Números 19 - Qheshwa Biblia DC

Imaynatachus llimphuchakuymanta ruwananmanta

^1-2 Señorqa Moisesmanwan Aaronmanwan nerqa: Noqa Señor, kay kamachiyta qoni: Niy israelitasman uj puka wakata apamunankuta, sumajnin kajta mana iman imanasqata, manaraj umanman yugo chayajta.

³ Chaytataj qankuna sacerdota Eleazarman qonkichej. Paytaj jaramanta jawaman aysaytawan qhawashaspalla ñak'achenqa.

⁴ Chay sacerdote Eleazarqa maki dedonwan chay wakaj yawarninman chapurispa Dioswan parlana toldoj ñaupaqenta qanchis kutita ch'ajchonqa.

⁵ Sacerdote qhawashajtintaj chay wakaj imasninta ninapi ruphachenqa: aychanta, qaranta, yawarninta, phusnusninta ima.

⁶ Jinaytawantaj sacerdoteqa oqharenqa cedro maderata, uj hisopo ramitata, puka trapotawan; chaytataj maypichus waka ruphashan chay ninaman choqaykonqa.

⁷ Chaymantataj sacerdoteqa llimphuta p'achasninta yakuwan t'ajsakonqa, tukuy ukhuntapis mayllakonqa, chaymantaraj jaramanqa yaykonqa. Chaywampis ch'isiyaykuykamaraj ch'ichipaj qhawasqa kanqa.

⁸ Chay wakata ruphachej runapis kikillantataj p'achasninta yakuwan t'ajsakonqa, jinallataj tukuy ukhuntapis mayllakonqa. Paypis kikillantataj ch'isiyaykuykama ch'ichipaj qhawasqa kanqa.

⁹ Llimphupaj qhawasqa runataj chay ruphasqa wakaj ushphanta oqharenqa, churanqataj uj llimphu cheqaman, jaramanta jawapi. Chay ushphamantataj israelitasqa ruwanqanku llimphuchakuy yakuta, chayqa juchaj cuentanmanta rikuchiku.

¹⁰ Waka ruphasqa ushphata oqharej runaqa p'achasninta yakuwan t'ajsakonqa, chaywampis ch'isiyaykuykamaraj ch'ichipaj qhawasqa kanqa. Kay leyqa wiñaypaj churasqa kanqa, qankunapaj, jinallataj qankuna ukhupi tiyakoj karu llajtayojkunapajpis.

¹¹ Pillapis ima ayatapis llankhajqa, qanchis p'unchayta ch'ichipaj qhawasqa kanqa.

¹² Kinsa kaj diapi, qanchis kaj diapiwan mayllakonqanku chay llimphuchakuy yakuwan, jinamanta chay runaqa llimphupaj qhawasqa kanqa. Sichus mana llimphuchakonqachu kinsa kaj diapi, nitaj qanchis kaj diapipis chayqa, mana llimphupajchu qhawasqa kanqa.

¹³ Sichus ima runapis ima ayata llankhajqa, manataj llimphuchakunchu chayqa, Dioswan tinkukuna toldota ch'ichichan, chayrayku chay runa israelitas ukhumanta chinkachisqa kanqa. Paypa patanman mana llimphuchakuy yakuwan ch'ajchusqa kasqanrayku payqa ch'ichipaj qhawasqa kanqa.

¹⁴ Uj toldo ukhupi wañojmantaqa kay jina kamachiy kanqa: Pillapis chay ukhupi tiyakojqa, chayman yaykoj imaqa, qanchis p'unchayta ch'ichipaj qhawasqa kanqa.

¹⁵ Chay toldo ukhupi imaschus mana allin kirpasqa kajkunapis ch'ichipaj qhawasqa kanqa.

¹⁶ Pillapis jaramanta jawapi runa wañusqata, pejpa wañuchisqanta, chayri runa tulluta, chayri aya p'ampanatapis llankhajqa, qanchis p'unchayta ch'ichipaj qhawasqa kanqa.

¹⁷ Ch'ichipaj qhawasqa kajpaj, juchaj cuentanmanta ruphachisqa puka wakaj ushphanta wich'ipi juturi yakuwan chhapuchun.

¹⁸ Chaymantaqa llimphupaj qhawasqa kaj runa chay yakuwan, hisopo ramawan chhapuspa ch'ajchumuchun: Toldota, toldo ukhupi imaschus kajta, chaypi kaj runastawan. Jinallataj pichus aya tullusta, runa wañuchisqata, chayri runa wañusqata, chayri aya p'ampanata llankhajta.

¹⁹ Chaytaqa ch'ajchumonqa pichus llimphupaj qhawasqa kajlla, ujta kinsa kaj diapi, ujtataj qanchis kaj diapiwan. Chay qanchis kaj diapi ch'ajchuchikoj runataj, kutimuspa p'achasninta t'ajsakonqa, jinallataj ukhuntapis pay kikin mayllakonqa; jinamanta ch'isimpaj llimphupaj qhawasqa kanqa.

²⁰ Pichus ajina mana ch'isimpaj llimphuchakonqachu chayqa, ayllusnin ukhumanta chinkachisqa kanqa, Dioswan tinkukuna toldota ch'ichichasqanmanta, chay llimphuchakuy yakuwan mana ch'ajchuchikusqanrayku, ch'ichipaj payqa qhawasqa kanqa.

²¹ Kay leyqa wiñaypaj churasqa kanqa. Pichus llimphuchakuy yakuwan wajta ch'ajchojqa p'achasninta t'ajsakunan tiyan. Jinallataj chay yakuta llankhajpis ch'isiyanankama ch'ichipaj qhawasqa kanqa.

²² Ch'ichipaj qhawasqa runaj llankhasqasnenqa ch'ichipaj qhawasqa kanqa. Pichus chay llankhasqasta llankhajpis ch'isiyaykuykama ch'ichipaj qhawasqallataj kanqa.