Nehemías 9 - Qheshwa Biblia DC

Esdrasqa Israel aylloj juchasninta Diosman willan

¹ Israelitasqa chay kikin killallapitaj iskay chunka tawayoj p'unchaykunasnimpi tantakorqanku ayunanankupaj; qhashqa p'achastataj churakorqanku, jinataj jallp'atapis umankuman jich'akorqanku.

² Chay mana israelitas kajkunamanta t'aqakuspaña sayaykukuspa sapa ujpis juchasninkuta, jinataj ñaupa tatasninkoj juchasninkutapis Diosman willakorqanku.

³ Chaypi sayashajtinkutaj tukuypa rikunanta kinsa horastapuni Señor Diosninkoj leynin libromanta leerqanku. Waj kinsa horastawan, jinataj juchasninkuta willakorqanku, chanta Señorta yupaycharqanku.

⁴ Chaymantataj levitasmanta Josué, Binuy, Cadmiel, Sebanías, Buni, Serabías, Bani, Quenani ima chay patachaman wicharispa, Señor Diosninkuta yupaychaspa sinch'ita qhaparerqanku.

⁵ Chaymantataj chay levitas Josué, Cadmiel, Binuy, Hasabnías, Serebías, Hodías, Sebanías, Petaías ima nerqanku: Jatarikuychej, Señor Diosniykichejtataj wiñay wiñaypaj yupaychaychej, nispa. Chaypacha paykunaqa Señor k'acha sutinta yupaycharqanku, bendicioneswan, jinataj yupaychaykunaswan.

⁶ Esdrastaj nerqa: Qanllamin k'ata Señorqa kanki, qan ruwarqanki janaj pachata, janaj pachamanta janaj pachatapis, chaypi tukuy ima kajnintapis. Ruwallarqankitaj kay pachata, chaypi tukuy ima kajtapis, mar qochastapis, chaypi tukuy ima kajtapis. Qanqa tukuy imasman kausayta qonki. Chayraykumari janaj pacha ch'askaspis yupaychasunku.

⁷ Qanqa Señor, Abramta ajllarqa chay Dios kanki. Qan orqhomorqanki Caldeospa llajtan Urmanta, suticharqankitaj Abrahamta.

⁸ Rikorqanki qampi sumajta atienikoj runa kasqanta, uj tratotataj paywan ruwarqanki. Nerqankitaj wawasninman jallp'ankuta qonaykita, cananeospata, hititaspata, amorreospata, fereseospata, jebuseospata, gergeseospata ima. Qanqa nisqaykitaqa ruwankipuni, imaraykuchus qanqa nisqaykita junt'ajpuni kanki.

⁹ Qan rikorqanki ñaupa tatasniyku Egiptopi ñak'arisqankuta, chay Puka mar qocha nisqapipis qan uyarerqanki waqaspa qhaparikamususqankuta.

¹⁰ Faraompa contrampi, jinataj kamachisnimpajpis, chay jallp'api tukuy runaspa ñaupaqempipis jatuchaj t'ukuna imasta qan rikucherqanki. Qan rikorqanki imaynatachus israelitasta wapu wapulla may llakiyta ruwasqankuta. Jinamantataj may jatun uyarisqa sutiyoj karqanki kunankama.

¹¹ Ñaupaqenkupi mar qochata iskayman rak'erqanki, mar qochaj chaupintataj ch'aki pampata jina chimparqanku,. Enemigonku qhatiykamojkunata ukhunkama p'ultiykurarqanki, ukhu qochaman rumita choqaykunchej ajinata.

¹² Chaymantataj pusarqanki p'unchaynimpeqa uj phuyu llanthuwan, tutantaj nina k'anchaywan rinanku karqa chay ñanta k'anchaykuspa.

¹³ Chaymantataj Sinaí orqoman uraykamorqanki, janaj pachamantataj paykunawan parlamorqanki. Cheqan kamachiykunastataj qorqanki, cheqan yachachiykunasta, leyesta, sumachaj kaj kamachiykunasta ima.

¹⁴ Yachachillarqankitaj samakuna p'unchayniykita qampaj t'aqayta. Qollarqankitaj kamachiykunasta, leyesta, yachachiykunastawan kamachiyki Moisesnejta.

