Números 4 - Qheshwa Biblia DC

Levitaspa ruwaynin

^1-2 Señorqa Moisesman Aaronmanwan nerqa: Yupaychej Coatpa mirayninmanta sapa familiapi tatasninkoj sutisninman mashkhachus kasqankuman jina.

³ Chaykunaqa kachunku kinsa chunka watayojmanta phishqa chunka watayojkama; Dioswan tinkukuna toldopi imatapis allinta ruwanankupaj.

⁴ Coatpa miraynimpa Dioswan tinkukuna toldopi ruwanasninkoqa may llimphumin, chaytaj kay jina:

⁵ Maypachachus israelitas puririnankupaj jarata oqharejtinku Aaronwan wawasninwan jamuspa Dioswan tinkukuna toldoman yaykunapi jark'achisqa kasharqa chay velota oqharenqanku, chaymantataj qhataykonqanku Diospa leyninwan kashan chay cajonta.

^6-7 Chaypa patanman qhataykonqanku sumaj qarasmanta ruwasqa qhatanawan. Chaypa patanmantaj qhataykullanqankutaj panti bayetawan. Chaymantaj k'aspisninwan ningrisninta jusk'urachenqanku chaykunamanta wantunapaj. Qosqasninku t'antaswan kasharqa chay mesatataj uj panti bayetawan qhataykonqanku, chaypa patanmantaj churanqanku chuwasta, cucharasta copasta, yurustapis, vino ofrendaspaj jinallataj sapa kuti qosqasninku t'antastawan.

⁸ Chaykunaj patanmantaj qhataykonqanku puka bayetawan, chaypa patanmantaj sumaj qaramanta ruwasqa qhatanawan. Chaymantataj chay mesaj ningrisninta jusk'urachenqanku chaykunamanta wantunapaj.

⁹ Chaymanta, k'anchachinatapis panti bayetawan qhataykullanqankutaj, chaypa k'anchaykunasninta, pabilosnimpa ushphasnin k'utunasninta, uspha tantana chay chuwitasninta, imasninmanchus aceitetapis churanku chaykunasnintinta.

¹⁰ Chay tukuyninta sumaj qaramanta ruwasqa qhatanawan mayt'uykonqanku, k'aspis patamantaj churaykonqanku chaymanta wantuspa apanapaj.

¹¹ Chaymantaqa qori altartañataj panti bayetawan qhataykonqanku, chaypa patanmantaj sumaj qaramanta ruwasqa qhatanawan mayt'uykonqanku, k'aspisninwantaj jusk'urachenqanku chaymanta oqharispa wantunapaj.

¹² Chaymantataj toldo ukhupi Diospa tiyakunampi imasninchus tiyan chaykunasninta tukuyninta panti bayetaman oqharenqanku. Chaytataj sumaj qarasmanta ruwasqa qhatanawan mayt'uykonqanku. K'ispis patamantaj churanqanku, chaymanta oqharispa wantunapaj.

¹³ Altartapis pichanqanku qhosqosninta, ushphasninta ima, jinaytawantaj puka kulli bayetawan qhataykonqanku.

¹⁴ Chaypa patantaj churanqanku imawanchus Diosman jaywanku chaykunata: Nina k'anallasta, trinchesta, lamparata, palasninta, chuwasninta; chantaqa imasninchá tiyan altarpata chay tukuynintawan. Chaymantataj patanman qhataykonqanku sumaj qarasmanta ruwasqs qhatanawan. K'aspi patamantaj churaykonqanku chaymanta oqharispa wantunapaj.

¹⁵ Aaronwan wawasninwan tukuy chay imasta q'epichayta tukojtinkutaj, ñanta puririnapaj wakichisqaña kajtin, Coatpa wawasnenqa jamuchunku tukuy chaykunata apanankupaj. Chaywampis paykunaqa amapuni llankharenqankuchu Diospaj ajllasqa imasta, manachayqa wañonqanku. Ajinata, Dioswan parlana toldoj imasninta Coatpa wawasnin apanqanku.

¹⁶ Sacerdote Aarompa wawan Eleazar cuentayoj kanqa k'anchaykunapaj aceitemanta, jinallataj sumaj q'apashaj ch'aki mikhuykunamanta, ofrendasta apamuwanqanku chaykunamanta, Diospa ajllaspa jawina aceitemantawan. Chantaqa pay qhawanqa Dioswan tinkukuna toldota, imaschus chay ukhupi tiyan chaykunata, chaytaqa Diospa tiyakunanta, chaypi imaschus tiyan chaykunatawan.

^17-18 Señorqa Moisesman Aaronmanwan nerqa: Qankunaqa ama saqenkichejchu Coatpa miraynin chinkapunanta levitas ukhumanta.

¹⁹ Paykunaqa ama jasut'isqas kanankupaj Diospaj nisqasta llankhasqankurayku. Chaypajqa kay jina kanan tiyan: Aarón, wawasnin ima paykunata kamachinanku tiyan sapa ujninku imastachus apanankuta, chantaqa imastatajchus ruwanankutawan.

²⁰ Ajinamanta paykunaqa ama qhawanqankuchu Diospaj nisqasta, chay jawa ama wañunankupaj.

^21-22 Señorqa Moisesman nerqa: Gersompa familianta yupay, sapa ujta tatasninkoj sutisninman jina.

