapaj.

⁹ Ajina kajtintaj levitasta qayllachinki Dioswan tinkukuna toldoj ñaupaqenman, jinallataj tukuynin israelitaspis tantakuchunku.

¹⁰ Señorpa ñaupaqempi israelitas levitasman qayllaykojtinkutaj, makisninkuta churachunku levitaspa umasninman.

¹¹ Aaronqa levitasqa rikuchikuta jina noqapaj t'aqanqa israelitaspa cuentanmanta. Ajinamanta levitasqa noqaj kamachiypi kanqanku.

¹² Chaymantataj levitasñataj chay aysamusqa waka uñaspa umanman makisninkuta churanqanku. Jinamanta ujnin kaj wakaqa juchaspa cuentanmanta Señorman jaywasqa kanqa; ujnin kajtaj Señorpaj ruphachinapaj kanqa, levitasta Señorpaj t'aqapunapaj.

¹³ Levitasta sayachinki Aarompa ñaupaqempi, wawasnimpa ñaupaqempiwan noqapaj t'aqapunawaykipaj.

¹⁴ Ajinata qanqa levitasta t'aqapuwanki israelitaspa chaupinkumanta noqajta kanankupaj.

¹⁵ Chaymantataj levitasqa jamonqanku Dioswan parlana toldopi imaschus ruwana kajta ruwanankupaj. Chaypajqa paykunata llimphuchaspa sumaj rikuchikuta jina t'aqapuwanki.

¹⁶ Imaraykuchus tukuy israelitaspa chaupimpi noqapaj t'aqasqas kanku. Noqa paykunata jap'ini israelitaspa kuraj wawasnimpa cuentanmanta.

¹⁷ Imaraykuchus noqajta kanku tukuy israelitaspa kuraj wawasninku. Ajinallataj tukuy uywasninkoj ñaupaj uñasninkupis noqajta kanku. Maypachachus egipciospa kuraj wawasninkuta wañurachishaspa, noqa paykunataqa ajllakorqani israelitas ukhupi.

¹⁸ Chayrayku chaykunaj cuentanmanta levitasta ajllakuni.

¹⁹ Noqa levitastaqa israelitaspa chaupinmanta ajllakuni, jaywanitaj Aaronman, wawasninmanwan, paykuna israelitaspa sutimpi ima ruwana kajtapis ruwanankupaj Dioswan tinkukuna toldopi, perdontapis israelitaspa mañapunankupaj. Ajinamanta israelitas Dioswan tinkukuna toldoman ama qayllanqankuchu, nitaj ima jasut'iypis paykunaman chayanqachu.

²⁰ Ajinamanta Moiseswan, Aaronwan, tukuy israelitaswan ima junt'arqanku Moisesman Diospa nisqanta.

²¹ Levitasqa llimphuchakorqanku, p'achasninkutapis t'ajsakorqanku. Jinamanta Aaronqa Señorman paykunata jaywarqa, sumaj rikuchikuta jina. Ajinamanta Aaronqa paykunamanta uj rikuchikuta jina ruwarqa, paykunata llimphuchaspa.

²² Chaymantataj levitasqa imachus ruwana kajta ruwayta qallarerqanku Dioswan parlana toldopi. Chaytataj Aaronwan wawasninwan ima ruwacherqanku. Chaykunasta ruwarqanku imaynatachus Señorqa Moisesman levitasmanta kamachisqanman jina.

Levitas mayk'ajkamachus Señorpa kamachin kanankumanta

^23-24 Chaymanta Señorqa Moisesman nerqa: Levitasqa iskay chunka phishqayoj watayojmantapacha, imatapis ruwayta qallarenqanku Dioswan tinkukuna toldopi.

²⁵ Phishqa chunka watasniyojmantataj chay ruwanasmanta llojsiponqanku.

²⁶ Chaymanta qhepamanqa paykunamanta qhepaman yaykumojkunatañataj yanapanqanku Dioswan parlana toldopi imastachus ruwashanku chaypi, jinamanta paykunaqa mana chay wakinkuna jinañachu ruwanqanku. Ajinata levitastaqa kamachinki ruwanankuta.