Nehemías 5 - Qheshwa Biblia DC

Paykuna ukhupi llakiykunas tiyan

¹ Chay tiempopi judíos ayllumanta kajkuna mayta rimanakorqanku, paykuna, jinataj warmisninkupis chay llajta masisninku judiospa contranta.

² Paykunamanta wakin nerqanku: Noqaykoqa ashkha qhari wawasniyoj, jinataj warmi wawasniyoj kayku, chayrayku trigota munayku ama yarqhaymanta wañunaykupaj.

³ Wajkunataj nerqanku mikhunata pisichikusqankurayku jallp'asninkuta, uvas huertasninkuta, jinataj wasisninkutapis jap'ichikusqankuta.

⁴ Wakin nillarqankutaj reyman tasata paganaykupaj, jallp'asninku jawa mañakorqayku qolqeta; chay jawa nillarqankutaj:

⁵ Noqaykutaj, jinataj llajta masisniykupis kikin ayllumanta kayku, wawasniykoqa paykunaj wawasninku rijch'ayllataj. Chaywampis noqaykoqa qhari wawasniykuta, warmi wawasniykutapis runaj kamachin kanampaj churayku. Jinamanta ñapis warmi wawasniykoqa kamachisña kanku, manataj imatapis ruwayta atiykuchu paykunata libranaykupajqa, jallp'asniyku huertasniykupis wajkunajtaña kasqankurayku.

⁶ Chay quejasninkuta jinataj chay nisqasninkuta uyarispa phiñakorqani.

⁷ Allinta umacharikuytawantaj chay allichaj runasninta, jinataj kamachejninkuta, k'amerqani llajta masisninkuta chay jinata impuestota mat'isqankumanta. Chay jawari tukuyninkuta wajyacherqani chay imasmanta parlanapaj.

⁸ Paykunamantaj nerqani: Tukuy atisqaykuman jinaqa llajta masisniyku judiosta libramuyku, chay waj nacionesman vendesqas karqanku chaykunamanta. Kunantaj qankunaqa vendellankichejtaj, watejmanta orqhokampunallaykupajtaj. Paykunaqa ch'impacha qhepakorqanku, manataj imatapis kutichiyta aterqankuchu.

⁹ Noqataj chaypi nerqani: Imatachus ruwashankichej chayqa mana walejchu kashan. Qankunaqa Diosninchejta manchachikunaykichej karqa. Ajinamanta chay enemigosninchej Diosta mana manchachikojkuna ama asipayanawanchejpaj.

¹⁰ Ajinamantataj noqa familiasniypis, yanapajkunasniypis, noqapis manullarqaykutaj, qolqeta trigotapis. Ajinaqa qonqapunachej chay munasqanchejta ari.

¹¹ Ajinallatataj mañayku chay jallp'asta, uvas huertasta, olivo sach'asta, wasisninkutapis kunampacha kutichipunaykichejta. Ajinallatataj manusninkutapis qonqapunachej qolqeta granotapis, chay vinotapis, aceitetapis.

¹² Paykunataj kuticherqanku: Kutichipusqayku chay tukuyta, manataj ni imatapis mañasqaykuchu. Ruwasqayku tukuy imatachus nisqaykiman jina. Chaypacha sacerdotesta wajyacherqani, ñaupaqenkupitaj juracherqani chay qopusaj nisqankuta junt'anankupaj.

¹³ Chay jawaqa p'achayta thalarikuspa nerqani: Ajinata Diosman junt'ajkunata wasiykichejmanta jawaman thalarpayachun, jinallataj llank'anaykichejmantapis. Ajinata Dios qharqochun mana imayojta. Tukuy runastaj kuticherqanku: Ajina kachun nispa. Señortataj yupaycharqanku. Runasqa chay nisqankuta junt'arqanku.

¹⁴ Rey Artajerjes, iskay chunka watasmanta, kinsa chunka iskayniyoj wataskama kamachishajtin Judá jallp'amanta kamachejta churawarqa. Chay churawasqan diamantapacha chunka iskayniyoj watata mana noqaqa, nitaj yanapajkunasniypis kamachejman pagasqa kanan karqa chayta jap'ikuyta munarqaykuchu.

¹⁵ Noqamanta aswan ñaupaj kaj kamachejkunaqa tukuy aylluta llakicherqanku. Paykunaqa tawa chunka qolqesta sapa día pagachikoj kanku mikhunankupaj jinataj vinopajpis. Paykunata, ayllumanta kajkuna yanapajkunasninkuta munasqankuman jina llakiyta ruwaj kanku. Noqarí mana chayta ruwarqanichu Diosta manchachikusqayrayku.

¹⁶ Chay jawari llajtaj perqanta, watejmanta oqharichini, manataj jallp'astapis rantikorqanichu. Jinallataj kamachi runasniypis, noqawan khuska llank'arqanku.

¹⁷ Mikhunay mesamanqa pachaj phishqa chunkayojkama mikhunankupaj tiyaykoj kanku, judiosmanta kajkuna, jinataj kamachejkuna ukhumantapis chay qaylla llajtamanta waturiwaj jamojkunaqa wajlla karqanku.

¹⁸ Noqataj sapa diapaj ñak'achej kani: Uj bueyta, aswan sumachaj kaj sojta ovejasta, jinataj wallpastapis, ñak'achillajtaj kani. Sapa chunka diamantataj vinoqa ashkha kapuwarqayku. Chay tukuywampis noqaqa kamachej kayniypiwampis chay mikhuchisqasniymantaqa manaña qolqeta mañakorqanichu, imaraykuchus rikorqani, manaña aylloyqa chaytawan ruwayta aterqachu.

¹⁹ Yuyarikuy noqamanta Diosníy, allin rinawampaj, kay tukuy imata aylluyrayku ruwasqaymanta!