Números 21 - Qheshwa Biblia DC

Hormata jap'ikapunku

¹ Arad llajtamanta cananeo rey, Neguevpi tiyashaspa uyarerqa, Atarim ñanta israelitas junt'aykamushasqankuta. Chaymanta israelitaswan maqanakoj llojserqa, wakintataj presosta jap'irarqa.

² Israelitastaj Señorman nerqanku, paykunaj nisqankuta junt'anankuta: Sichus chay llajtasta makisninkuman jaywanqa chayqa, paykuna chay llajtasta chinkachinankuta.

³ Señortaj imatachus mañakusqankuta ruwarqa, cananeo llajtasta chinkachiyta yanaparqa. Jinamanta israelitasqa chay llajtasta tukuyninta chinkacherqanku tukuy runasnintinta. Chayrayku chay cheqata suticharqanku Hormata.

Broncemanta katari

⁴ Israelitasqa Hor nisqa orqo k'uchumanta purirerqanku puka mar qochanejman, muyuykamunankupaj ama Edom jallp'anejta pasanankupaj. Israelitasqa chay ñanta rishaspa sayk'umorqanku.

⁵ Chayrayku Diospa contranta, Moisespa contrantawan rimayta qallarerqanku: Imapajtaj Egiptomanta orqhomuwarqayku, kay ch'impi wañurachinawaykupajchu pusamuwarqayku? Kaypi mana mikhuna, nitaj yaku ujyanapaj kanchu. Kay Maná nisqa t'antapis amisqataña amiwayku.

⁶ Chaymantataj Señorqa israelitasman apachimorqa venenoyoj khanej katarista, taripasqantataj khanerqa. Jinamanta israelitas wañurarqanku.

⁷ Chaymanta israelitasqa maypichus Moisés kasharqa chayman rispa nimorqanku: Noqayku juchallikuyku ajinata parlaspa Señorpa contranta, qampa contraykitawan. Señormanta mañapuwayku ari, kay katarista noqaykumanta ithirichinanta!, nispa. Chaymanta Moisesqa Señormanta mañakorqa israelitasta perdonananta.

⁸ Señortaj nerqa: Kay katarisman rijch'akojta broncemanta katarita ruway. Chaytataj warkhuykuy wiphalaj k'aspipi puntanman. Pipis katariwan khanichikuspaqa, chay warkhusqa katarita qhawachun, jinamanta thañenqa.

⁹ Moisesqa broncemanta katarita ruwaspa wiphala k'aspi puntaman warkhorqa. Pipis chay katarita qhawarispa khanichikusqanmanta thañikapoj.

Israelitas kayman jaqayman jarakuspa purinku

¹⁰ Israelitasqa rispallapuni Obot nisqa cheqapi jarakorqanku.

¹¹ Chaymanta rispataj ch'in pampa Ije-abarimpi jarakorqanku, Moabmanta inti llojsimuynejpi.

¹² Chaymanta rispallapuni Zered wayq'opi jarakorqanku.

¹³ Chaymanta rispataj Arnón chimpapi jarakorqanku. Kay mayoqa tarikun ch'in pampapi, chayqa jamushan amorreospa jallp'anmantapacha. Chay mayu t'aqashan Moab jallp'ata, amorreospatawan.

^14-15 Chaytamá a niyta munan Señorpa librompeqa: Puka mar qochapi imatachus ruwasqan, Arnón wayq'opi ruwasqan, corrishaj yakuspi ruwasqan, chaytaj rishan Ar chaynejkama, chayantaj Moab jallp'aj tinkuyninkama, nispa.

¹⁶ Arnón mayumanta rispa chayarqanku Beerkama. Chaypi Moisesqa nerqa yaku pozo cantopi: Israelitasta tantachiy, noqataj yakuta qosqaykichej, nispa.

¹⁷ Chaypacha israelitas takerqanku: Pozomanta yaku phullchimun. Pozo manta takiychej.

