Números 10 - Qheshwa Biblia DC

Qolqe cornetata ruwanku

^1-2 Señorqa Moisesman nerqa: Iskay cornetasta ruwakuy martillowan ch'eqosqa qorimanta. Chaykunaqa kanqa runasta tantachimunapaj, jinallataj maymampis puririnapaj.

³ Iskaynin cornetas waqanqa chayqa, tukuynin runas ñaupaqeykiman tantakamonqanku, Dioswan parlana toldo punkuman.

⁴ Maypachachus uj cornetalla waqanqa chayqa, tukuy kurajkunalla sapa ayllumanta ñaupaqeykiman tantakamonqanku.

⁵ Maypachachus cornestas sinch'ita waqamojtinkutaj, inti llojsimuy uyapi jarakojkuna oqharikonqanku puririnakupaj.

⁶ Qhepan kutipi sinch'ita waqamojtintaj uranejpi jarakojkuna oqharikonqanku. Ujllapi sinch'ita corneta waqamojtintaj señal kanqa ñanta puririnankupaj.

⁷ Cornetas mana sinch'itachu waqamojtinkutaj señal kanqa tukuy israelitas tantakunankupaj.

⁸ Chayta tocajkunataj kanqanku sacerdotes, Aarompa mirayninmanta kajkuna. Kay leyqa qankunapaj unaypaj churasqa kanqa.

⁹ Maypachachus jallp'aykichejpi kashajtiykichej pipis qankunawan maqanakoj jamojtenqa, cornetasta sinch'ita waqachinkichej, jatunmantataj qhaparinkichej. Ajinamanta noqa Señor Diosniykichej qankunamanta yuyarikusqaykichej, enemigosniykichejmantataj jark'akusqaykichej.

¹⁰ Maypachachus kusikunaykichej kajtimpis cornetasta kusiywan waqachinkichej, mosoj killapi fiestata ruwaspa, Señorman ruphachisqa rikuchikusta jaywashaspa, allinyakuy rikuchikusta ima jaywashaspa. Ajinata qankunamanta yuyarikusqaykichej. Noqamin Señor Diosniykichejqa kani.

Israelitas Sinaí ch'in pampamanta puririnku

¹¹ Iskay watamanta iskay kaj killapi iskay chunka día kashajtin, phuyu oqharikorqa Dioswan tiyana, tratotataj ruwana toldo patamanta.

^12-13 Israelitasqa Sinaí ch'in pampamanta purirerqanku. Phuyutaj Parán ch'in pampanejpi sayarqa. Imaynatachus Señorqa Moisesnejta kamachisqanman jina.

¹⁴ Ñaupajta purirerqanku Judá ayllumanta kaj soldados wiphaylankuta oqharikuspa. Paykunatataj kamachejninku jina pusarqa Aminadabpa wawan Naasón.

¹⁵ Isacar ayllumanta kaj soldadostataj kamachejninku jina pusarqa Zuarpa wawan Natanael.

¹⁶ Zabulón ayllumanta kaj soldadostataj kamachejninku jina pusasharqa Helompa wawan Eliab.

¹⁷ Chaymantataj Gersompa mirayninmanta kajkuna. Merarej mirayninmanta kajkunapiwan, Dioswan tinkukuna toldota phaskarqanku. Chay imasta oqharikuspa paykunaqa purirerqanku, paykuna apanankupaj cuentayoj kasqankurayku.

¹⁸ Rubén ayllumanta kaj soldadostaj wiphaylankuta oqharikuspa paykunaj qhepankuta purirerqanku; kamachejninku jinataj paykunata pusasharqa Elisurpa wawan Sedeur.

¹⁹ Simeón ayllumanta kaj soldadosta uj kamachejninku jina pusasharqa Zurisadaipa wawan Selumiel.

²⁰ Gad ayllumanta kaj soldadosta kamachejninku jina pusasharqa, Reuelpa wawan Eliasaf.

²¹ Chaykunaj qhepantapacha purirerqanku Coatpa wawasnin, Diospa tiyakunanmanta llimphupaj qhawasqa imasta oqharikuspa. Paykuna chayanankupajqa ñapis Dioswan parlana toldoqa sayachisqaña karqa.

²² Chay qhepantataj Efraín ayllu jarañataj purirerqa wiphaylankuta oqharikuspa. Kamachejninku jinataj pusasharqa Amiudpa wawan Elisama.

²³ Manasés ayllumanta kaj soldadostataj uj kamachejninku jina pusasharqa Pedasurpa wawan Gamaliel.

²⁴ Benjamín ayllumanta kaj soldadosta kamachejninku jina pusasharqa Gadeonej wawan Abidán.

²⁵ Tukuypa qhepantataj Dan ayllumanta kaj soldados wiphaylankuta oqharikuspa rerqanku. Paykunatataj kamachajninku jina pusasharqa Amisadaipa wawan Ahiezer.

²⁶ Aser ayllumanta kaj soldadostataj kamachejninku jina pusasharqa Ocrampa wawan Pagiel.

²⁷ Neftalí ayllumanta kaj soldadostataj kamachejninku jina pusasharqa Enampa wawan Ahira.

²⁸ Ajinata israelitasqa soldados jina sapa kuti qhepan qhepanta ñanta puririnanku karqa.

Moisesqa warmimpa turanta wajyan

²⁹ Uj kuti Moisesqa warmimpa turan Hobabta wajyacherqa. Hobabqa madianita Reulpa wawan Moisespata suegron karqa. Paymantaj nerqa: Noqayku rishayku Señor qosqayki niwayku chay jallp'aman. Qampis noqaykuwan jaku ari, imatapis allinta ruwapuwasqayku, imaraykuchus Señorqa niwayku, israelitasta sumaj khuyakuyninwan pusanawaykuta.

³⁰ Hobabtaj payman nerqa: Mana, noqaqa llajtayman kutinay tiyan, maypichus tukuy aylluypis kashan chayman.

³¹ Moisestaj nerqa: Ama kutipuychu ari. Qan sumajta rejsinki kay ch'inkunaspi maypichus jarakunas chayta, chayrayku qan pusawayku ari.

³² Sichus qan noqaykuwan rinki chayqa, ima allinkunastachus noqaykuman Señor qowasqayku, chayta qampis jap'illankitaj.

³³ Ajinata israelitasqa riporqanku Señorpata nisqa chay orqoman, rerqankutaj kinsa día puriyta. Diospa leyninwan kasharqa chay cajontaj ñaupaqenkuta risharqa, maypichus jarakunankuta mask'aspa.

³⁴ P'unchayqa paykuna purirejtinkukama Señorpa phuyun patankuta risharqa.

³⁵ Señorpa leyninwan kasharqa chay cajón purirejtinkamataj, Moisesqa nerqa: Sayarikuy ari Señor! Enemigosniyki qanmanta ch'eqerachunku, chejnisojkunapis qanta rikususpa ayqechunku!

³⁶ Diospa leyninwan kaj cajón maynejpichus sayarqa, chaypacha Moisesqa nerqa: Kunanqa kutirimuy ari Señor, mana yupay atina israelitaspa soldadosninman, nispa.