Números 14 - Qheshwa Biblia DC

Israelitas Señorpa contranta oqharikunku

¹ Chaymantataj uyariytawan israelitasqa chay tutantin mayta qhaparerqanku, waqarqankutaj.

² Jinamanta tukuyninku Moisespaj Aarompajwan rimayta qallarerqanku: Allin kanman karqa Egiptopi wañunanchej, chayri ch'impi wañunanchejpis.

³ Imapajtaj Señorqa kayman pusamuwarqanchejri? Maqanakupi wañunanchejpajchu? Warmisninchej, wawasninchej ima enemigosninchejpa makisninman presos urmanankupajchu? Chaypajqa allin kanman Egiptoman kutipunanchej.

⁴ Jina kajtenqa tukuyninchej willanakunachej. Uj kuraj runata ajllananchej, Egiptoman kutipuna, nispa.

⁵ Chaymantataj Moiseswan Aaronwan qonqorikorqanku pampaman umankuta chayachispa, tukuy israelitaspa ñaupaqempi.

⁶ Numpa wawan Josuewan, Jefunej wawan Calebwantaj, maykunachus jallp'ata qhawaj rerqanku chaykuna, p'achasninkuta llik'ikorqanku.

⁷ Tukuynin israelitasmantaj nerqanku: Qhawamorqayku chay jallp'aqa may sumajpuni.

⁸ Sichus Señor munakuwanchej chayqa, pay yanapawasun chay jallp'aman chayayta, qowasumpachataj. Chay jallp'apeqa lechewan misk'iwan yaku jina corrishan.

⁹ Chayrayku ama Señorpa contranta oqharikuychejchu, amataj manchachikuychejchu chay jallp'api kaj runasmanta. Paykunataqa t'antatapis mikhushasunman jina atipasun. Paykunamanta jark'akojqa mana pipis kanchu, noqanchejwanri Señor kashan. Chayrayku ama manchachikuychejchu.

¹⁰ Chayta uyarispataj runasqa paykunata rumiwan ch'anqaykuyta munarqanku. Jina kajtintaj Dioswan tinkukuna toldopi Señorpa k'anchaynin rikhurerqa, tukuy israelitaspa rikunankuta.

¹¹ Señortaj Moisesman nerqa: Mayk'ajkamataj kay runasqa noqata qhesachawanqankuri? Mayk'ajkamataj mana creewanqankuchu, paykunaj chaupinkupi rikushajtinku milagrosta ruwashajtiypisri?

¹² Noqa paykunaman apachimusaj uj wañuchej onqoyta. Chayqa mana saqenqachu chay jallp'aman tiyaj yaykunankuta. Qanmantaqa aswan jatun aylluta ruwasaj, paykunamanta aswan atiyniyojta.

¹³ Moisestaj Señorman nerqa: Señor, qan atiyniykiwan kay israelitasta Egiptomanta orqhomorqanki.

¹⁴ Maypachachus egipcios yachanqanku ajinata kay runasta ruwasqaykita, chaytaqa canaampi tiyakojkunaman willanqanku. Paykunapis yachanku Señor, qan paykunaj chaupinkupi kasqaykita. Qan paykunawan uyapura rikuchikusqaykita, phuyuykipis paykunaj patankupi kashan. P'unchayqa paykunaj patankuta phuyuykipi rinki, tutantaj nina k'anchay ukhupi pusanki.

¹⁵ Sichus ujllapi kay runasta wañurachinki chayqa, qan mentasqa kasqaykita uyarej runasqa nenqankuchá ari:

¹⁶ Señorqa pusasqan runasta, juraspa qosqaykichej nerqa chay jallp'aman, mana chayachiyta atispa, ch'in jallp'aspi wañurachin, nispa.

¹⁷ Chayrayku kunanqa, Señor, jatun atiyniykita rikuchiy ari, imaynatachus nisqaykiman jina. Qanqa nerqanki:

¹⁸ Imamantapis mana usqhayta phiñakusqaykita, munakuyniykeqa may jatun kasqanta, ima sajra juchamantapis perdonasqaykita, jinallataj qampa contraykipi oqharikojtapis. Nillarqankitaj juchayojtapis mana jasut'isqaykita, manachayqa tatasninkoj juchasninta jasut'isqaykita, wawasninkuta allchhisninkuta, allchhisninkoj wawasninkuta, allchhisninkoj allchhisninta ima.

¹⁹ Kunanqa Señorníy, qampata tiyan jatun munakuyniyki. Chayrayku kay runastaqa juchasninmanta perdonallay ari, Egiptomanta kaykama, may pacienciaykiwan pusamunkiñaqa ari, nispa.

Israelitasta Señor jasut'in

²⁰ Señorqa Moisesman kuticherqa: Ya, chay niwasqaykiman jina israelitasta perdonasaj.

²¹ Chay tukuywampis, cheqamanta noqa kausashani. K'anchayniyta tukuy jallp'asman junt'asqata rikunku.

