Números 3 - Qheshwa Biblia DC

Levitas imatachus ruwanankumanta

¹ Maypachachus Moisesman Sinaí orqopi Señor parlasharqa, chaypacha Aarompata Moisespatawan mirayninku kaykuna karqanku;

² Aarompa wawasnenqa kaykuna karqanku: Kuraj kajqa Nadab, chanta Abiú, Eleazar, Itamar ima.

³ Chaykunaqa tawantinku ajllasqas jawisqastaj karqanku sacerdotes kanankupaj.

⁴ Nadabwan Abiuwanqa Señorpa ñaupaqempi wañorqanku, Sinaí orqopi Diospa millachikunan ninata jaywasqankumanta. Chantapis paykunajta mana wawasninku karqachu. Chanta Eleazarwan Itamarllawanña sacerdotej ruwanasninta ruwarqanku, tatanku Aarón qhawashajtin.

^5-6 Señorqa Moisesman nerqa: Leví aylluta wajyay, sacerdote Aarompa kamachisqanman jina imatapis ruwanankupaj, payta yanapanankupaj.

⁷ Dioswan tinkukuna toldopi israelitaspaj, Aarompajwan ruwapuchunku, toldopi imaschus ruwana kashan chaykunatawan.

⁸ Paykuna allinta jallch'anqanku Dioswan tinkukuna toldoj imasninta, chantapis israelitasta yanapanqanku, toldopi imachus ruwana kashan chaykunatawan ruwanqanku.

⁹ Tukuynin levitasta israelitasmanta Aarompaj, miraynimpajwan t'aqay, paykuna imastachus kamachenqanku chayllataña levitasqa ruwananku tiyan.

¹⁰ Jinamanta Aaronman mirayninmanwan saqey, sacerdotej ruwanasninta ruwanankupaj. Sichus waj runa sacerdotej ruwananta ruwanqa chayqa, wañonqa.

Levitasqa Señorpata kanku

^11-12 Señorqa Moisesman nillarqataj: Tukuynin israelitaspa chaupinmanta sapa familiapi kuraj wawasninkoj cuentanmanta, levitasta ajllakuni chayrayku paykunaqa noqajta kanku.

¹³ Noqajtamin tukuy kuraj wawasqa. Maypachachus egipciospa kuraj wawasninkuta wañurachishaspa, israelitaspa kuraj wawasninkuta, jinallataj uywaspa kuraj uñasninkutapis ajllakorqani. Chayrayku chaykunaqa noqajta kanku. Noqamin Señorqa kani.

Levitasta yupanku

^14-15 Señorqa Sinaí ch'in pampapi nerqa: Tukuynin levitasta yupay tatasninkoj sutisninman jina mashkhachus kasqankuta, jinallataj sapa familiapi tukuynin qharista uj killayojmanta pataman, nispa.

¹⁶ Moisestaj maychus kajta yuparqa Señorpa kamachisqanman jina.

¹⁷ Levejpa wawasnenqa, Gersón, Goat, Merari ima karqanku.

¹⁸ Gersompa wawasnenqa mirasqankuman jina karqanku Libniwan, Simeiwan.

¹⁹ Coatpa wawasnenqa mirasqankuman jina karqanku Amram, Izhar, Hebrón, Uzielwan.

²⁰ Merarejpa wawasnenqa mirasqankuman jina, Musiwan, Muhliwan ima karqanku. Kaykuna karqanku Levejpa wawasnin mirasqankuman jina, tatasninkoj sutisninman jina sapa familiapi.

²¹ Libni familiawan, Simeí familiawan Gersonmpata karqanku.

²² Qharisqa tukuynimpi karqanku uj killayojmanta pataman qanchis waranqa phishqa pachajniyoj.

²³ Gersompa familianqa inti yaykuynejpi Dioswan tinkukuna toldo wasaman jarakorqanku.

²⁴ Gersompa familianta kamachejqa karqa Laelpa wawan Eliasaf.

²⁵ Paykuna qhawananku karqa Dioswan tinkukuna toldota, chay toldopaj qaramanta ruwasqa qhatanasninta, jinallataj toldoman yaykunaj jark'achinasninta.

²⁶ Chanta patioj jark'achinasninta, Dioswan tinkukuna toldoj muyuyninta muyurisqa patioman yaykunaqa jark'achinasninta, chay ukhupi kashan toldowan altarwan, jap'ichina waskasnintawan.

²⁷ Coatpata karqanku kay familias: Amram, Izhar, Hebrón, Uziel ima.

