Números 15 - Qheshwa Biblia DC

Rikuchikusta ruphachinamanta kamachiykuna

^1-4 Señorqa Moisesman kamacherqa: Israelitasman niy: Maypachachus noqa qosqaykichej chay jallp'aman tiyakoj yaykunkichej chaypachaqa, uj torota, chayri uj ovejata apamuwankichej sumaj rikuchikuta ruphachinaykichejpaj, chayri waj rikuchikuta tukuyninta noqaj sutiypi, imatachus qosaj nisqaykichejta junt'aspa, chayri tukuy sonqowan munasqaykichejman jina qosqaykichejta, chayri ima fiestapi qosqaykichej ofrendatapis. Pichus rikuchikuta apamojqa chay rikuchikuman yapachun yapachun sumajnin kaj ñut'u jak'uta uj litro aceitewan chajrusqata.

⁵ Chantapis churallachuntaj sapa rikuchiku corderoman uj litro ofrenda vinota.

⁶ Sichus uj rikuchiku carnerota apamuwankichej chayqa, chayman yapankichej uj litro kuraj aceitewan chajrusqa sumajnin kaj ñut'u jak'u ofrendata.

⁷ Chaywan khuska churallankichejtaj uj litro vinota. Chayqa kashan Señorpata sumaj q'apashaj.

^8-9 Sichus Señorman qonquchej rikuchikuta uj novillota, chayri waj rikuchikuta, chayri allinyakuy ofrendata, chayri imata qosaj nisqaykichejta junt'aspa chayqa, chayman yapankichej uj litro aceitewan chajrusqa sumajnin kaj ñut'u jak'uta.

¹⁰ Chantapis chaywan khuska iskay litro vinotawan sumaj rikuchikuta Señorpaj ruphachinaykichejpaj.

¹¹ Ajinata ruwankichej sapa novillowan, carnerowan, corderowan, chayri cabrata qospapis.

¹² Ajinata ruwankichej sapa uj rikuchikuta qosqaykichejwan, jinallataj mashkhachus kasqanman jina.

¹³ Kaytaqa tukuynin israelitas kamachisqayman jina kikinta ruwanqanku, rikuchikusta sumaj q'apashajta noqapaj ruphachispa.

¹⁴ Sichus uj karu llajtayoj qankunajman chayaykamoj jina, chayri qankunawan tiyakun unaytaña, rikuchikutataj noqaman apamuwayta munan sumaj q'apashajta chayqa, qankuna jina kikillantataj ruwachun.

¹⁵ Chay kikillantapuni ruwankichej qankuna, qankunawan tiyakoj karu llajtayojkuna, jinallataj mirayniykichejpis. Ajina kay kamachisqayqa unaypaj kanqa.

¹⁶ Qankunapaj jinallataj qankunawan tiyakoj karu llajtayojkunapajpis leyeswan, kamachiykunawan tukuypaj uj rejlla kanqa.

¹⁷ Chanta Señorqa Moisesman parlallarqataj:

^18-19 Niy israelitasman: Mayk'ajchus ima jallp'amanchus pusasqaykichej chayman yaykuspaqa, chay jallp'api poqojkunata sumajta mikhurikunkichej; chaywampis uj chhikata noqapaj t'aqapuwankichej.

²⁰ Ñaupajta oqharisqaykichej trigomanta uj chhikata t'aqapuwankichej, jinallataj ñaupajta ruwasqaykichej t'antamantapis ujta t'aqapuwankichej.

²¹ Ajinata chayta jak'uchisqaykichejmantapis, kay jina rikuchikustaqa Señorman t'aqapunkichejpuni.

^22-23 Sichus pantankichej, nitaj ruwankichejchu kay kamachiykunata Moisesnejta Señorpa qosqanta, qankunapis, mirayniykichejpis chay p'unchaykunamantapacha kayta ruwanaykichej tiyan.