¹⁵ Qollarqankitaj janaj pacha t'antata yarqhayninkupi sajsachinaykipaj. Yakutapis chhankamanta orqhospa qorqanki ch'akiyninkuta thasnunaykipaj. Chaymantataj nerqanki tiyakapoj yaykunankuta, qonaykita nerqanki chay jallp'aman.

¹⁶ Paykuna jinataj ñaupa tatasniyku imaqa may machu machus rumi sonqostaj karqanku, manataj kamachiykunasniykita kasorqankuchu.

¹⁷ Mana munarqankuchu kasuyta, nitaj yuyarikuytapis chay jatuchaj t'ukuna imasta paykunata khuyaspa ruwasqasniykita. May rumi sonqos kasqaykurayku uj kamachejta churakorqanku watejmanta Egipto kamachiyman kutipunankupaj. Chaywampis qanqa perdonaj Diosmin kanki, llamp'u sonqo khuyakuyniyoj, pacienciayoj, munakuyniyoj Diostaj kanki. Chayrayku paykunataqa mana saqerparerqankichu.

^18-19 Metalta unuyachispa uj waka uñata ruwakuspa, kaymá Egiptomantaqa orqhomuwarqanchej chay diosqa nispa nejtinkupis, chay chhika millay juchasta ruwashajtinkupis, Qanqa jatun khuyakuyniykirayku ch'in pampapi mana saqerparerqankichu. Llanthoj phuyoqa ñanninkuta pusaspa manapuni maykunamanta p'unchaynimpi t'aqakorqachu; nitaj nina k'anchaypis tutampi paykunamanta t'aqakullarqatajchu, k'anchayninwan rinanku karqa chay ñanta rikuchispa.

²⁰ Chay jawari, allin kaj Espirituykita qorqanki paykunaman yachachinaykipaj. Manataj jayk'ajpis siminkumanta piserqachu cielomanta apachimusqayki t'antaqa. Yakutapis qorqanki ch'akiyninkuta thasnunampaj.

²¹ Tawa chunka watas junt'ata ch'in pampapi mikhuyta qorqanki, manataj jayk'ajpis imallankupis piserqachu; nitaj p'achasninkupis thantakorqachu, nitaj chakisninkupis punkejchu.

²² Paykunaman qorqanki reyespa kamachinan llajtasta, nacionesta; jallp'astataj sapa ujman rak'irarqanki. Paykunataj jap'ikaporqanku Hesbón jallp'ata. Chaytaj karqa rey Sehompa jallp'an; Basán rey Ogpa jallp'anta ima.

²³ May chhika wawasniyoj kanankuta qan miracherqanki, janaj pachapi qoyllurkuna jina chhikatapuni. Ñaupa tatasninkuman qonaykita nerqanki chay jallp'amantaj pusarqanki jap'ikapunankupaj.

²⁴ Paykunataj yaykorqanku, jap'ikaporqankutaj Canaán jallp'ata, chay llajtayoj runastataj paykunaj ñaupaqenkupi k'umuykacherqanki, jinataj reykunasninkuta, chaykunapi tiyakojkuna runastapis, makisninkuman churarqanki paykuna munayninkuman jina ruwanankupaj.

²⁵ Maqanakoj allin runasqa llajtastapis jap'ikaporqanku, sumajta poqoj jallp'astapis, tukuy allin imawan junt'asqa wasista, yaku jallch'ana t'oqosta, uvas huertasta, olivo sach'asta, waj ashkha mikhunapaj poqoj sach'astapis. Mikhorqankutaj sumajta sajsakunankukama, wirayarqanku, chay jatun khuyakuyniykipitaj kusikorqanku.

²⁶ Chaywampis mana kasukojkuna karqanku, contraykipi oqharikorqanku, leyniykitataj qhesacharqanku. Chantaqa profetasniykita wañucherqanku sut'inta ch'ataykuspa, qanman kutirikamunankuta willasqankurayku. May millaytataj contraykipi juchallerqanku.

