Nehemías 13 - Qheshwa Biblia DC

Nehemiasqa waj imastawan cheqanchan

^1-2 Chaypacha Moisespa libronqa tukuypa ñaupaqempi sut'ita leekorqa. Chaypitaj qelqasqa karqa amonitas, jinataj moabitaspis Diospa ayllunman mana jayk'ajpis chajrukunankuta, paykunaqa israelitasman mana mikhunaswan, jinataj ujyanaswan taripaj llojsisqankurayku. Manachayqa Balaamman llok'iykusqanku israelitasta ñakanampaj. Chaywampis Diosniykoqa maldicionmanta bendicionman tukucherqa.

³ Ajinaqa, leypi nisqanta uyarispa israelitas ukhumanta t'aqarqanku chay waj llajtayojkunawan chajrukojkunata.

⁴ Kaymanta aswan ñaupajta sacerdote Eliasib churasqa karqa Diosniykoj yupaychana wasimpi llank'ana wasipi kamachinampaj. Eliasibqa Tobiaswan aylluchakusqa.

⁵ Eliasibqa payman uj jatun wasita qosqa, chay wasillapi ñaupajtaqa jallch'aj kanku jaywasqasta, inciensota, imaswanchus Señorta yupaychaj kanku chaykunata, sapa chunkamanta ujta t'aqaj kanku chayta, granomanta, vinomanta, aceitemantawan. Chaykunata qoj kanku, levitasman, takejkunaman, punku qhawajkunamanwan qonanku kaj chayta. Chay jawataj sacerdotesman imastapis qonanku karqa.

⁶ Kay tukuy imas kashajtenqa mana noqaqa Jerusalempichu kasharqani. Babiloniamanta rey Artajerjes kinsa chunka iskayniyoj watataña kamachishajtin reypaman kutiporqani. Chaymanta uj chhika tiempomantataj reymanta mañarqani kutirinaypaj.

⁷ Jerusalenman chayaspataj rikorqani Eliasib uj mana walej imata ruwasqanta, Tobiasta kasunanrayku, Diosta yupaychana wasej patiompi uj jatun wasita qospa.

⁸ Chay ruwasqanqa sinch'ita phiñachiwarqa, wijch'umorqanitaj jawaman chay Tobiaspa wasimpi kasharqa chay tukuy imasta.

⁹ Chaymantataj kamacherqani llimphuchanankuta, watajmantataj churampunankuta maymantachus orqhomorqanku chay kikinman Diosta yupaychana wasimpi ruwanasninku imasta, jaywanasta, jinataj inciensostapis.

¹⁰ Yachallarqanitaj levitasmampis mana qopusqankuta qopunanku karqa chay imasta. Señorqa yupaychanankupaj churasqas kajkuna, levitaswan, takejkunawan sapa ujpis jallp'asninkuman ripusqanku.

¹¹ Chaypacha chay kuraj kamachejkunata k'amerqani: Imaraykutaj chay jinata Diosta yupaychana wasita qonqarparerqankichejri?, nispa. Chaymantataj paykunata wajyachiytawan chay ruwanasninkuman churaykaporqani.

¹² Judamanta kajkunaqa tukuyninku chay jallch'ana wasisman chunkasmanta ujta t'aqasqasninkuta, granomanta, vinomanta, aceitemanta ima.

¹³ Chaymantataj chay jallch'ana wasista qhawanankupaj churarqani sacerdote Selemiasta, qelqeri Sadocta, uj levita runatawan Pedaías sutiyojta. Paykunata yanapanampajtaj churarqani Hananta, payqa karqa Zacurpa wawan, Mataniaspa allchhintaj, allin sonqoyoj runas kasqankurayku. Paykunata churarqani, jinallataj llank'aj masisninkumampis mikhuykunata rak'iranankupaj.

¹⁴ Diosníy, yuyarikuway ari! Yuyarikuwan ari kay ruwasqasniymanta, amataj qonqapuychu Diosniypa yupaychana wasimpaj allin kajta ruwasqaymanta, chaypi qanta yupaychanasunkupaj!

¹⁵ Chay p'unchaykunapi rikullarqanitaj Judá ayllu ukhupi wakin runas samakuna p'unchaypi uvasta sarunaspi sarushasqankuta vinota ruwanankupaj, trigo q'apistapis marq'ashasqankuta. Rikullarqanitaj burrostapis vino chajnasqasniyojta uvas t'isnusniyojta, higokunasniyojta, tukuy laya q'epis chajnasqasniyojta qhatirikuspa Jerusalén llajtaman samakuna p'unchaypi apashajta. Chaypacha k'amerqani chay samakuna p'unchaypi vendenasninkuta vendemushasqankumanta.