²³ Paykunaqa kananku tiyan kinsa chunka watayojmanta, phishqa chunka watayojkama Dioswan parlana toldopi imastapis allinta ruwanankupaj jina.

^24-26 Gersompa familiampa ruwananqa kay jina kanqa: Paykuna apanqanku Dioswan parlana toldota, jark'achinasninta, sumaj kaj qarasmanta ruwasqa qhatanasninta, toldoman yaykunaj jark'achinasninta, patioj jark'achinasninta, Dioswan tinkukuna toldoj muyuyninta muyurisqa patioman yaykunaj jark'achinanta, chay patiopi kashan toldowan, altarwan; jap'ichina waskasnintawan, imaschus tiyan chaykunata ruwanampaj chaykunatawan. Ajinata paykunaqa ruwarqanku.

²⁷ Gersompa wawasnin chaykunata ruwanankutaqa, Aarón, chanta wawasnin ima kamachenqanku, imastachus ruwanankutawan. Ajinata qankunaqa chaykunamanta cuentayoj kankichej paykuna imastachus ruwanankumantaqa.

²⁸ Kay imasta Gersompa familiasnin ruwanqanku Dioswan tinkukuna toldopi. Chaytataj kamachenqa sacerdote Aarompa wawan Itamar.

²⁹ Chantaqa yupallaytaj Merarej familianta sapa ujta tatasnimpa sutisninman jina.

³⁰ Paykunataj kananku tiyan kinsa chunka watayojmanta phishqa chunka watayojkama, Dioswan tinkukuna toldopi imaschus ruwana kajta allinta ruwanankupaj jina.

^31-32 Kaykunata paykunaqa ruwanqanku: Dioswan tinkukuna toldoj madera tablasninta apanqanku, wajtera k'aspisninta, sayanasninta, maderasninta, chukusninta, Dioswan tinkukuna toldoj pationta muyuykushan chay sayanasninta chukusnintawankama. Chanta estacasninta, waskasninta, imaschá chaykunata ruwanapaj tiyan chaykunatawan. Sapa ujta qan kamachinki imastachus apanankuta.

³³ Kay imasta ruwanan tiyan Merarej familiasnin Dioswan tinkukuna toldopi. Paykunatataj kamachenqa sacerdote Aarompa wawan Itamar.

³⁴ Moiseswan, Aaronwan, chanta sapa t'aqata kamachejkunapiwan, Coatpa familianta yuparqanku sapa ujta tatasninkoj sutisninman jina.

³⁵ Paykunataj kinsa chunka watayojmanta phishqa chunka watayojkama karqanku, Dioswan tinkukuna toldopi imastapis sumajta ruwanankupaj jina.

³⁶ Yupasqa qharisqa tukuynimpi karqanku iskay waranqa qanchis pachaj phishqa chunkayoj.

³⁷ Kaykunaqa Coatpa miraynin karqanku Dioswan tinkukuna toldopi imas kajtapis allinta ruwajkuna, Moiseswan Aaronwan yupasqankuman jina, imaynatachus Señorqa Moisesman kamachisqanman jina.

³⁸ Gersompa miraynin yupasqa karqa familiankuman jina, tatasninkoj sutisninman jinataj.

³⁹ Kinsa chunka watayojmanta phishqa chunka watayojkama, Dioswan tinkukuna toldopi imas kajtapis allinta ruwayta atejkuna.

⁴⁰ Paykunaqa tukuyninkupi karqanku iskay waranqa sojta pachaj kinsa chunkayoj.

⁴¹ Kaykuna karqanku Gersompa miraynin Dioswan parlana toldopi imas kajtapis allinta ruwayta atinankupaj, Moiseswan, Aaronwan yupasqankuman jina, imaynatachus Señorpa kamachisqanman jina.

⁴² Merarej miraynenqa yupasqa karqa familiasninkuman jina, tatasninkoj sutisninman jinataj.

⁴³ Kinsa chunka watayojmanta phishqa chunka watayojkama, Dioswan tinkukuna toldopi imas kajtapis allinta ruwayta atejkuna.

⁴⁴ Tukuyninkupitaj karqanku kinsa waranqa iskay pachajniyoj.

⁴⁵ Chaykuna karqanku Merarej miraynin Dioswan tinkukuna toldopi imas kajtapis allinta ruwayta atejkuna, Moiseswan Aaronwan yupasqankuman jina, imaynatachus Señorqa Moisesman kamachisqanman jina.

⁴⁶ Moiseswan, Aaronwan, chanta israelitasta sapa t'aqapi kamachejkunapiwan levitasta yuparqanku familiasninkuman jina, tatasninkoj sutisninman jinataj.

⁴⁷ Kinsa chunka watayojkama, phishqa chunka watayojkama Dioswan tinkukuna toldopi imas kajtapis allinta ruwayta atejkunata.

⁴⁸ Tukuyninkupi karqanku pusaj waranqa phishqa pachaj pusaj chunkayoj.

⁴⁹ Kay yupayta ruwarqanku imaynatachus Señorqa Moisesman kamachisqanman jina, nerqataj sapa ujninku imastachus ruwanankuta, imastachus apanankuta, Señorqa Moisesman kamachisqanman jina.