Números 28 - Qheshwa Biblia DC

Señorman jaywanamanta

^1-2 Señorqa Moisesman parlarqa: Israelpa wawasninta kamachiy, maychus tiempompi t'antata, ruphachisqa kashan chay mikhunaytawan khuska sumaj q'apashajta jaywanawankuta.

³ Nillaytaj ari: Noqapaj kaj jaywanasta ruphachispa jaywanawankoqa kaykuna kanku: Sapa p'unchaypuni q'olachichunku iskay corderosta uj watayojtakama, sumajnin kajta mana iman imanasqata.

⁴ Ujnin kajqa tutamanta jaywasqa kanqa, ujnin kajtaj ch'isiyaykuyta.

⁵ Ch'aki mikhuymanta jaywana kajqa kachun iskay kilo, sumajnin kaj jak'umanta, uj litro olivo aceitewan ñatusqa.

⁶ Chaykunata sapa kuti q'olachej kanku Sinaí orqopi sumaj q'apashajta Señorpa munasqanta.

⁷ Uj litro vinotawan sapa uj corderota jaywachunku. Chay vinota Dioswan tinkukuna toldopi Señorpa sutimpi ch'ajchonqanku.

⁸ Ujnin kaj ovejatataj ch'isi yaykuyta q'olachenqanku, chaymantaj yapanqanku ch'aki mikhuymanta jaywana kajta, vino jaywanatawan tutamanta jaywanku ajinata. Chayta Señorpaj sumaj q'apashajta q'olachenqanku.

Sapa samarikuna p'unchaypi jaywanas

⁹ Samarikuna p'unchaypi iskay corderosta Señorman jaywankichej uj watayojtakama, mana iman imanasqata sumachajnin kajta. Chaymanta yapankichej tawa kilo sumajnin kaj jak'uta, aceitewan ñatusqata, jinallataj vino jaywanatawan.

¹⁰ Kay jaywanataqa samarikuna p'unchaypi q'olachinkichej, vino jaywanatawan, sapa p'unchaypaj kaj jaywanatawan khuska.

Sapa killa jaywanas

¹¹ Killaj qallarikuynin p'unchaypi sumaj q'apashajta q'olachispa Señorman jaywankichej iskay waka uñasta, uj carnerota, uj watayoj qanchis corderostawan sumachajnin kajta mana iman imanasqasta.

¹² Sapa uj waka uñatataj q'olachinkichej, sumaj ñut'u kaj jak'utawan aceitepi ñatusqata. Jinallataj carnerota tawa kilo sumajnin kaj ñut'u jak'utawan aceitepi ñatusqata.

¹³ Corderotapis sapa ujninta iskay kilo sumaj kaj ñut'u jak'utawan aceitepi ñatusqata. Chaytaqa sumaj q'apashajta Señorpa munasqanman jina q'olachinkichej.

¹⁴ Sapa uj waka uñata jaywanaman churankichej iskay litro vinota. Uj litro khuskanniyojtataj carneroman, uj litrotakamataj corderoman. Kay q'olachinasta qankunaqa Señorpaj sapa killa qallarikuyta ruphachinkichej.

¹⁵ Sapa p'unchay jaywana kajta Señormanqa jaywallankichejtaj, uj cabra chivotawan juchasniykichejpa cuentanmanta ruphachisqa kanampaj vino jaywanatawan khuska.

Pascuapi jaywana

¹⁶ Wata qallarikuy killapi, chunka tawayoj p'unchay kashajtin, Pascua mikhuyta Señorpa sutimpi mikhunkichej.

¹⁷ Q'ayantintaj chunka phishqayoj p'unchaypi fiesta kanqa. Qanchis p'unchayta mana levadurayoj t'antasta mikhunkichej.

¹⁸ Chay qanchis p'unchay qallarikuyta sumaj llimphupaj qhawasqa tantakuyta ruwankichej. Chay p'unchaypi qankunaqa amapuni ni imata ruwankichejchu.

¹⁹ Señorman q'olachispa jaywankichej iskay waka uñasta, uj carnerota, qanchis corderosta uj watayojtakama mana iman imanasqasta sumachajnin kajta.

²⁰ Chay jaywanasta apamunkichej sumajnin kaj ñut'u jak'uta aceitewan ñatusqata. Sapa waka uñapaj kanqa sojta kilos jak'u, tawa kilostaj uj carneropaj.

²¹ Chay qanchis corderopajtaj sapa ujpaj iskay kilokama.

²² Chaymantataj uj chivota apamunkichej juchasniykichejpa cuentampi wañunampaj perdonta tarinaykichejpaj.

²³ Kayta Señorman jaywankichej, chantapis tutamanta sapa paqarin q'olachispa jaywanatawan.

²⁴ Ajinata ruwankichej chay qanchis p'unchay fiestapi, chay jaywanasta sumaj q'apashajta q'olachispa Señorpa munanampaj jina. Kayta ruwankichej vino jaywanatawan khuska, chantapis sapa p'unchay jaywana kaj q'olachinastawan.

²⁵ Qanchis kaj p'unchaypi ruwallankichejtaj llimphupaj qhawasqa tantakuyta. Chay p'unchaypi amapuni imatapis ruwankichejchu.

Ñaupajta poqojkunamanta jaywanas

²⁶ Mosoj poqoykuna fiestapi, chay fiestaqa sutin semananku raymi Señorman jaywanata q'olachinkichej llimphupaj qhawasqa tantakuyta ruwankichej. Chay p'unchaypeqa ni imata ruwankichejchu.

²⁷ Señorman jaywankichej sumaj q'apashaj q'olachinasta ruphachispa iskay waka uñasta, uj carnerota, qanchis corderostawan uj watayojtakama.

^28-29 Chaykunatataj jaywankichej sumajnin kaj ñut'u jak'uta aceitewan ñatusqayojta sojta kilotakama sapa uj waka uñaman yapaspa; carneromantaj tawa kilota; iskay kilotakamataj uj watayoj corderosman.

³⁰ Chanta q'olankichejtaj uj chivota juchasniykichejpa cuentampi wañunampaj perdonta tarinaykichejpaj.

³¹ Chay jaywanastaqa sapa kuti qonkichej, ch'aki mikhuy jaywanata, vino jaywanata, sapa p'unchay jaywanatawan khuska. Chantapis chay uywasqa mana iman imanasqa kanqa.