Números 31 - Qheshwa Biblia DC

Madián llajtaj urmaynin

^1-2 Señorqa Moisesman nerqa: Madianitasman israelitaswan aynita kutichiy, sajramanta sajrata, chay qhepamantaj wañupunki, nispa.

³ Chaymanta Moisesqa israelitasman nerqa: Wakinniykichej madianitaswan maqanakunaykichejpaj wakichikuychej, maqaspa aynita kutichiychej Señorpa sutimpi.

⁴ Sapa ayllumanta waranqa runas maqanakoj richunku.

⁵ Ajinata israelitasqa sapa ayllumanta ajllarqanku waranqa qharista maqanakoj rinankupaj; tukuynimpi karqanku chunka iskayniyoj waranqa soldados.

⁶ Moisesqa chay runasta pusacherqa sacerdote Eleazarpa wawan Fineeswan. Pay aparqa Diospa imasninta, pututustawan maqanakuyta qallarinankupaj tocanampaj.

⁷ Jinata riytawan maqanakuspa madianitasta wañuracherqanku tukuyninta, Moisesman Señor kamachisqanman jina.

⁸ Chaypi wañuracherqanku Madianmanta phishqa reyesta: Evita, Requemta, Zurta, Hurta, Rebata, chanta Beorpa wawan Balaamtawan.

⁹ Israelitasqa madianita warmista presosta aparqanku juch'uy wawasninkutawan khuska. Uywasninkutataj qhechorqanku, wakasninkuta, sumaj imasninkuchá karqa chaytawan.

¹⁰ Chantapis, llajtasninkuta ruphaykucherqanku, jinallataj jarasninkutapis.

^11-12 Tukuy ima qhechusqasninkuta, runasta, uywasta ima, Moisesman, sacerdote Eleazarmanwan, israelitasmanwan pusarqanku. Israelitaslla jarasqas kasharqanku Moab pampaspi, Jordán mayu cantopi, Jericó llajtaj chimpampi.

¹³ Moiseswan sacerdote Eleazarwan, tukuy kurajkuna israelitaswan ima jarankumanta llojsiytawan maqanakumanta taripaj rerqanku kutimojkunata.

¹⁴ Moisesqa mayta phiñakorqa maqanakumanta kutimojkunaj soldadospa kurajkunasnimpaj; waranqata kamachejkunapaj, pachajta kamachejkunapajwan.

¹⁵ Nerqataj paykunata: Ima nispataj kay warmista mana wañuchinkichejchuri?

¹⁶ Paykunaqa Baal-peorta yupaychachispa israelitasta Diospa contranta juchallicherqanku. Chayrayku Señorqa israelitasman wañuyta apachimorqa.

¹⁷ Kunanqa kay tukuyta wañuchiychej, tukuy qhari wawasninkuta, jinallataj tukuy warmista qhariwan puñuykojkunata.

¹⁸ Manaraj qhariwan puñojkuna warmista ama wañuchiychejchu, nillataj warmi wawastapis; chaykunaqa qankunapaj kachunku.

¹⁹ Pikunachus qankunamanta runata wañucherqanku, chayri wañusqasta llankharqanku chayqa, chaykuna jaramanta jawallapi qanchis p'unchayta qhepakuchunku. Jinamanta kinsa kaj diapi, qanchis kaj diapiwan qankuna, chanta presospis llimphuchakuychej.

²⁰ Jinallataj llimphuchaychej tukuy p'achasta, qarasmanta imaschus ruwasqs kashan chaykunata, jinataj cabra pelosmanta ruwasqs kajkunata, maderamanta ruwasqs kajkunatawan.

²¹ Sacerdote Eleazarqa tukuy soldados maqanakuman rejkunaman nerqa: Kay leyta Señorqa Moisesman qorqa.

^22-23 Chayrayku: Imaschus qorimanta ruwasqasta, qolqemanta, broncemanta, fierromanta, estañomanta, chayri titimanta, chanta imaschus ninapi mana q'olanchu chaykunatawan, ninapi q'asparpayaychej, chanta llimphuchana yakuwan mayllaychej. Imaschus mana ninapi unuyanchu chaykunatataj llimphuchana yakullawan mayllaychej.

²⁴ Qanchis kaj p'unchaypi p'achasniykichejta t'ajsakunkichej, ajinamanta llimphupaj qhawasqas kankichej. Chaymantaraj jaramanta yaykunkichej.

Madianitaspa imasninta rak'inakunku

^25-26 Señorqa Moisesman nerqa: Qanwan sacerdote Eleazarwan, israelitaspa kurajkunasninwan ima, imatachus soldadosqa madianitasmanta qhechusqankuta yupaykuy, runasta, uywasta ima.