²² Egiptopi, kay ch'in pampaspipis ashkha milagro ruwasqasniytapis rikullankutaj. Kay ch'in pampaspi chunka kutitaña noqaj contrayta oqharikunku, kamachisqasniyta mana kasuwayta munankuchu.

²³ Chayrayku paykunamantaqa ni mayqenninku qosqaykichej nerqani chay jallp'aman yaykonqankuchu, tatasninkuman qonayta nerqani chayman. Nitaj ni mayqen noqata qhesachawajkunapis chay jallp'ata rikonqankuchu.

²⁴ Manachayqa kamachiy Caleblla waj laya sonqoyoj, kamachisqasniytapis allinta kasuwasqanrayku. Chayrayku chay jallp'ata payman rikuchisaj, miraynimpis chay jallp'ata jap'ikaponqanku.

²⁵ Kunanqa valle jallp'aspi amalecitaswan cananeoswan tiyashanku. Qankunataj q'ayapacha kutiriychej ch'in pampanta, puka mar qocha cheqannejta, nispa.

^26-27 Señorqa Moisesman Aaronmanwan nerqa: Mayk'ajkamataj uyarisaj kay sajra runas israelitaspaj thutusqankutari? Paykuna noqaj contrayta rimanku.

²⁸ Paykunaman niychej: Noqa kausaj Dios noqarayku jurani, qankuna imatachus nisqaykichejta uyarisqayman jina ruwasaj.

²⁹ Tukuy qankunamanta iskay chunka watayojmanta pataman yupasqa kajkunaqa, noqaj contrayta parlajkunaqa, kay ch'in pampapi wañonqanku, ayasninkutaj wijch'usqas kanqanku.

³⁰ Makiyta oqharispa qosqaykichej nerqani chay jallp'amanqa mana yaykunkichejchu. Chaymanqa Jefonej wawan Calebwan, Numpa wawan Josuellawan yaykonqanku.

³¹ Juch'uy wawasniykichejta enmemigosniykichejpa makinman urmanankuta nerqankichej, chaykunallata chayachisaj qankunaj qhesachasqaykichej chay jallp'aman, paykuna chaypi tiyakonqanku.

³² Qankunaj ayasniykichej kay ch'in pampaspi wijch'usqas kanqanku.

³³ Chaykamataj wawasniykichejqa tawa chunka watasta michejkunamanta kay ch'in pampaspi puriykachanqanku. Ajinamanta paykuna ñak'arenqanku qankuna juchachakusqaykichejrayku, tukuyniykichej kay ch'in pampapi tukukunaykichejkama.

³⁴ Qankuna Canaán jallp'ata qhawamorqankichej tawa chunka diaspi; ajinallatataj tawa chunka watasta jasut'iyniykichejta jap'inkichej sapa diamanta uj watata. Ajinamanta qankunaqa yachankichej imaynatachus contrayta rimana kasqanta.

³⁵ Noqa Señor nini: Ajinata noqa yachachisaj sajra israelitasta contrayta rimajkunata. Paykunaqa kay ch'impi tukukonqanku, chaypi wañuranqanku, nispa.

Chunka sajra kachaspa wañuynin

^36-37 Pikunatachus Moisés kacharqa jallp'ata qhawajta, llullakuspa willasqankurayku israelitasta rimacherqanku Diospa contranta; jinamanta israelitaswan qhesachacherqanku chay jallp'ata, Señorqa wañusqasta urmacherqa.

³⁸ Chay qhawamojkunamanta Jefonej wawan Calebwan, Numpa wawan Josuellawan kausashaj qhepakorqanku.

Israelitas Hormapi atipachikunku

³⁹ Chayta ajinata israelitasman willajtintaj tukuyninku maytapuni llakikorqanku.

⁴⁰ Q'ayantin israelitasqa tutamanta jatarispa aswan alto kaj orqoman wicharerqanku. Nerqankutaj: Kunanqa Señorpa qowasqanchej jallp'aman risunchej. Cheqamanta Diospa contranta juchallinchej, nispa.

⁴¹ Moisestaj paykunaman nerqa: Imaraykutaj qankuna Señorpa kamachisqasninta p'akinkichejrí? Kunan, imatachus ruwayta yuyashankichej chaypipis mana allinchu risonqachej.

⁴² Ama chay orqoman wichariychejchu, Señorqa manamin qankunawanchu kashan. Enemigosniykichej atipasonqachej.

⁴³ Amalecitaswan cananeoswan suyamushasunkichej qankunawan maqanakunankupaj, wañuchisonqachejtaj. Señorta qhatiyta qhesachasqaykichejrayku Señorqa manaña qankuwanchu kashan, nispa.

⁴⁴ Chay jinata nishajtimpis israelitasqa aswan alto kaj orqoman wicharillarqankupuni. Chaypajtaj Diospa leyninwan kaj cajompis jaramanta mana kuyurillarqapischu, nitaj Moisespis paykunawanchu rerqa.

⁴⁵ Chay orqo kinraykunapi tiyakojkuna amalecitaswan cananeoswan ima israelitaswan maqanakoj llojsimorqanku. Israelitasta atipapataj Hormakama qhatiykorqanku.