Números 12 - Qheshwa Biblia DC

Mariawan Aaronwan Moisespaj rimanku

¹ Mariawan Aaronwan Moisespa contranta rimarqanku, uj etiope warmiwan casarasqanrayku.

² Chantaqa nillarqankutaj: Señorqa mana payllawanchu parlarqa, noqanchejwampis parlallarqataj, nispa. Señortaj chayta uyarerqa.

³ Moisesqa may llamp'u sonqoyoj karqa, kay mundopi tukuy runasmanta nisqaqa.

⁴ Chayrayku Señorqa kinsantinkuman nerqa: Moisesman, Mariaman, Aaronmanwan: Kinsantiykichej riychej Dioswan tinkukuna toldoman. Jinata nejtintaj kinsantinku rerqanku.

^5-6 Señorqa uraykamorqa uj sankhu phuyupi, sayakorqataj Dioswan tinkukuna toldo punkupi. Chaymantataj Mariatawan Aarontawan wajyarqa, paykuna qayllaykojtinkutaj, Señorqa nerqa: Kay imatachus nisqayta uyariwaychej: Maypachachus qankuna ukhupi noqamanta uj sut'inchaj kajtenqa, noqa paykunaman parlani mosqoykunapi jina, mosqoykunapitaj.

⁷ Kamachiy Moisesmanri, mana jinatachu parlani; payqa tukuy ima kamachisqata sumajta kasuwan, tukuy kamachisniymanta nisqaqa.

⁸ Paywanqa uyapura parlani, sumaj sut'itataj. Sichus paywan uyapura parlayku chayqa, imaraykutaj paypa contranta rimankichejri?, nispa.

⁹ Chanta Señorqa paykunapaj maytapuni phiñakuspa riporqa.

¹⁰ Phuyupis Dioswan tinkukuna toldomanta oqharikojtinkama Mariaqa yurajpacha lepra onqoyniyoj rikhurerqa. Mariata Aarón qhawarinanpajtaj, Mariaqa lepra onqoywan llijtipacha kasharqa.

¹¹ Chaymanta Aaronqa Moisesman nerqa: Ay!, wiraqochíy, ama kay juchaykurayku jasut'ichiwaykuchu ari. Noqaykoqa wampumanta jinata juchalliyku.

¹² Ama saqeychu ari, María uj q'etayasqa nacesqa wawa jina kanantaqa.

¹³ Chaymanta Moisesqa qhaparispa Señormanta mañarqa: Mañakuyki ari, Señor, thañichiy ari payta, nispa.

¹⁴ Señortaj payman kuticherqa: Sichus tatan uyanman thoqaykunman chayqa, qanchis p'unchayta p'enqaywan kanman. Chayrayku Mariata jaramanta jawaman qanchis p'unchayta wijch'uychej, chaymantaraj jaramanta kutiyamuchun.

¹⁵ Ajinata Mariaqa qanchis p'unchayta jaramanta jawaman wijch'usqa karqa. Chaykamataj runasqa mana maywampis purirerqankuchu.

¹⁶ María ujtawan paykunaman kutiykamojtinraj, israelitasqa Hazerotmanta purirerqanku. Chaymanta rispataj ch'in pampa Parampi jarakorqanku.