Números 6 - Qheshwa Biblia DC

Nazareo nisqas imaynachus kanankumanta

^1-4 Señorqa Moisesman kamacherqa: Israelitasman kay jinata niy: Sichus pi qhari, chayri warmi, nin Señorpaj nazareo jina kananta chayqa, ama vinota ujyachunchu, ni ima machachikoj ujyanata, ni vinomanta ruwasqa vinagreta, chayri poqosqa ujyanasta, ni uvas ch'irwasqata, amataj mikhonqachu uvasta, nitaj uvas k'isatapis. Nazareo jina kashaspaqa amapuni mikhonqachu uvasta, ni lurusninta, nitaj qaritantapis.

⁵ Manallataj chujchasnintapis k'utuchikuyta atinchu, mana chayqa wiñachinallan tiyan mashkha tiempopajchus Diospaj kananta nerqa chaykama, imaraykuchus payqa Diospaj t'aqasqallapuni kanan tiyan.

^6-7 Chay tiempopeqa manallataj ima wañusqamampis qayllananchu tiyan, ni tatampaman, ni mamampaman, ni wauqempaman, ni panampaman, ama jinamanta ch'ichichakunampaj imarayuchus payqa Señorpaj t'aqasqa.

⁸ Mashkha tiempopajchus pay nikorqa Señorpaj t'aqasqa kananta, chaykama ajina kanan tiyan.

⁹ Sichus Nazareo kashajtin pipis paypa qayllampi wañunman chayqa, chay chujchasninta ch'ichichanqa. Jina kajtin Nazareoqa llimphuchakunan qanchis p'unchaynimpi, chay chujchasninta ruthuchikunan tiyan.

¹⁰ Pusaj kaj diapi sacerdoteman apanan tiyan iskay tortolasta, chayri iskay irpa palomasta Dioswan tinkukuna toldo punkuman.

¹¹ Sacerdoteqa ujnin kajta rikuchikuta Señorman jaywamonqa chay runaj juchampa cuentanmanta, ujnintataj ruphasqa ofrendata jaywanqa. Chaymantataj Señormanta mañaponqa Señor perdonanampaj chay juchasninmanta ayata llankharisqanmanta, umantataj chay diapi llimphuchakonqa.

¹² Chay p'unchaypi watejmanta Señorpaj nazareo jina kanqa, chay ñaupajpi mana allin risqanta qonqayman churaspa, imaraykuchus chujchasnenqa manaña llimphuchu karqa. Uj watayoj corderota Señorman apanqa juchanmanta perdonasqa kanampaj.

¹³ Kay kamachiy junt'akojtintaj, pichus Señorpaj t'aqasqa karqa chayqa, rinan tiyan Dioswan parlana toldo punkuman.

¹⁴ Chaypitaj uj watayoj corderota mana iman imanasqata Señorman jaywamonqa ruphachisqa kanampaj. Uj watayoj malta ovejatataj mana iman imanasqata juchasninmanta Señorman jaywamonqa. Uj carnerotataj sumajnin kajta mana iman imanasqata jaywallanqataj allinyakuy richuchikuta.

¹⁵ Chanta jaywamullanqataj uj canasta t'antata, sumajnin kaj jak'umanta mana levadurawan ruwasqata, aceitepi chayachisqatataj; tortillastapis mana levadurayojta aceitewan jawiykuspalla, ch'aki mikhuykunamanta ofrendastawan, vinotawan khuska.

¹⁶ Sacerdotetaj chayta Señorman jaywamonqa juchasninmanta uj rikuchikuta, jinallataj ruphachisqa ofrendatapis.

¹⁷ Chay carnerotaqa uj allinyakuy rikuchikuta jaywanqa, chay mana levadurayoj ruwasqa uj juch'uy canasta t'antastawan khuska jaywamullanqataj, vino ofrendasta ch'aki mikhuykunamanta ofrendastawan.

¹⁸ Chay nazareo nisqa karqa chaytaj chujchasninta Dioswan tinkukuna toldo punkupi ruthuchikonqa. Diospaj t'aqasqa kasqanta wiñachisqan chay chujchasnintataj jap'iytawan ninaman ruphachenqa allinyakuy rikuchiku ruphasharqa chayman.

¹⁹ Sacerdoteqa nazareo nisqaj uman ruthusqaj makinman churanqa carnero oveja ñak'asqa, ñañu wasan chayasqa kankata, canastamanta mana levadurayoj ruwasqa t'antata, uj mana levadurayoj tortillatawan.

²⁰ Kay tukuy imasta sacerdoteqa Señorman jaywanqa uj sumaj kaj ofrendata jina. Chay ovejata Señorman jaywasqanmanta chay puchusnin, maki palasnin imaqa Señorpaj t'aqasqa, qhepamantaj sacerdote chaykunata mikhukaponqa. Chaymantaraj nazareoqa vinota ujyayta atenqa.

²¹ Kaymin chay kamacheyqa, pikunachus Señorpaj t'aqasqas kanku nazareo jina chujchankutapis wiñachikunku chaykunapaj. Jinallataj ofrendastapis Señorman qoyta atinku maychus kapusqanman jina imaschus kapusqanta. Chaytaqa junt'anantaj tiyan imatachus Señorman qosaj nisqanta nazareo nisqasman kamachisqasman jina.

Sacerdote bendicin

^22-23 Señorqa Moisesman nerqa: Niy Aaronman, wawasninmanwan, israelitasta bendicishaspaqa kay jinata nichunku.

²⁴ Señorqa bendicisuchun, waqaychasuchuntaj.

²⁵ Señorqa qanman k'anchayninta k'anchamusuchun, khuyakuynintataj rikuchisuchun.

²⁶ Señorqa munakuywan qhawasuchun, sonqo tiyakuyta ima qosuchun.

²⁷ Ajinata paykunata noqaj sutiypi israelitasman nichunku, noqataj paykunata bendicisaj.