¹⁶ Chay jawataj llajtamanta wakinkuna Tiro llajtapi tiyakuspa, challwasta tukuy laya vendenastapia apamoj kanku chay samakuna p'unchaypi Jerusalempi judiosman vendenankupaj.

¹⁷ Chaypacha noqa k'amerqani Judamanta kurajkunata: Ima sajratataj ruwashankichej samakuna p'unchayta ch'ichichaspari?

¹⁸ Kay kikillantataj ñaupa tatasniykichejqa ruwarqanku. Chayraykutaj Diosninchejqa chay chhika llakiykunasta patanchejman apamuwarqanchej, jinataj kay llajtamampis. Astawanrajchu Diostaqa Israelpa contrampi phiñachiyta munashankichej samakuna p'unchayta ch'ichichasqaykichejwan?, nispa.

¹⁹ Chaypacha kamacherqani samakuna p'unchaypi ñaupaqen p'unchaypiña ch'isiyaykushajtin Jerusalén llajtaj punkusnin wisq'akunanta, amataj kicharikunanta chay p'unchay pasanankama. Chay jawataj punkusman churarqani wakin kamachisniyta chay samakuna p'unchaypi ama ima qhatupis yaykumunampaj.

²⁰ Chay ranqherosqa, jinataj chay qhatusniyojpis iskay kutita Jerusalén llajta jawapi puñorqanku.

²¹ Noqataj paykunata k'amerqani: Imaraykutaj qankuna kay perqa wasapi puñurashankichejri? Ujtawanchus jinata ruwankichej chayqa, noqa qankunata presochasqaykichej, nispa. Chaymantapacha manaña ujtawan chay samakuna p'unchaypi jamorqankuchu.

²² Chaymantataj levitasta kamacherqani llimphuchakuspa punkusta qhawaj rinankuta, jinamanta chay samakuna p'unchay ama ch'ichichasqa kanankupaj. Diosníy, kay tukuy ima ruwasqaymanta yuyarikuway, khuyakuwaytaj chay k'acha munakuyniykiman jina!

²³ Ajinallatataj chay diaspi rikorqani wakin judiosmanta kajkuna waj llajtayoj warmiswan casarasqankuta. Chaykuna karqanku Asdodmanta, Amonmanta, Moabmanta ima.

²⁴ Wawasninkumanta khuskannintaj Asdod parlayta parlarqanku, chay waj nacionesmanta ima, manataj judiospa parlayninkutaqa parlarqankuchu.

²⁵ Paykunata k'amirarqani, maldicerqanitaj. paykunamanta wakintaqa maqararqani, chujchasninkutataj sik'irarqani. Kamacherqanitaj Diosrayku juranankuta, amaña ujtawan warmi wawasniykichejta, nitaj qhari wawasniykichejtapis chay waj llajtayojkunawan casarachiychejchu; nillataj qankunapis warmisninkuwan casarankichejchu.

²⁶ Manachu Israelpa reynin Salomompis ajinata ruwaspa juchallerqa? Chaywampis tukuynin nacionesmanta nisqaqa mana ujpis pay jina reyqa karqachu. Diosqa payta munakorqa, tukuynin israelitasmantataj rey kanampaj churaykorqa. Chay waj llajtayoj kaj warmis paytaqa juchallicherqanku.

²⁷ Chayrayku mana saqesqaykuchu chay waj llajtayoj warmiswan casaraspa chay jina millayta Diosninchejpa contrampi juchallejtaqa.

²⁸ Kuraj kaj sacerdote Eliasibpa wawan Joiadaj wawanqa ujnin kaj horonita Sanbalatpa tolqan karqa. Chayta ñaupaqeymanta ayqecherqani.

²⁹ Diosníy, yuyarikuy ari sacerdote kayta ch'ichichasqankuta, jinallataj sacerdoteswan levitaswan trato ruwasqaykita ch'ichichasqankutapis.

³⁰ Ajinaqa chay tukuy waj llajtayojkunasmanta t'aqarqani. Sacerdotesta, levitastapis t'aqasninkuman juntuchaspa sapa ujninkuta ruwanasninkuman churaykaporqani.

³¹ Kamachillarqanitaj ima p'unchaykunapichus llant'ata churanasninkuta, jinataj chay ñaupa poqoykunatapis jaywanankuta. Diosníy, yuyarikuway ari, khuyarinawaykimanta.