^18-20 Kuraj runas tojnusninkuwan allarqanku, llajtamanta sumaj runas kamachina tojnusninkuwan kicharerqanku, nispa. Israelitasqa chay ch'inmanta Matana nisqakama rerqanku, chaymantaqa Nahalielman, chaymanta Bamotman, chaymantaqa Moab valle jallp'aman, Pisga patanejkama, maymantachus ch'in pampas rikukun, chayman.

Israelitas Sehón reyta atipanku

²¹ Israelitasqa kachasta amorreospa reynin Sehonman kacharqanku, nichispa:

²² Jallp'aykinejta pasarichiwayku. Mana sarusqaykuchu chajrasniykichejta, nitaj uvas chajrasniykichejtapis, nillataj pozosniykichejmanta yakusniykichejtapis ujyasqaykuchu. Noqaykoqa jatun ñannillanta cheqanta pasapusqayku jallp'asniykichejnejta, nispa.

²³ Sehontaj mana saqerqachu chay jallp'annejta pasanankuta; manachayqa runasninta tantachiytawan israelitaswan maqanakoj chay ch'in pampasman llojserqa. Jahazaman chayamushajtinku maqanakorqankupacha.

²⁴ Israelitaspis tinkuytawan maqanakorqankupacha, atiparqankutaj. Jinamanta israelitasqa jallp'asninkuta jap'ikaporqanku Arnón mayumantapacha Jaboc mayukama. Chay niyta munan, amonitaspa jallp'ankuwan tinkuykama, sinch'i perqayoj kashan chaykama.

²⁵ Ajinamanta israelitasqa amorreospa llajtasnimpi tiyakaporqanku, Hesbón llajtaspi, tukuy campo jallp'asnintimpi.

²⁶ Hesbón llajtapi amorreospa reynin Sehonqa tiyakorqa. Payqa chay ñaupajta Moab reywan maqanakorqa, chaypacha chay tukuy jallp'asta qhechorqa Arnón mayukama.

²⁷ Chayrayku poetas nisqa runas ninku: Jamuychej Hesbonman, Sehón reypa llajtanman! Sayarichiychejtaj sinch'i perqayoj llajta kanampaj.

²⁸ Sehonmanta, Sebón llajtakama nina lauray llojsimun, chaypi q'olaykun Moabpi Ar nisqa, Arnón patasta ima.

²⁹ Llakiy qanmanta Moab, Quimón diospa llajtan! Payqa chay llajtaj runasnin ayqejta saqellan, jinallataj warmisniykichej Sehón reypa makinman urmajtapis.

³⁰ Hesbompa atiynin urmarqa. Dibonmanta Nofakama raqaykunaman tukuchisqa karqa, chanta Medebkamataj ninawan ruphachisqa karqa.

Israelitas atipanku Basán rey Ogta

³¹ Ajinata israelitasqa amorreospa jallp'ankupi tiyakorqanku.

³² Moisestaj wakin runasta kacharqa Jazer llajtata qhawamojta; ajinamanta israelitasqa chay qayllasninkupi kaj llajtasta atiparqanku, chaynejpi tiyaj amorreostapis qharqorqanku.

³³ Chaymanta israelitasqa Basannejman llojserqanku. Basán rey Ogtaj tukuy soldadosninwan Edreipi paykunawan maqanakoj llojserqa.

³⁴ Señortaj Moisesman nerqa: Ama manchachikuychu chay runasmanta, noqa makisniykiman churasaj, tukuy soldadosnintinta llajtantinta ima. Ajinallatataj qan paywan ruwanki, Sehonwan ruwarqanki, chaynejpi tiyakoj amorreospa reynin Hesbonwan, ajinata, nispa.

³⁵ Ajinata israelitasqa ruwacherqanku Og reyta, wawasninta, soldadosninta, tukuy runasninta ima. Ni pita kausashajta saqerqankuchu, tukuynin jallp'asintataj jap'ikaporqanku.