Números 20 - Qheshwa Biblia DC

Chhankamanta yaku phullchimun

¹ Wata qallarikuy killapi israelitasqa tukuyninku Zin ch'in pampaman chayarqanku, jinata chayaspataj Cadespi jarakorqanku. Chaypitaj María wañuporqa, chay kikimpitaj p'amparqanku.

² Chaypi mana yaku kajtintaj israelitasqa tantaykukuytawan Moisespaj, Aarompajwan maytapuni rimarqanku.

³ Chaymantataj Moisesman nerqanku: Allin kanman karqa wakin israelitaswan khuska wañunayku, mayqenkunatachus Señor wañuracherqa chaykunawan khuska!

⁴ Qankuna, imapajtaj Señorpa ayllun runasta kan ch'in pampaman pusamunkichejri? Qankunaqa uywasniykuwan khuskachu kaypi wañunaykuta munankichej?

⁵ Imapajtaj Egiptomanta orqhomuwarqayku, kay chhika millayman pusamunawaykupaj? Kaypeqa mana imatapis tarpuyta atiykuchu; mana kanchu higos sach'as, uvas sach'as, nitaj granadaspis. Yakullapis mana kaypeqa yanapaj tarikunchu.

⁶ Moiseswan Aaronwan paykunamanta ithirispa Dioswan tinkukuna toldo wasi punkuman rerqanku. Chaypitaj, umankuta pampaman chayachinankukama qonqoriykorqanku. Señorpa k'anchaynintaj paykunaj patankuman rikhurimorqapacha.

⁷ Chaypi Señorqa Moisesman nerqa:

⁸ Kunanqa qanwan Aaronwan israelitasta tantachiychej tojnuykita oqharikuspa. Jinaspataj paykuna rikushajtinku chhankata parlapayay, yakutaj llojsimonqa. Qan qhawashajtiykitaj chhankamanta yakoqa phullchimonqa, jinamanta paykuna, jinataj uywasninkupis yakuta ujyanankupaj.

⁹ Moisestaj Señorpa ñaupaqempi kasharqa chay tojnunta oqharerqa Señorpa nisqanman jina.

¹⁰ Chaymantataj Moiseswan Aaronwan runasta chhanka k'uchuman tantacherqanku. Chaypi Moisesqa runasman nerqa: Uyariychej kunanqa rimajkuna: Kay chhankamantachu ujyanaykichejpaj yakuta orqhomusqayku?

¹¹ Chayta niytawan Moisesqa tojnuta oqharispa iskay kutita chhankata wajtarqa, yakutaj ashkha phullchimorqa. Ajinamanta runasqa yakuta ujyarqanku, jinallataj uywasninkupis.

¹² Señortaj Moisesman Aaronmanwan nerqa: Qankuna noqapi mana creesqaykichejrayku, nitaj israelitas rikushajtinku jatunchawasqaykichejrayku, kunanqa kay runasta mana pusaykunkichejchu, ima jallp'atachus qosqaykichej nerqani chayman.

¹³ Kaymin chay Meriba juturi, maypichus israelitas Señorpa contranta rimarqanku chay. Señortaj may atiyniyoj Dios kasqanta rikuchikun.

Rey Edomqa israelitasta mana pasachinchu

¹⁴ Cadesmantapacha Moisesqa kachasta kacharqa Edom reyman, nichispa: Wauqesniyki israelitas nichimusunki: Qan allinta yachanki imaschus noqaykupaj kasqanta.

¹⁵ Noqaykoj ñaupa tatasniyku Egiptoman riporqanku, chaypitaj unayta tiyakorqanku. Egipciostaj chaypi mayta ñak'arichiwarqayku ñaupa tatasniykuta jina.

¹⁶ Jina kajtintaj Señormanta yanapayninta mañakorqayku. Paytaj waqasqasniykuta, llakiyniykuta uyarispa uj angelninta kachamuwarqayku, ajinamanta Egiptomanta orqhomuwayku. Kunanqa Cades llajtapi kashayku, jallp'aykiwan tinkuypi.

¹⁷ Kunanqa jallp'asniykinejta pasarichiwayku. Noqaykoqa mana chajras chaupintachu, nitaj uvas sach'asniyki chaupintachu pasasqayku, nitaj yakusniykitapis ujyasqaykuchu. Noqaykoqa jatun ñanninta cheqanta risqayku mana pantaspa ni lloq'eman, nitaj pañaman jallp'asniykita pasanaykukama, nispa.

¹⁸ Edom reytaj paykunaman nerqa: Qankunaqa jallp'aynejta mana pasawajchejchu. Rikhurimojtiykichejkama soldadosniywan llojsimusaj qankunawan maqanakoj, nispa.

¹⁹ Israelitastaj nerqanku: Noqaykoqa jatun ñanninta cheqanta pasapusqayku. Sichus noqayku, chayri uywasniyku yakusniykichejta ujyanqanku chayqa, pagapusqayku. Noqaykoqa jallp'aykita pasayllata munayku.

^20-21 Edom reytaj paykunaman kuticherqa: Qankunaqa mana pasawajchejchu, nispa. Chaymantataj payqa israelitaswan maqanakoj llojserqa sumachaj soldadosninwan, sumaj wakichisqaswan, jallp'ankunejta amapuni pasachinankupaj. Chaymanta israelitasqa waj ñanninta jap'irerqanku.

Aarón wañupun

²² Chay Cadesmanta tukuynin israelitas Hor orqonejman jap'irerqanku.

²³ Edom jallp'a tinkuypi kashajtinku Señorqa Moisesman Aaronmanwan nerqa:

²⁴ Aaronqa wañuponqa, mana yaykonqachu ima jallp'atachus israelitasman qosqaykichej nerqani chayman, qankunaqa kamachisqasniyta mana kasuwankichejchu Meriba nisqapi juturi yaku cantopi kashaspa.

²⁵ Qan, Moisés, Aaronta wawan Eleazartawan Hor orqoman pusay.

²⁶ Chaypi Aaronmanta sacerdote p'achasninta lluch'unki, chaytataj Eleazarman p'achallichiy. Aarontaj chaypi wañuponqa, nispa.

²⁷ Moisesqa kikinta chayta ruwarqa imaynatachus Señor payman kamachisqanman jina. Tukuy israelitaspa qhawanantataj Hor nisqa orqoman wicharerqanku.

²⁸ Chaypi Moisesqa Aaronmanta sacerdote p'achanta lluch'uspa, wawan Eleazarllamantaj churaykorqa. Chay Hor orqopi kikimpi Aaronqa wañuporqa. Moiseswan Aaronwantaj chay orqomanta uraykaporqanku.

²⁹ Israelitastaj Aarón wañupusqanta yachaspa maytapuni waqarqanku kinsa chunka diasta.