²⁸ Paykuna karqanku uj killayojmanta pataman pusaj waranqa kinsa pachajniyoj qharis. Paykuna cuentayoj karqanku Dioswan parlana toldoj imasninta qhawanankupaj.

²⁹ Paykunaqa Dioswan tinkukuna toldoj uray ladompi jarakorqanku.

³⁰ Paykunata kamachejqa karqa Uzielpa wawan Elizafán.

³¹ Paykuna cuentayoj karqanku waqaychanankupaj, Diospa leyninwan kaj cajonta, mesata, k'anchachinasninta, altarkunata, imaschus karqa Diosta yupaychanapaj chaykunata, velota, chaykunapi imasninchus karqa chaykunatawan.

³² Chay levitasta kamachejqa karqa sacerdote Aarompa wawan Eleazar. Pay cuentayoj karqa Dioswan tinkukuna toldopi imaschus karqa chayta qhawajkunamanta.

³³ Merarejpata karqanku Mahli familiawan, Musi familiawan.

³⁴ Chaykunaqa tukuynimpi karqanku uj killayojmanta pataman sojta waranqa iskay pachajniyoj qharis.

³⁵ Paykunata kamachejqa karqa Abihailpa wawan Zuriel. Paykuna jarakorqanku Dioswan tinkukuna toldoj pata ladompi.

³⁶ Merarej wawasninmanta kajkunaqa qhawananku karqa Dioswan tinkukuna toldoj tablasninta, wajtera k'aspisninta sayana maderasninta, imachá tiyan chaytawan.

³⁷ Jinallataj pationta muyuykushan chay sayasqa k'aspisninta, chukusninta, ch'akarpusninta, jap'ichisqa waskasninta ima.

³⁸ Dioswan tinkukuna toldoj ñaupaqenman inti llojsimuy ladoman jarakorqanku Moisés, Aarón, paypa wawasnin ima. Paykuna Diospa tiyakunanta qhawarqanku israelitaspa cuentanmanta. Sichus waj runa sacerdotej ruwananta ruwanqa chayqa, wañonqa.

³⁹ Moiseswan Aaronwanqa ajinata ruwarqanku Diospa kamachisqanman jina. Paykuna levitaspa familiasninta yuparqanku, mashkhachus kasqankuman jina. Tukuyninkupi karqanku uj killayojmanta pataman iskay chunka iskayniyoj waranqa qharis.

Kuraj wawasta cambianamanta

⁴⁰ Señorqa Moisesman nerqa: Israelitaspa tukuy kuraj qhari wawasninta yupay uj killayojmanta pataman sutisninta qelqaspa.

⁴¹ Chay kuraj qhari wawaspa cuentanmanta ajllapuway levitaspa wawasninta. Noqamin Señorqa kani. Kikillantataj israelitaspa uywasninkoj kuraj uñasninkoj cuentanmanta ajllapuway levitaspa uywasninmanta.

⁴² Ajinamanta Moisesqa israelitaspa kuraj qhari wawasninkuta yuparqa, imaynatachus Señor kamacherqa chayman jina.

⁴³ Tukuyninkupi uj killayojmanta pataman iskay chunka iskayniyoj waranqa iskay pachaj qanchis chunka kinsayoj karqanku.

^44-45 Chaymanta Señorqa Moisesman nerqa: Chay israelitaspa kuraj qhari wawasnimpa cuentanmanta levitasta ajllay; jinallataj israelitaspa uywasninkoj kuraj uñasnimpa cuentanmanta levitaspa uywasninta. Levitasqa noqajta kanku. Noqamin Señorqa kani.

^46-47 Chaywampis israelitaspa kuraj wawasnenqa aswan ashkha kanku levitaspa wawasninmanta nisqaqa. Ajinaqa chay iskay pachaj qanchis chunka kinsayoj kuraj kajmanta, mañay sapa ujmanta phishqa phisu qolqeta, mashkhachus chay qolqe pesasqanman jina. Chay qolqeqa chunka ujniyoj gramos.

⁴⁸ Chay kuraj kajkunaj cuentanmanta tantasqa qolqeta Aaronman, wawasninmanwan jayway.

⁴⁹ Moisesqa chay qolqeta jap'erqa israelitaspa kuraj wawasninkoj cuentanmanta, mayqenkunachus kurajyarqanku chaykunamanta.

⁵⁰ Chay qolqeta jap'erqa uj waranqa kinsa pachaj sojta chunka phishqayojta, imaynachus Diospa tiyakunan toldopi qolqe churasqaman jina.

⁵¹ Chaymantataj chay qolqeta Aaronman wawasninmanwan jaywarqa, imaynatachus Señor payman kamachisqanman jina.