²⁴ Tukuynin israelitaspis mana yachaspalla juchallinkuman chayqa, tukuyninku apamuwachunku uj novillota sumaj q'apashaj rikuchikuta noqapaj ruphachinankupaj, ch'aki mikhuy rikuchikusta, vinotawan khuska, imaynatachus kamachisqa kasqanman jina. Juchaj cuentanmanta apamullawankichejtaj uj chivota ruphachinapaj.

²⁵ Chaymantaqa sacerdote chay uywata Señorman jaywanqa tukuynin israelitaspa cuentanmanta, juchasninkumanta perdonasqas kanankupaj. Noqataj paykuna mana yachaspalla juchallisqonkumanta perdonasaj, imaraykuchus paykuna rikuchikusninkuta apamuwanku juchasninkoj cuentanmanta ruphachisqa kanampaj.

²⁶ Noqa tukuynin israelitasta perdonasaj, jinallataj paykunawan tiyakoj karu llajtayojkunatapis, mana yachashaspalla juchallikusqankurayku.

²⁷ Sichus uj runa juchallikun mana yachashaspalla chayqa, uj watayoj cabritata apamuchun juchampa cuentanmanta.

²⁸ Chay cabritataj sacerdoteqa jaywanqa chay runaj juchanmanta, jinamanta perdonasqa kanqa.

²⁹ Chay leyllapuni kanqa tukuynin israelitaspaj, jinallataj qankunawan tiyakoj karu llajtayojkunapajpis, mana yachashaspalla juchallikusqankurayku.

³⁰ Sichus uj runa juchachakun jucha kasqanta yachashaspa, israelitapis kachun, chayri karu llajtayojpis kachun chayqa, noqata qhesachawan. Chayrayku chay jina runaqa ayllusnin ukhumanta chinkachisqa kanqa.

³¹ Chay runaqa palabrasniyta qhesachan, kamachisqasniyta mana junt'anchu. Chayrayku ayllusnin ukhumanta qhechusqa kanqa, juchan patapitaj wañonqa.

Samarikuna p'unchayta qhesachajmanta

³² Ch'in pampapi kashaspa israelitasqa uj runata samarikuna p'unchaypi llant'ata pallashajta tarerqanku.

³³ Chay runata ajinata tarispataj pusarqanku Moisesman, jinallataj tukuy runaspa ñaupaqenmampis.

³⁴ Paykunataj carcelman chay runata wisq'aykorqanku, imaraykuchus mana yacharqankurajchu imatachus ruwanankuta.

³⁵ Chaymanta Señorqa Moisesman nerqa: Kay runaqa wañunampuni tiyan. Tukuynin israelitas jawaman orqhospa rumiwan ch'anqamuchunku, nispa.

³⁶ Tukuynin israelitasqa chay runata jawaman qharqospa chaypi rumiwan ch'anqaykorqanku wañuchinankukama, imaynatachus Señorqa Moisesman kamachisqanman jina.

P'achaspa flecosninmanta

^37-38 Señorqa Moisesman kamacherqa: Kayta niy israelitasman: P'achasninkoj cantosnimpi flecosta ruwachunku. Chaykunatataj ruwakuchunku lila q'aytumanta.

³⁹ Ajinamanta chay flecosnejta yuyarikunkichej tukuy kamachiykunasniyta qosusqaymanta, junt'ankichejtaj. Ajinata munayniykichejwan mana atipachikunkichejchu, chay mana allinta ruwaspa qhatinawaykichejmanta.

⁴⁰ Ajinamanta yuyarikunkichej tukuy kamachiykunasniymanta, junt'ankichejtaj. Noqa Diosniykichejta allinta qhatiwankichej.

⁴¹ Noqamin kani Señorqa, qankunaj Diosniykichejtaj. Noqa Egiptomanta orqhomorqaykichej Diosniykichej kanaypaj. Noqa Señor Diosniykichej kani.