Números 17 - Qheshwa Biblia DC

Aarompa tojnun t'ikarin

^1-2 Señorqa Moisesman nerqa: Niy israelitaspa tukuy kurajkunasnin apamunankuta chunka iskayniyoj tojnusta sapa ayllumanta ujta. Sutisninkutataj sapa uj tojnusninkuman qelqaray.

³ Aarompa sutinta qelqay Leví ayllumanta kaj tojnuman. Paykunaqa sapa ayllumanta tojnuyojpuni kananku tiyan.

⁴ Chaykunata churanki Dioswan tinkukuna toldopi Diospa leyninwan cajón kashan chay chimpaman. Chaypi qankunawan tinkusunchej.

⁵ Chaypi noqaj ajllasqay runaj tojunta t'ikarichisaj, ajinamanta israelitas noqay ñaupaqeypi manaña qankunaj contraykichejta parlanqankuchu.

⁶ Moisestaj chay kikinta israelitasman nerqa: Paykunataj sapa ujninku sapa ayllumanta uj tojnutakama qorqanku. Aarompatapis chayllapitaj karqa. Tukuynimpi karqa chunka iskayniyoj tojnus.

⁷ Moisesqa tukuynin tojnusta Señorpa ñaupaqempi Dioswan tinkukuna toldopi, Diospa leyninwan kasharqa chay cajón chimpaman churarqa.

⁸ Q'ayantintaj Moisesqa Dioswan tinkukuna toldoman yaykuspa rikorqa Aarompa tojnun Leví ayllumanta kajpata q'omeryaspa t'ikashajta, jinaspataj almendrasta sumajta poqoshajta.

⁹ Chaymanta Moisesqa, Señorpa ñaupaqenmanta chay tojnusta orqhorqa, israelitasmantaj rikucherqa. Ajinata rikuspataj sapa ujninku oqharikaporqanku tojnusninkuta.

¹⁰ Chaymanta Señorqa Moisesman nerqa: Aarompa tojnunta ujtawan churaykamullaytaj, Diospa leyninwan kashan chay cajompa ñaupaqenman. Chay pachampi saqey, señal jina kanampaj chay thutojkunapaj. Chayta ruway, ajinamanta ama ujtawampis noqaj contrayta rimanankupaj, chayta rikuspa ama wañunankupaj.

¹¹ Moisesqa chayta kikinta ruwarqa Señorpa kamachisqanta.

¹² Israelitastaj Moisesman nerqanku: Noqaykupajqa manaña imapis allinchu, tukuyniyku wañupusqayku.

¹³ Tukuy runas Dioswan parlana toldoman qayllajkuna wañunku. Tukuyniykuchu wañurasqayku imatajri?, nispa.