²⁷ Chayraykumin enemigosninkoj makisninman jaywaykorqanki, paykunataj sinch'ita llakicherqanku. May llakiypi rikukuspataj qanmanta yanapata mañakusorqanku. Qantaj jatun munakuyniykirayku janaj pachamantapacha uyarerqanki; qorqankitaj chay ñak'arichejkunaj makisninmanta kacharichej runasta.

²⁸ Chaywampis manaña ima llakiyninkupis kajtin watejmanta ñaupaqeykipi juchallillajñataj kanku. Chayrayku enemigosninkoj makisninman urmajta saqerqanki, chay runastaj mayta llakichej kanku. Chaymantataj yanapayniykita mañakullasojñataj kanku. Qantaj khuyakuspa uyarillajñataj kanki janaj pachamantapacha, ashkha kutista kacharichispa.

²⁹ Qantaj k'amej kanki leyesniykita watejmanta junt'aj churakunankuta. Paykunataj may kasqankuta yuyakuspa kamachisniykita mana kasojchu kanku. Nisqasniykitataj p'akej kanku, chay nisqasniykeqa kausayta qonka tukuy chaykunata, ruwajkunaman paykunataj qampa contraykita oqharikuspa, rumi sonqos kaspataj mana kasuta ruwarqankuchu.

³⁰ Ashkha watasta qanqa paykunawan pacienciakorqanki, Espirituykinejta, profetasniykinejtataj paykunaman willachej kanki, chaytapis manallataj kasojchu kanku. Chayraykutaj waj nacionespa kamachiynin uraman churarqanki.

³¹ Chaywampis jatun khuyakuyniykirayku mana paykunataqa tukuyninkutachu tukucherqanki, nitaj saqerparerqankichu; khuyakoj Dios, munakuyniyojtaj kasqaykirayku.

³² Chayraykumari, noqaykoj Diosniyku, jatun Dios, atiyniyoj manachachikunataj kanki. Qanqa trato ruwasqaykipi munakuyniykitapis mana saqenkichu, ama qonqapuychu tukuy llakiykuna qhatirisqanmanta reyesniykuta, kurajkunasniykuta, sacerdotesniykuta, profetasniykuta, ñaupa tatasniykuta, jinataj tukuy aylluntinta, Asiriamanta reykunaspa tiemponmantapacha kunankama.

³³ Chaywampis qanqa mana ni ima juchayojchu kanki tukuy imas qhatiriwasqaykumantaqa, imaraykuchus qanqa cheqa sonqowan imatapis ruwawayku, noqaykutaj sajra kajta ruwayku.

³⁴ Nitaj reyesniyku, kurajkunasniyku, sacerdotesniyku, nitaj ñaupa tatasniykupis leykunasniykitaqa junt'arqankuchu, nillataj kamachiykunasniykita kasorqankuchu, nitaj k'amisqasniykitapis.

³⁵ Chaywampis paykunaqa jallp'ankupi munasqankupi kashaspa, ashkha allichaj imasta qoshajtiykipis, jinataj chay jatuchaj allin poqoj jallp'asta qoshajtiykipis, manapuni qantaqa yupaychasorqankuchu, nitaj sajra ruwasqankumanta t'aqakuspa kutirimusorqankuchu.

³⁶ Kunantaj qhawariwayku kamachismanta kashasqaykuta ñaupa tatasniykuman jallp'ata qorqanki chaypa poqoyninmanta mikhunaykupaj, chay kikin jallp'allapitaj.

³⁷ Tukuy poqochisqasniykoqa juchasniykurayku reykunasta pataykuman apamorqanki, chaykunallapaj kashan. Paykunaqa munayninkuman jina noqaykuta kamachinawaykupaj jap'ikapuwayku, jinataj uywasniykutapis. Chayrayku may llakisqas kashayku, nispa.

Tukuy ayllu tratota ruwakunku leyta junt'anankupaj

³⁸ Chay tukuy imasrayku noqaykoqa tukuy sonqowan kay qelqasqa tratota ruwayku. Kay sellasqa trato ruwasqamantaj sutisninkuta qelqaykunku kuraj kamachiwajkunasniyku, levitasniyku, jinataj sacerdotesniykupis.