Números 30 - Qheshwa Biblia DC

Qosaj nisqasta imaynatachus ruwanamanta

^1-2 Moisesqa israelita aylluspata kurajkunasninman nerqa: Kayta Señorqa nisunkichej: Maypachachus mayqempis imatapis qosaj nin, chayri juraspa nin imatapis qonanta chayqa, ruwanampuni tiyan imatachus ruwasaj nisqanta.

^3-4 Sichus uj sipas tatampa makillampiraj kashaspa, imatapis Señorman qosaj nin, chayri imatapis ruwasaj nin chayqa, chaymanta tatanman mana imatapis ima ninchu, paytaj junt'anan tiyan imatachus qosaj nisqanta, chayri imatachus ruwasaj nisqantapis.

⁵ Chanta sichus chayta yachaspa tatan mana munanchu chay imasta qonanta, nitaj ruwananta chayqa, jinamanta saqellanqa, mana junt'anqachu, tatan mana munasqanrayku. Chayrayku tatanqa mana junt'anantapunichu nenqa.

^6-7 Sichus uj warmi imatapis ñaupajtaña qosaj nerqa, usqhayllatataj parlarin chayqa; chantá casarakun chayqa, qosan chayta uyarispa mana imatapis ninchu chayqa, chay warmi imatachus qosaj nerqa chayta junt'anan tiyan, chayri imatachus ruwasaj nisqantapis.

⁸ Sichus yachaytawan qosan mana munanchu chayta ruwananta chayqa, manaña junt'ayta atinchu imatachus qosaj nisqanta, nitaj imatachus ruwasaj nisqantapis. Señorpis manallataj junt'anantapunichu nin.

⁹ Sichus viuda, chayri t'aqasqa warmi nenqa imatapis Señorman qonanta chayqa, junt'anampuni tiyan imatachus qosaj nisqanta.

^10-11 Sichus uj casada warmi imatapis Señorman qosaj nin, qosampa wasimpi kashaspa, qosantaj chayta yachaspa mana imatapis ninchu, mana jark'anchu imatachus ruwashan chayta chayqa, pay junt'anan tiyan imatachus qosaj nisqanta.

¹² Sichus qosan yachaytawan mana munanchu chayta ruwananta chayqa, mana Señorqa ninchu junt'anantapuni, imaraykuchus qosanqa chayta mana yachanchu. Señorpis manallataj junt'anantapunichu nenqa.

¹³ Qosanqa atillanqa qoy niyta, chayri mana niytapis, imatachus warmin qosaj nisqanta, chayri jurasqantapis.

¹⁴ Sichus qosan chayta yachaspa ch'inlla kakun sapa diamanta día chayqa, chaywan niyta munan, warmin imatachus Señorman qosaj nisqanta junt'ananta.

¹⁵ Sichus qosan chayta yachasqanmantaña, qhepata mana usqhayta imatapis ninchu, chaymantaraj qhesachan chayqa, pay warmimpa juchanta apanqa, imatachus Señorman qosaj nisqanta mana junt'asqanmanta.

¹⁶ Kaykunata Señorqa kamacherqa Moisesman imaynatachus qhari warmi ruwanankuta, imaynatachus uj sipaspis tatampa wasimpi kashaspallaraj ruwananta.