²⁷ Chaykunata iskayman uj rejta t'aqankichej. Khuskanta qoychej maqanakoj rerqanku chaykunaman, khuskantataj mana rerqankuchu chaykunaman.

²⁸ Wakinta noqapaj t'aqapuwanki: Soldadosman chayaj kajmanta, runasmanta, wakasmanta, burrosmanta, ovejasmanta ima; sapa phishqa pachajmanta ujta t'aqapuwanki.

²⁹ Chaytataj sacerdote Eleazarman qonki noqapaj kanampaj.

³⁰ Khuskan runasman chayaj kajmanta kikillantataj t'aqankichej sapa phishqa chunkamanta ujta: Runasmanta, wakasmanta, burrosmanta, ovejasmanta, ima uywaschá tiyan chaykunamantawan. Chaykunatataj Dioswan tinkukuna toldopi imastachus ruwashanku chay levitasman qonki, nispa.

³¹ Moiseswan Eleazarwanqa chaykunata kikinta ruwarqanku, Señorqa Moisesman kamachisqanman jina.

^32-35 Mashkhatachus soldados madianitasmanta qhechorqanku, mana yupaspa soldados paykuna kikinkupaj jap'ikusqasninkuta, chaykunamanta karqanku sojta pachaj qanchis chunka phishqayoj waranqa ovejas, qanchis chunka iskayniyoj waranqa wakas, sojta chunka ujniyoj waranqa burros, kinsa chunka iskayniyoj waranqa warmi wawas ima.

³⁶ Soldadosman khuskan chayajkunaqa karqanku kinsa pachaj kinsa chunka qanchisniyoj waranqa phishqa pachajniyoj ovejas.

³⁷ Señorman qorqanku chaykunataj karqanku sojta pachaj qanchis chunka phisqhayoj ovejas.

³⁸ Kinsa chunka sojtayoj waranqa wakasmanta Señorman qorqanku qanchis chunka iskayniyoj wakasta.

³⁹ Kinsa chunka waranqa phishqa pachajniyoj burrosmantataj, Señorpaj t'aqarqanku sojta chunka ujniyoj burrosta.

⁴⁰ Chunka sojtayoj waranqa warmi wawasmantataj Señorpaj t'aqarqanku kinsa chunka iskayniyojta.

⁴¹ Señorpaj t'aqasqa kajkunata Moisesqa sacerdote Eleazarman qorqa, payman Señor kamachisqanman jina.

⁴² Moisesqa soldadosman t'aqasmanta puchoj khuskannintataj israelitasman qoporqa.

^43-46 Chaykunamanta khuskantaj kikillantaj karqa: Kinsa pachaj kinsa chunka qanchisniyoj waranqa phishqa pachajniyoj ovejas, kinsa chunka sojtayoj waranqa wakas, kinsa chunka waranqa phishqa pachajniyoj burros, chunka sojtayoj waranqa warmi wawas ima.

⁴⁷ Chaykunamanta Moisesqa sapa phishqa chunkamanta ujta orqhorqa, chay warmi wawasmanta, jinallataj animalesmantapis. Chaykunatataj Dioswan tinkukuna toldopi ruwaj levitasman qorqa Señor imaynatachus payman kamachisqanman jina.

⁴⁸ Chay qhepatataj Moisesman qayllaykorqanku, pikunachus waranqa soldadosta kamachisharqanku chaykuna, jinallataj pachajtakama kamachej soldadospis.

⁴⁹ Nerqankutaj: Noqayku kamachisniykeqa, soldadosniykuta sumajta yupayku, mana ujpis faltanchu.

⁵⁰ Kunantaj apamushayku imastachus qorimanta ruwasqasta tarerqayku chaykunata: Makisman anuykukunasta, maki cañasman churakunasta, sortejasta, faluchusta, wajkuna k'achanchanapaj ruwasqas karqanku chaykunatawan, Señorman qonaykupaj juchasniykoj cuentanmanta, nispa.

⁵¹ Moiseswan Eleazarwantaj chaykunata jap'erqanku imaschus qorimanta ruwasqas karqanku chaykunata.

⁵² Waranqatakama, pachajtakama kamachejkunaj apamusqanku qori jaywanasta, tukuynimpi pesarqa pachaj pusaj chunka tawayoj kilos.

⁵³ Soldadospis imastachus madianitasmanta qhechusqasninkuta paykunapaj apakorqanku.

⁵⁴ Ajinata chaykunata Moiseswan sacerdote Eleazarwan jap'erqanku, waranqatakama pachajtakama soldadosta kamachejkunamanta; chaykunata paykunaqa Dioswan tinkukuna toldoman apaykorqanku, Señorqa israelitasmanta yuyarikunampaj.