Números 2 - Qheshwa Biblia DC

Israelitas imaynatachus jarakunankumanta

^1-2 Señorqa Moisesman Aaronmanwan nerqa: Israelitasqa Dioswan tinkukuna toldoj muyuyninman jarakonqanku ayllusninkuwankama wiphalasninkuman jina.

³ Inti llojsimuynejman jarakonqanku Judaj ayllunmanta kaj soldados wiphalankuwan t'aqa t'aqalla. Paykunata kamachenqa Aminadabpa wawan Naasón.

⁴ Yupasqaman jina chaykunaqa qanchis chunka tawayoj waranqa, sojta pachajniyoj kanku.

⁵ Paykunaj ladonkupi Isacar ayllu jarakonqa. Paykunatataj kamachenqa Zuarpa wawan Natanael.

⁶ Yupasqaman jina chaykunaqa phishqa chunka tawayoj waranqa tawa pachajniyoj kanku.

⁷ Paykunaj ladonkupi Zabulón ayllu jarakonqa. Chaykunatataj kamachenqa Helompa wawan Eliab.

⁸ Yupasqaman jina paykunaqa phishqa chunka qanchisniyoj waranqa tawa pachajniyoj kanku.

⁹ Chay jinamanta Judaj jarampi kajkunaqa, tukuyninkupi pachaj pusaj chunka sojtayoj waranqa tawa pachajniyoj kanqanku. Paykunaqa ñaupajta renqanku.

¹⁰ Uray ladoman jarakonqanku Rubén ayllumanta kaj soldados wiphalasninkuwan t'aqa t'aqalla. Paykunataqa kamachenqa Sedeurpa wawan Elisur.

¹¹ Chaykunaqa yupasqaman jina tawa chunka sojtayoj waranqa phishqa pachajniyoj kanku.

¹² Paykunaj ladonkupi Simeón ayllu jarakonqa. Paykunata kamachenqa Zurisadaipa wawan Selumiel.

¹³ Paykunaqa yupasqaman jina phishqa chunka isq'onniyoj waranqa kinsa pachajniyoj kanku.

¹⁴ Paykunaj ladonkupi jarakullanqataj Gad ayllu. Paykunatataj kamachenqa Reulpa wawan Eliasaf.

¹⁵ Paykunaqa yupasqaman jina tawa chunka phishqayoj waranqa sojta pachaj phishqa chunkayoj kanku.

¹⁶ Chay jinamanta Rubempa jarampi kajkunaqa tukuyninkupi pachaj phishqa chunka ujniyoj waranqa tawa pachaj phishqa chunkayoj kanku. Paykunaqa ñaupaj kaj t'aqaj qhepanta renqanku.

¹⁷ Chaypacha levitasqa Dioswan tinkukuna toldota oqharispa purirenqanku, chay tawa jaraspa chaupinta. Chay tawa t'aqasqa purirenqanku qhepan qhepanta, imaynatachus jarakusqankuman jina, wiphalasninkuman jinataj.

¹⁸ Inti yaykuy ladonejpi jarakonqa Efraín ayllumanta kaj soldados wiphalasninkuwan t'aqa t'aqalla. Paykunataqa kamachenqa Amiudpa wawan Elisama.

¹⁹ Paykunaqa yupasqaman jina tawa chunka waranqa phishqa pachajniyoj qharis kanku.

²⁰ Paykunaj ladonkupi Manasés ayllumanta kaj soldados jarakonqa. Paykunata kamachenqa Pedasurpa wawan Gamaliel.

²¹ Paykunaqa yupasqaman jina kinsa chunka iskayniyoj waranqa, iskay pachajniyoj kanku.

²² Chaykunaj ladonkupi Benjamimpa ayllun jarakonqa. Paykunatataj kamachenqa Gedeonejpa wawan Abidán.

²³ Paykunaqa yupasqaman jina kinsa chunka phishqayoj waranqa tawa pachajniyoj kanku.

²⁴ Chay jinamanta Efraimpa jarampi kajkunaqa tukuyninkupi pachaj pusajniyoj waranqa pachajniyoj kanku. Paykunaqa iskay kaj t'aqaj qhepanta renqanku.

²⁵ Pata ladonejpitaj jarakonqanku Dampa ayllunmanta kaj soldados wiphalasninkuwan t'aqa t'aqalla. Paykunatataj kamachenqa Amisadaipa wawan Ahiezer.

²⁶ Paykunaqa yupasqaman jina sojta chunka iskayniyoj waranqa qanchis pachajniyoj kanku.

²⁷ Chaykunaj ladonkupi Aserpa ayllun jarakonqa. Paykunatataj kamachenqa Ocrampa wawan Pagiel.

²⁸ Paykunaqa yupasqaman jina tawa chunka ujniyoj waranqa, phishqa pachajniyoj kanku.

²⁹ Paykunaj ladonkupi Neftalejpa ayllun jarakullanqataj. Chaykunatataj kamachenqa Enampa wawan Ahira.

³⁰ Paykunaqa yupasqaman jina phishqa chunka kinsayoj waranqa tawa pachajniyoj kanku.

³¹ Chay jinamanta Dampa jarampi kajkunaqa tukuyninkupi pachaj phishqa chunka qanchisniyoj waranqa, sojta pachajniyoj kanku. Paykuna wiphalasninkutakama oqharikuspa kinsa kaj t'aqaj qhepanta renqanku.

³² Israelita familias ukhupi, maqanakuspaj yupasqa kajkunaqa, tukuyninkupi kasqanku sojta pachaj kinsa waranqa, phishqa pachaj phishqa chunkayoj runas.

³³ Señorqa Moisesman kamachisqanman jinataj, levitas mana yupasqaschu karqanku.

³⁴ Chay tukuyta israelitas ruwarqanku imaynatachus Moisesman Señor kamachisqanman jina. Sapa ayllu jarakorqanku maypichus wiphalasninku kasharqa chayman; purirerqankutaj sapa uj familia tatasninkoj sutisninman jina.