Nehemías 4 - Qheshwa Biblia DC

Enemigosninku asiykukunku

¹ Sanbalatqa noqayku watejmanta perqata jatarichishasqaykuta yachaspa sinch'ita phiñarikorqa. Chayrayku judiosmanta asiykukuyta qallarerqa.

² Llajta masisnimpa ñaupaqempi, Samariamanta soldadospa ñaupaqempiwan, kay jinata nerqa: Imatataj ruwayta yuyanku kay yarqhaymanta wañushaj judiosri? Ujtawanchu yuyasqanku uywa wañuchisqata jaywayta? Chayri uj diallapichu perqa oqhariyta, tukuytataj yuyanku? Chayri chay raqay ruphasqa qollusmantachu mosoj rumista orqhoyta yuyanku?

³ Sanbalatpa ladompitaj amonita Tobías kasharqa, paypis nillarqataj: Chay jawaqa, qhawariychej chay perqa ruwasqankuta: Uj atojllaraj chay pataman wicharispa, urmaykuchinman!

Nehemías Diosmanta mañakun

⁴ Chaypacha noqa Señormanta mañarqani: Diosniyku, uyariy imaynatachus noqaykumanta asiykukuwasqaykuta. Chay llakichiwasqaykumantaqa paykunaj patallanmantaj jasut'iy urmachun. Enemigosniykoj makinman urmaspa, waj llajtasman apasqas kachunku.

⁵ Ama juchasninkuta pampachaychu, nitaj juchankuta ñaupaqeykimanta chinkachiychu, paykunaqa pischus perqata jatarichejkunamanta alqochakunkun, nispa.

Enemigosqa llank'ajkunata alqachiyta munanku

⁶ Perqata watejmanta jatarichispa ruwallarqaykupuni, ñapis khuskankamaña oqharisqa karqa. Ayllumanta kaj runasqa manchay kusiywan llank'asharqanku.

⁷ Jerusalén perqa watejmanta oqharikushasqanta, chay q'asasnintaj wisq'akushasqanta yachaspa mayta phiñakorqanku Sanbalat, Tobías, árabes, Amonmanta kajkuna, Asdodmanta kajkunapiwan.

⁸ Tukuyninkutaj yachachinakorqanku Jerusalenman yaykuykunankuta, urmachimunankupajtaj.

⁹ Chaypachataj Diosmanta mañakorqayku, tuta p'unchaytaj soldados qhawajkunata churarqayku enemigosniykumanta jark'akunaykupaj.

¹⁰ Judamanta runastaj nerqanku: Q'epejkunajta kallpanku pisiyanña. Chay chhika perqa urmasqasqa mana ruway atina jina, manaña ruwayta atiykuchu.

¹¹ Chay enemigosniykoqa nerqanku: Ama yachachunkuchu, nitaj rikuchunkuchu, chaupinkuman yaykuspa wañurachinanchejkama, jinamanta llank'ayninkuta alqachinanchejpaj, nispa.

¹² Paykunawan khuska tiyakoj judiostaj, kutin kutinta willaj jamuwarqayku, chay llajtayoj runas tukuy ladomanta maqaj jamushawasqaykuta.

¹³ Kamacherqanitaj runasta sapa familiamanta perqa wasasman pakaykukunankuta, chay t'oqosnimpi, chay q'asasnimpipis, sapa ujpis espadasninkuwan, lanzasninkuwan, armasninkuwan ima.

¹⁴ Mancharikusqankuta reparaspa, sayarikuytawan nerqani chay allichaj runasninkuman, jintaj kamachejkunasninkuman, jinataj runasmampis: Ama enemigosniykichejmanta mancharikuychejchu, Señormanta yuyarikuychej may jatun kasqanta, manchachikunataj kasqanta. Maqanakuychej ari llajta masisniykichejrayku, qhari wawasniykichejrayku, warmi wawasniykichejrayku, warmisniykichejrayku, wasisniykichejraykupis, nispa.

¹⁵ Chay enemigosniykoqa yacharqanku noqaykoqa wakisqasña kashasqaykuta, Dios paykunata pantacherqa imatachus ruwayta munawasqaykuta. Noqaykutaj tukuyniyku perqa ruwayman kutipullarqaykutaj sapa uj ruwananmankama.

¹⁶ Chay diamantapacha llank'ajkunasniymanta khuskannenqa perqa ruwaypi llank'asharqanku. Chay uj khuskannintaj armasqas qhawasharqanku, lanzasninkuwan, jark'achinasninkuwan, arcosninkuwan, pechoquerasninkuwan ima. Chaypi kurajkunastaj tukuy ima Judá ayllumanta runasta yanapasharqanku.

¹⁷ Perqata ruwasharqanku chaykunataj, chay q'epejkunapis q'epista apashallarqankupuni. Ujnin makinkuwan llank'asharqanku, ujninwantaj armata jap'isharqanku.

¹⁸ Tukuyninku perqa ruwaypi kajkunaqa chumpinkupi watasqa espadasniyoj llank'asharqanku. Trompetata tocaj runataj ladollaypi kasharqa.

¹⁹ Noqa nerqani chay allichaj runasninkuman, chay kamachejkunasninkuman, jinataj tukuy runasmampis: Ruwanasninchejqa jatuchaj, karuspitaj. Noqanchejtaj tukuynin perqaspi ch'eqerasqas kashanchej sapa sapalla.

²⁰ Chayrayku maymantachari trompetata uyarimuspaqa chay rato noqaykuman tantakamunkichej, Diosninchejtaj noqanchejwan maqanakonqa, nispa.

²¹ Jinamanta inti llojsimuymantapacha, inti yaykuykama llank'ashanaykukamaqa, noqaykumanta khuskanqa, armasninku jap'irisqallapuni qhawashawarqayku.

²² Chay jawari, chay kutipi nerqani chay runasman, sapa qhari yanapajninwan khuska qhepakunanta Jerusalén llajta ukhupi, jinamanta chay yanapajqa ch'isimpi qhawananta, p'unchaynimpitaj perqa ruwaypi kananta.

²³ Chaywampis ni noqa, nitaj aylluypis, nitaj yanapajkunapis, nitaj noqawan karqanku chay soldadospis p'achasniykutaqa lluch'ukorqaykuchu, sapa ujninkutaj makinkupi lanza jap'irisqa kasharqanku.